Bærtomê Pagan

1878 - Zena, 24 zugno 1947).

O nascette a Sant’Ilaio (vexin à Nervi) o 27 settembre 1878, da Gioxeppe e Teexa Marsaña, manenti de modesta condiçion.

O travagiava comme camallo inta Compagnia di Caravana quande into 1913 o fu çernuo pe interpretâ a parte do gigante neigro Maciste into film Cabiria do Zane Pastron. O personaggio, rielaboaçion do Scidon de Cartagine in fiamme de l'Emillio Salgari, o fu 'battezzao' da-o Gabriælo D’Anonçio, ch'o se inspiò a-o nomiagio de l'Ercole, macis («magœu» in latin), ò che donque da 'n superlativo grego-dorrico de makros («grande»). O Pagan o vègne subbito popolariscimo, un veo e proppio divo, tanto da êse constreito a continoâ a carea çinematograffica in sce quello personaggio, a partî da-o Maciste (1915), diretto da-o Viçenço Denizot co-a supervixon do Pastron.

Into passaggio da 'n film a l'atro o Maciste o subì di ritocchi, da neigro a gianco, da l'antiga Cartaggine a di ambientaçioin e aventue moderne e a sfondo eroicomico. A fu a primma de 'na serrie de peliccole con protagonista o gigante bon, scimbolo de força, coraggio, magnanimitæ e atruismo, 'na sciorta de compromisso tra-o Sanson, l'Ercole e o Tarzan.

O scurtô Œügennio Baron o-o pigiò comme modello pe-a figua do Gaibado into monumento de Quarto dedicao a-i Mille, inaogurao o 5 de mazzo 1915.

 

Pe-a Cabiria o Pastron o g'aiva oferto 20 lie a-o giorno (contra e 15 ch'o guaagnava in porto), ma o Pagan o l'arivò a pigiâne 600.000 e ciu a l'anno. Ciu che 'n attô o l'ea a personificaçion vivente de 'n eroe romanzesco: instintivo e primitivo, dotao de fixico possente e de 'n fattorizo ch'o ghe inluminava o vizo e o sgoardo; solo l'attô statunieize Douglas Fairbanks o-o sovrastò in famma comme interprete de film d’aventua. O personaggio de Maciste, nasciuo comme serrio, o diventò commico so malgraddo, pe-a goffaggine ostentâ da-o Pagan, ch'o-o rendeiva scimpattico e o-o distinse da-i atri interpreti ch'avieivan coverto quello rollo. Tante pose e gesti do Maciste fun da pœu veoscimilmente mutoæ da-o Mussolin pe construe a so inmaggine ciu popolâ e populista, comme quella a torso nuo da 'battaggia do gran'.

Into 1918 o Pagan o l'ea stæto ciammao pe fâ da spalla a-o commico André Deed in Cretinetti e gli stivali del brasiliano. Da-o novembre 1921 a-o zenâ do 1923 o fu a Berlin, co-in contræto da fóa. Rientrao da-a Germannia, o produtô Steva Pittaluga o l'imbarcò insce-o transatlantego Duilio pe-a croxea inaogurâ Zena-Niorche. O l'nterpretò ancon œutto film e da pœu, doppo o 1928, o se retiò a Sant’Ilaio, inta so Villa Maciste, tormentao inti urtimi anni de vitta da l'arteiosclerroxi e da-o diabete; o sofrì ascì de 'na grave forma de sonnambulismo, pe-a quæ o l'ea stæto ezonerao da-o serviççio militâ, cosa ch'a gh'impedì de parteçipâ a-a Grande Guæra. Inmobilizzao da l'artrite rœümatoide, o fu constreito a passâ i urtimi anni in sciâ carêga rolante.

O sposò a Camilla Bâdùçça (nasciua into 1884), da-a quæ into 1916 o l'ebbe o figgio Oreste.

O moì a Sant’Ilaio o 24 zugno 1947.

• Cabiria, regia do Zane Pastron (1914)
• Maciste, regia do Luigi Roman Borgnetto e Viçenço Denizot (1915)
• Maciste alpino, regia do Zane Pastron (1916)
• Cretinetti e gli stivali del Brasiliano, regia do André Deed (1916)
• Maciste poliziotto, regia do Roberto Roberti (1918)
• Maciste medium, regia do Vincenzo Denizot, (1918)
• Maciste atleta, regia do Zane Pastron (1918)
• Maciste innamorato, regia do Luigi Roman Borgnetto (1919)
• Maciste salvato dalle acque, regia do Luigi Roman Borgnetto (1920)
• Maciste in vacanza, regia do Luigi Roman Borgnetto (1920)
• La trilogia di Maciste (Maciste contro la morte, regia do Carlo Campogallian, Il viaggio di Maciste, regia da Letiçia Quaranta, Il testamento di Maciste, regia do Pierre Lepetit, 1920)
• La rivincita di Maciste, regia do Luigi Roman Borgnetto (1920)
• Maciste und die Tochter des Silberkönigs (Maciste e a figgia do re de l'argento), regia do Luigi Roman Borgnetto (1922)
• Maciste und die Javanerin (Maciste e a Giavaneize), regia de l'Uwe Jens Krafft (1922)
• Maciste contro Maciste (1923)
• Maciste africano (1923)
• Maciste und der Sträfling Nr. 51 (Maciste e o prexonê n. 51), regia do Luigi Roman Borgnetto (1923)
• Maciste und die chinesische Truhe, (Maciste e a cascia cineize) regia do Carl Boese (1923)
• Maciste imperatore, regia do Guiddo Brignon (1924)
• Maciste e il nipote d'America, regia de l'Elœüteio Rodolfi (1924)
• Maciste all'inferno, regia do Guiddo Brignon (1926)
• Maciste contro lo sceicco, regia do Marrio Camerin (1926)
• Maciste nella gabbia dei leoni, regia do Guiddo Brignon (1926)
• Il gigante delle Dolomiti, regia do Guiddo Brignon (1926)
• Il vetturale del Moncenisio, regia do Bâdassâ Negron (1927)
• Gli ultimi zar, regia do Bâdassâ Negron (1928)
• Giuditta e Oloferne, regia do Bâdassâ Negron (1929)

•   Wiki Commons a contêgne di files in sce Bærtomê Pagan