ម៉ារ៉ុក

ប្រទេសម៉ារ៉ុក​ (ភាសាបារាំង៖ Maroc) ឬហៅតាមភាសាអង់គ្លេសថា ម៉ូរ៉ុកកូ (Morocco) ដោយមានឈ្មោះជាផ្លូវការថា ព្រះរាជាណាចក្រម៉ារ៉ុក គឺជាប្រទេសមួយស្ថិតនៅប៉ែកខាងលិចបំផុតនៃអនុតំបន់ម៉ាហ្គ្រីបក្នុងតំបន់អាហ្វ្រិកខាងជើង។ ប្រទេសម៉ារ៉ុកមានព្រំប្រទល់ជាប់នឹងសមុទ្រមេឌីទែរ៉ាណេនៅភាគខាងជើង និងមហាសមុទ្រអាត្លង់ទិកនៅភាគខាងលិច ហើយមានព្រំដែនគោកជាប់នឹងប្រទេសអាល់ហ្សេរីនៅភាគខាងកើត និងដែនដីជម្លោះសាហារ៉ាខាងលិចនៅភាគខាងត្បូង។ ប្រទេសនេះលាតសន្ធឹងលើផ្ទៃដី ៤៤៦,៣០០ គីឡូម៉ែត្រការ៉េ ឬ ៧១០,០៨០ (បើគិតទាំងសាហារ៉ាខាងលិច) ជាមួយនឹងប្រជាជនចំនួន ៣៧ លាននាក់។ សាសនាផ្លូវការ និងប្រជាប្រិយបំផុតគឺ ឥស្លាមសាសនា ហើយភាសាផ្លូវការគឺ ភាសាអារ៉ាប់ និងភាសាប៊ែប៊ែរ រីឯភាសាបារាំងក៏ត្រូវបានគេនិយាយយ៉ាងទូលំទូលាយផងដែរ។ អត្តសញ្ញាណ និងវប្បធម៌ម៉ារ៉ុកគឺកើតចេញពីការលាយឡំគ្នារវាងវប្បធម៌ប៊ែប៊ែរ អារ៉ាប់ និងអឺរ៉ុប។ រាជធានីរបស់ប្រទេសម៉ារ៉ុកគឺ រ៉ាបាត ខណៈពេលដែលទីក្រុងធំបំផុតក្នុងប្រទេសគឺកាសាប្លង់កា។