segondo a grafia unitäia
ZE | Sta pagina a l'é scrita in zeneise |
George Perry Floyd (14 de ötobre do 1973 – 25 de mazzo do 2020) o l'é stæto un òmmo afroamerican asciascinou da-a poliçia inte un arresto à Minneapolis, dòppo che un butegâ o l'aiva accaxonou d'avei deuviou un biggetto de 20 dòllai fäso.
I eventi ch'an portou a-a seu mòrte en stæti registræ da-o telefonin de un di passanti. In sciô video se vedde o Floyd ammagnettou e co-a faccia in sce l'asfato, con doî poliçiòtti ch'ô tëgnan fermo e un terso, Derek Chauvin, ch'o ghe tëgne o zenoggio in sciô còllo e in sciâ scheña sensa pösa pe 9 menuti e 29 segondi, asfixiandolo. O Floyd o repete ciù vòtte ch'o n'arriësce à respiâ, fin à quande, in scî urtimi 2 menuti, ghe vëgne da patî e o se gh'arresta o batte do cheu. De lì à un pittin o saià deciarou mòrto à l'Hennepin County Medical Center.
L'ammassamento o l'à occaxonou de proteste, pe-a ciù parte paxifiche, primma à Minneapolis o mæximo giorno e dapeu inte tutto o mondo, a-o crio de «I can't breathe!» (n'arriëscio à respiâ). E proteste an portou à unna serie de discuscioin pubriche in sciô razziximo e a violença da poliçia.
O processo do Derek Chauvin, o poliçiòtto retræto into video co-o zenoggio in sciô còllo do Floyd, o l'é incomensou a-i 8 de marso do 2021. À dirizze l'accusa gh'é stæto o procuou generâ do Minnesota, Keith Ellison. A-i 20 d'arvî do 2021, a giuria de dozze persoñe a l'à deciarou Derek Chauvin corpevole de ammassamento involontäio de segondo graddo, de ammassamento de terso graddo, e de ammassamento corposo.
This article uses material from the Wikipedia Lìgure article George Floyd, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). O contegnûo o l'é disponìbile in sciâ bâze da licénsa CC BY-SA 4.0, se o no l'é diversaménte specificòu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lìgure (DUHOCTRUNGQUOC.VN) is an independent company and has no affiliation with Wiki Foundation.