Starebeeld Orion

Laes hie wie v'r mit de versjillende saorte Limburgs ómgaon.

Orion is de naom vaan 'n starebeeld wat vaan de gaanse Eerd gemekelek te zien is. 't Is te vinde op d'n hiemelequator. De naom is aofkomsteg vaan Orion oet de Griekse mythologie, 'ne jeger, dee door de godin Artemis weurt doedgemaak en tot starebeeld woort verheve.

Op 't noordelek haafroond is 't 's winters vreug in d'n aovend hiel dudelek in oosteleke riechting te zien. 't Liek qua vörm op 'n zandluiper, mèt linksbove de staar Betelgeuse, rechsbove Bellatrix, linksoonder Saiph en rechsoonder Rigel. In 't midde ligke drei stare op ein lijn: Alnitak, Alnilam en Mintaka (ζ, ε en δ). Deze drei stare weure ouch wel "Gordel vaan Orion" (es zouw 't 'ne reem zien) of "Jacobsstaaf" geneump.

Zjus oonder de gordel is de Orionnevel (M42 in 't keertsje) te vinde, wat zelfs mèt 't bloete oug te zien is in doonker nachte. Zjus oonder Alnitak is de Paardekopnevel te vinde. Deze is evels lesteg te zien.

Tösse 16 en 26 oktober is de meteorezwerm de Orionide te zien, mèt e maximum op 21 oktober. Deze zwerm is geassocieerd mèt de komeet vaan Halley.

 

Via de stare in Orion is 't gemekelek um aander stare te vinden. Sirius ligk min of mie in 't verlengde vaan de lijn vaan Mintaka nao Alnitak, Aldebaran ligk zjus d'n aandere kant op. In 't verlengde vaan 'n lijn van Rigel nao Betelgeuse vind me Castor en Pollux, twie stare oet 't starebeeld Twielinge.