O Disinganno

O disinganno

Quand'ëa figgeu me paiva o çê ciù bello

e ciù luxente e stelle, a lunn-a e o sô,

e ciù soave o canto de l'öxello,

messaggê do spontâ do primmo arbô.

In sce l'orlo d'un fiumme o d'un rianello

scorrivo a grïgoa, e o grillo cantadô;

e schittando pe-i proei comme un frenguello,

m'innamoavo d'ogni erba e d'ogni sciô.

A ciæabella scorrivo, a farfalletta,

a l'imbrunî, vixin a-i campisanti;

sensa trovâme puìa da sciâ Cicchetta.

Ma poi, vegnindo a l'uso da raxon,

questo mâ, questo çê, con questi incanti,

me son comparsci un seunno, unn'illuxon!

Da o scito de:Alessandro Guasoni