Durante di Ardighê dito Dante, poeta, scritô e politico (Firençe 1265 - Ravenna 1321).
ZE-P |
Nasciûo inte 'na famiggia da miliççia çittadiña da Bella e Ardighê de Bellinçon, Dante o studiò ancon figgiœu grammatica, quindi filozofia, probabilmente presso e scœue di ordi mendicanti e foscia o se formò a Bologna ascì. O commençò zoeno a scangiâ poexie co-i maggioî poeti do so tempo mentre o l'asciorveiva a-i dovei che comportava a so çittadinança e o so ceto sociâ. O parteçipò a arcuñe spediçioin de l'exerçito, in qualitæ de cavagêo, e a-o comitato d'acuggença de Carlo Martello, figgio maggiô de Carlo II d'Angiò into 1294.
Quande se mitigò i Ordenamenti de giustiççia de Giano da Bella che proibivan, tra i atre cose, a parteçipaçion a-e magistratue ciu importante a chi no foise inscrito a un'arte, Dante, ch'o l'aiva frequentao Brunetto Latin, scrivan e cançelê do Comûn, condividendo con lê i valoî politichi do poppolo, o s'inscrisse a l'Arte di meghi e di speçiæ, accedendo coscì a di importanti conseggi: o conseggio di Çento, quello di Trentesei do capitagno e, into 1300, o vertiçe do Comûn, o priorato.
A Firençe andava tuttavia intenscificandose a lotta tra-e façioin aristocratiche di Gianchi (capezæ da-i Çerci) e di Neigri (ghiæ da-i Donæ), i primmi tendenti a avvexinâse a-o popolo e i segondi ciu interessæ a appoggiâ Bonifaçio VIII inti so tentativi de controllâ Firençe. Dante, priô into momento into quæ o scontro o s'ea fæto particolarmente intenso, o fu vexin a-i Gianchi e o sostègne a linnia politica contraia a-i amîe do pappa l’anno doppo ascì. Pe questa raxon, quande i Neigri pigion o soro graçie a l'arrivo de truppe de Carlo de Valois, inviao da-o pappa, e, into 1302, inandion di procesci contra i precedenti rettoî, Dante o fu accuzao de mâversaçioìn, bandio e condannao a morte in contumaçia. Tra o 1302 e o 1304 Dante o l'arestò ligao a-o gruppo di exuli Gianchi a-o quæ s'ean unii i ghibellin, e o viægiò in Toscaña, a Forlì e a Veroña, a-a riçerca de alliæ pe poei rientrâ a Firençe.
O tentò ascì a stradda da paxificaçion, ch'a fallì comme ascì o rientro in forçe into 1304. Dante o l'abbandonò allôa i Gianchi, o fu foscia a Pariggi, probabilmente a Bologna, a Trevizo, quindi in atre çittæ da Marca trevixaña e da pœu torna in Toscaña donde o soggiornò a Lucca. In questi anni o misse man a doì tratæ arestæ incompii, o Convivio e o De vulgari eloquentia, e o començò a Diviña Comédia.
Insci-â scîa de l'eleçion de Arrigo VII (1308), e do viægio da questi intrapreizo pe l’incoonaçion, o scrisse arcuñe epistoe inte quæ o l'exortava i prinçipi e i poppoli d’Itallia a sottomettise e l’imperatô a punî i rebelli, e o mœüò a vixon da stoia ch'o l'aviæ esposto inta Commedia e into De monarchia, segondo a quæ a Gexa, usurpao – a prœuvo a-a donaçion de Constantin – o poei che l'impêo o l'aiva riçevúo da Dê pe a cupidiggia di so pastoî, a l'aiva destruto a paxe di ommi impedindoghe de realizzâ o so fin providençiâ.
Solo una monarchía universâ a l'aviæ posciúo ristabilî e condiçioin perdue. Questa conceçion a no vègne men quande a morte de Arrigo VII (1313) a pose fìn a-e spiançe ch'o l'aiva sciuscitao. Dante o continuò a meditâla a Veroña donde o soggiornò da-o 1312 a-o 1318 a-a corte de Cangrande da Scaa. O trascorì i ûrtimi anni a Ravenna, presso Guiddo Novello da Polenta.
Contròllo de outoritæ | VIAF (EN) 97105654 · ISNI (EN) 0000 0001 2144 6210 · SBN (IT) CFIV008732 · Europeana (EN) agent/base/59792 · LCCN (EN) n78095495 · GND (DE) 118523708 · BNF (FR) cb118985852 (data) · BNE (ES) XX1153531 (data) · ULAN (EN) 500265888 · NLA (EN) 36583628 · BAV (EN, IT) 495/345466 · CERL cnp01453940 · NDL (EN, JA) 00437214 · WorldCat Identities (EN) n78-095495 |
---|
This article uses material from the Wikipedia Lìgure article Dante Ardighê, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). O contegnûo o l'é disponìbile in sciâ bâze da licénsa CC BY-SA 4.0, se o no l'é diversaménte specificòu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lìgure (DUHOCTRUNGQUOC.VN) is an independent company and has no affiliation with Wiki Foundation.