སའུཐ་ཨཕ་རི་ཀ་
སའུཐ་ཨཕ་རི་ཀ་
སའུཐ་ཨཕ་རི་ཀ་འདི་རྒྱལ་ཁབ་ཅིག་ཨིན། རྒྱལ་ཁབ་འདི་ ཨཕ་རི་ཀ་གི་གླིང་ཆེན་ནང་ ལྷོ་ཁ་ཐུག་ལུ་གནས་ཏེ་ཡོད་པའི་རྒྱལ་ཁབ་ཅིག་ཨིན། རྒྱལ་ཁབ་འདི་མཐའ་སྐོར་ཏེ་རྒྱ་མཚོ་ཡོདཔ་དང་ རྒྱལ་ཁབ་ནང་ན་ལུ་ ས་ཁ་མཐོ་ས་དང་དམའ་བའི་ཐང་དགའ་ཏོག་ཏོ་ལེ་ཤ་ཡོད། རྒྱལ་ཁབ་འདི་གིས་ས་མཚམས་འདི་ རྒྱལ་ཁབ་༥ དང་མཐུད་དེ་ཡོདཔ་དང་ དེ་ཚུ་ཡང་ མོ་ཛམ་བིཀ། བོཊསི་ཝ་ན། ན་མི་བི་ཡ། སོ་ཝ་ཛི་ལེནཌ། ཛིམ་ཝབ་ཝེ་ཚུ་ཨིན། རྒྱལ་ཁབ་དེ་གི་སའི་རྒྱ་ཚད་འདི་ ཀི་ལོ་མི་ཊར་གྲུ་ཞི་ ༡༢,༢༡,༠༠༠ ༼ས་ཡ་གཅིག་དང་ཉིས་འབུམ་ཉིས་ཁྲི་གཅིག་སྟོང་ཐམ་པ་༽ ཡོདཔ་ཨིན།
རྒྱལ་ཁབ་འདི་ནང་ སྤྱི་ལོ་༢༠༢༡ ལོའི་ཐོ་དང་འཁྲིལཝ་དང་ མི་རློབས་བསྡོམས་ས་ཡ་༦༠ ཡོདཔ་ཨིན། རྒྱལ་ཁབ་འདི་ལུ་རྒྱལ་ས་ལྟེ་བ་གསུམ་ཡོདཔ་དང་ དེ་ཡང་བདག་སྐྱོང་གི་རྒྱལ་ས་ལྟེ་བ་འདི་ པིརི་ཊོ་རི་ཡ་དང་ དྲང་ཁྲིམས་ཀྱི་རྒྱལ་ས་ལྟེ་བ་འདི་ བུལུམ་ཕཱོན་ཊེན་ དེ་ལས་ ཁྲིམས་བཟོའི་རྒྱལ་ས་ལྟེ་བ་འདི་ ཀེཔ་ཊའུན་ཨིན། ཨིན་རུང་ ཁྲོམ་སྦོམ་ཤོས་འདི་ ཇོ་ཧ་ནེསི་བརག་ཨིན། རྒྱལ་ཁབ་ནང་ གཞུང་འབྲེལ་དུ་ཁ་སྐད་༡༡ ལག་ལེན་འཐབ་དོ་ཡོདཔ་ཨིན།
མི་ཚུ་གིས་ཆོས་ལུགས་ཁག་དག་པ་ཅིག་རང་ལག་ལེན་འཐབ་ཡོད་རུང་ མི་རློབས་བརྒྱ་ཆ་ ༨༠ དེ་ཅིག་གིས་ཡེ་ཤུ་པའི་ཆོས་ལུགས་འདི་ལུ་མོས་གུས་བསྐྱེད་དེ་ལག་ལེན་འཐབ་སྲོལ་འདུག།
རྒྱལ་ཁབ་འདི་ནང་ཁོང་རའི་མི་རིགས་གནགཔོ་ཚུ་མང་སུ་ཡོདཔ་དང་ཕྱི་གླིང་པ་དཀརཔོ་ཚུ་ཡང་ཡོདཔ་ཨིན། མི་གནགཔོ་འདི་བརྒྱ་ཆ་༨༡ ། སླ་བསྲེ་མི་རིགས་བརྒྱ་ཆ་༩ ། ཕྱི་གླིང་པ་བརྒྱ་ཆ་༨ ། ཨེ་ཤི་ཡ་ལས་བརྒྱ་ཆ་༢ ཡོདཔ་ཨིན། དུས་རབས་༡༧ པའི་ཕྱེད་མཚམས་ལས་ ཕྱི་གླིང་པ་ཚུ་འོང་སྟེ་གཞིས་ཆགས་འབད་ཡོདཔ་དང་ དེ་ཡང་གཙོ་བོ་ར་ ནི་དར་ལེནཌ་རྒྱལ་ཁབ་ཀྱི་མི་ཁུངས་ཚུ་ཨིན་པས། ཕྱི་གླིང་པའི་མི་གཞན་ཡང་ ཇར་མ་ནི་དང་ ཕ་རནསི་ དེ་ལས་བིརི་ཊེན་རྒྱལ་ཁབ་ཚུ་ལས་འོང་ཡོདཔ་ཨིན་པས། ཕྱི་གླིང་པའི་མི་ཚུ་གིས་ རྒྱལ་ཁབ་འདི་དུས་རབས་༢༠ པ་ཚུན་དབང་ཡོདཔ་ཨིན། སྤྱི་ལོ་༡༩༩༠ གི་ལོ་གྲངས་ནང་མི་གནགཔོ་ཚུ་གིས་རང་དབང་འཐོབ་སྟེ་ དམངས་གཙོའི་གཞུང་གཞི་བཙུགས་འབད་ཡོདཔ་དང་ དེ་བསྒང་སྲིད་འཛིན་དང་པ་འདི་ ནེལ་སཱོན་མཱན་ཌེ་ལ་གིས་ སྤྱི་ལོ་༡༩༩༤ ལུ་མཛད་ཡོདཔ་ཨིན། སྤྱི་ལོ་༡༩༩༦ ལུ་རྩ་ཁྲིམས་ཅིག་ཡང་གསར་རྩོམ་འབད་ནུག།
རྒྱལ་ཁབ་འདི་ ས་འོག་གི་རང་བཞིན་ཐོན་སྐྱེད་སྐྱི་ཕྱུག་པའི་རྒྱལ་ཁབ་ཅིག་ཨིན། སྤྱི་ལོ་༡༨༦༧ ལུ་རྡོ་རྗེ་ཕ་ལམ་དང་ སྤྱི་ལོ་༡༨༨༦ ལུ་གསེར་ཐོབ་སྟེ་ དེ་བསྟུན་པའི་ས་གཏེར་ལཱ་ཚུ་འགོ་བཙུགས་ཏེ་ དེ་ནང་ཕྱི་རྒྱལ་ལས་སྤྲོ་བ་བསྐྱེད་མི་མི་ཚུ་ཡང་གཞིས་སྤོ་སྟེ་འོང་ནུག། དེ་གིས་མ་དོ་བར་ ཟངས། དངུལ། ལྕགས། ཚྭ། མེ་རླུང་ཚུ་གི་ས་གཏེར་ལཱ་ཡང་འབད་དེ་ཕྱིར་ཚོང་འཐབ་དོ་ཡོདཔ་ཨིན། ས་ནམ་གྱི་ལཱ་ལུ་ཡང་བརྩོན་དོ་ཡོདཔ་ཨིན། རྒྱལ་ཁབ་དེ་གིས་ ཕྱིར་ཚོང་དང་ནང་འདྲེན་འདི་མང་ཤོས་རང་ རྒྱ་ནག། ཇར་མ་ནི། ཡིའུ་ཨེསི། ཡིའུ་ཀེ། རྒྱ་གར་རྒྱལ་ཁབ་ཚུ་དང་འབད་དོ་ཡོདཔ་ཨིན། ཕྱིར་ཚོང་འདི་མང་ཤོས་ས་གཏེར་དང་རྡོ་སོལ་ཚུ་ཨིནམ་དང་ ནང་འདྲེན་འདི་ས་སྣུམ་མར་ཁུ་རིགས། སྣུམ་འཁོར། འཕྲུལ་ཆས། བཞེས་སྒོའི་རིགས་ཚུ་ཨིན་པས།
This article uses material from the Wikipedia ཇོང་ཁ article སའུཐ་ཨཕ་རི་ཀ་, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ཇོང་ཁ (DUHOCTRUNGQUOC.VN) is an independent company and has no affiliation with Wiki Foundation.