Un Studia En Scarlata

Un studia en scarlata A Study in Scarlet
Autor: Arthur Conan Doyle Pais: Rena Unida Lingua: Engles

La nara conteni la apare prima de Sherlock Holmes e Dr Watson, ci ia deveni du de la carateres la plu conoseda en naras de imajina.

La nara es divideda en du partes.

Parte prima

Esta parte comensa con un titulo cual defini la rol de Dr Watson como naror e institui la punto de vista naral ce la obra cual segue es no de imajina, ma de fato: "Repriminte un estraeda de la recordas de Dr John H. Watson, membro pasada de la Departe Medical Militar."

La nara comensa en 1881, cuando Dr Watson, ci ia servi en la Gera Angloafgani Du, reveni a London, visita la Restorante Criterion e encontra acaso un ami vea, nomida Stamford. Watson confida a Stamford ce, par causa de un feri de spala a la Batalia de Maiwand, el ia es obligada a sorti de la servis militar e ce el xerca aora un loca de abita. Stamford dise ce un de sua conosedas, Sherlock Holmes, desira trova algun per divide la lua de un aparte, ma el averti Watson sur la cualias strana de Holmes.

Stamford prende Watson a la Ospital de San Bartolomeo do, en un laboreria cimical, los trova Holmes en esperimenta con un reatante, descovrente un proba per deteta emoglobina umana. Holmes esplica la importa de manxas de sangue como atestas en litigas criminal. Cuando Stamford presenta Watson a Holmes, Holmes presa manos con Watson e comenta: "Tu ia es en Afganistan, me persepi." An si Holmes eleje no esplica como el ia sabe esta, Stamford leva la tema de sua du xercas paralel per un loca de abita en London, e Holmes revela ce el ia trova un aparte perfeta a 221B, Strada Baker. A sua sujesta, la du omes lista sua defetos diversa per serti ce los va coabita felis. Pos vide la salas, los reloca se e deveni abituada a sua situa nova.

Watson es stonada par Holmes, ci ave sabes profonda de cimica e reportas scandalosa, e sabes multe esata ma limitada de jeolojia e botanica, ma conose poca leteratur, astronomia, filosofia e politica. Holmes reseta ance multe visitores a intervales diversa tra la dia. Pos multe confonde par Watson, Holmes revela ce el es un "detetor consultable" e ce sua visitores es clientes. Frontinte la dutas de Watson sur alga de sua reclamas, Holmes dedui casual a el ce un visitor, un mesajor de la polisia urban, es ance un sarjento de la infantria de marina. Cuando la om confirma esta, Watson mervelia a la capasia de Holmes de persepi detalias e asembla los.

Holmes leje la telegram, cual solisita un consulta en un caso nova de omiside. El esita aida, car tota la onora ta vade a la polisiores. Watson speroni el a reconsidera, donce Holmes invita el a acompania el en sua investiga de la sena de crimin, un casa abandonada prosima a la Via Brixton.

Holmes esamina la troteria e jardin ante la casa, ante cuando el e Watson encontra Investigores Gregson e Lestrade. La cuatro oserva la sena de crimin, e Holmes usa un lupa e un regla enrolada. On informa el ce la mor mas es identifiada como Enoch Drebber. On ia trova sangue en la sala ma la corpo ave no feris. Plu, los aprende de documentos trovada sur sua corpo ce el ia es en London con sua secretor, Joseph Stangerson. Sur un mur, scriveda en sangue, es la leteras RACHE. Coretinte un teoria de Lestrade, Holmes comenta ce esta es la parola deutx per "venja". El continua, deduinte ce la vitim ia mori de venena, e furninte un descrive de la mator: ses pedes de altia, pedes nonproportial peti, fas roja, botas con fronte reta, e un sigar de Tiruchirappalli. La ungias de sua mano destra es longa, e el ia ariva en un taxi de cual sua cavalo ia ave tre feros vea e un nova. Holmes dise ce la scrive RACHE es un rus per engana la polisia. Pos move la corpo de Drebber, la du descovre un anelo de oro de un fem sposida.

Pronto, Holmes e Watson visita la casa de la polisior (Rance) ci ia descovre prima la corpo, e paia pico el car los disturba sua ritmo de dormi. Los reseta poca informa cual Holmes no sabe ja, estra ce un om parente enebriada ia atenta prosimi a la sena de la crimin. Holmes reproxa la polisior per no comprende ce esta ia es la omisidor mesma, en desembla. Los parti, e Holmes esplica ce la omisidor ia revade a la sena pos trova ce el ia lasa la anelo ala.

Holmes envia alga telegrames, incluinte un cual comanda jornales a primi un anunsia sur la anelo trovada. El compra ance un fasimil de la anelo. El divina ce la mator, pos revade ja a la sena de la crimin per xerca lo, va veni per reprende lo. A la anunsia, un fem vea responde ci declara ce la anelo parteni a sua fia. Holmes dona a el la fasimil, segue el, e revade a Watson con la raconta: la fem ia prende un taxi, e Holmes ia viaja sur la retro de lo, ma, cuando lo ia para, el ia trova ce la fem ia desapare. Holmes crede ce la fem ia es un aidor desemblante de la omisidor.

A la dia seguente, Gregson visita Holmes e Watson, informante los ce el ia aresta un suspetada. El ia vade a la oteleta de Sra Charpentier, do Drebber e Stangerson ia reposa ante la omiside. El ia descovre ala ce Drebber, un enebriada, ia atenta besa Alisia, la fia de Sra Charpentier, e ce esta ia causa direta la espulsa de los. An tal, Drebber ia reveni plu tarda en acel note e ia atenta saisi Alisia, provocante sua frate plu vea a ataca el. La frate ia atenta xasa Drebber con un baston, ma ia dise ce el ia perde el. Gregson ia aresta la frate par causa de esta atesta nondireta.

Lestrade ariva, revelante ce Stangerson ia deveni un vitim plu resente de omiside. El ia vade per intervisa Stangerson pos descovre do el ia lua un sala, ma ia trova sua corpo mor, prosima a la fenetra de la otel, cotelida tra la cor. Supra la corpo, RACHE ia es denova scriveda. La sola cosas cual Stangerson ia ave ia es un novela, un pipa, e un caxa peti conteninte du piles. Lestrade porta ancora la caxa, e Holmes proba la piles a un terier vea e malada ci abita en la construida. La pil prima ave no efeto; la pil du mata la can. Holmes dedui ce la un ia es nonosiva e la otra ia es venena.

Alora un xico vagante nomida Wiggins ariva. El es la gidor de la Nonreguladas de la Strada Baker, un grupo de enfantes simil sin casa ci Holmes emplea per aida el a veses. Wiggins dise ce el ia veni la taxi cual Holmes desira. Holmes envia el per trae la taxiste, finjente ce el nesesa aida con sua bagaje. Cuando la taxiste asende e basi supra la valis, Holmes restrinje el con securipolsos e anunsia ce la taxiste es Jefferson Hope, la mator de Drebber e Stangerson.

Parte du

La nara retrospeta, visitante la Vale de la Lago Salosa en Utah en 1847, do John Ferrier e un xica peti nomida Lucy, la sola survivores de un grupo de abrivias, mori de desidrata e famia. Los es descovreda par un grupo vasta de mormones viajante, gidada par Brigham Young. La mormones salva Ferrier e Lucy con la restrinje ce los adota sua crede e vive longo lo. Ferrier, ci mostra se como un xasor capas, adota Lucy e reseta un dona jenerosa de tera do el construi sua cultiveria cuando on prepara la Site de la Lago Salosa. Pos alga anios, Lucy, aora matur, deveni la ami e ultima la enamada de un om nomida Jefferson Hope.

Lucy e Hope promete sposi lunlotra, con intende de fa esta pos la reveni de Hope pos un viaja de du menses per sua labora. Ma Ferrier es visitada par Young, ci revela ce lo ta es contra la relijio si Lucy ta sposi Hope, un person nonmormon. El declara ce Lucy va sposi Joseph Stangerson o Enoch Drebber — de ci ambos es fios de membros de la Consilio Santa de Cuatro — ma ce Lucy pote eleje cual. Young dona un mense a Ferrier e Lucy per sua deside.

Ferrier, ci ia jura ce sua fia va sposi nunca un mormon, envia rapida un mesaje a Hope per aida. Cuando el es visitada par Stangerson e Drebber, Ferrier es colerida par la disputas entre los sur Lucy, e el ejeta los. Ma a media de cada note, la cuantia de dias restante a Ferrier ante la sposi es pintida a alga loca en sua cultiveria. Hope ariva a la sera ante la dia final, e, con sua amor e la padre, el fuji furtiva a via de la cultiveria e de la Site de la Lago Salosa.

Ma, pos alga oras de xasa comeda per la grupo, Hope reveni e trova ce la padre es mor e ce Lucy ia desapare. Desidente dedica sua vive a venja, Hope revade furtiva a la site, aprendente ce Stangerson ia mata Ferrier, e ce Lucy ia es obligada a sposi Drebber. Lucy mori pos un mense, con cor creveda; Drebber, ci ia erita la cultiveria de Ferrier, no lamenta el. Hope entra par forsa a la casa de Drebber a la note ante la funera de Lucy, per besa sua fronte e prende sua anelo de sposia. Jurante la venja, Hope patrulia la site, e susede cuasi mata Drebber e Stangerson a veses diversa.

Hope comensa sufri de un aneurisme aortal, tal ce el parti de la montania per gania mone e resani. Cuando el reveni pos alga anios, el descovre ce Drebber e Stangerson ia fuji de la Site de la Lago Salosa pos un disputa entre la mormones. Hope xerca tra la Statos Unida, e trova los en Cleveland; la duple fuji alora a Europa, final arivante en London.

Esta es la raconta cual Hope, en securipolsos, nara volente a Holmes, Lestrade, Gregson e Watson.

En London, Hope ia deveni un taxiste e ia trova final Drebber e Stangerson a la stasion de ferovia en Euston, a punto de parti a Liverpool. Pos perde la tren prima, Drebber ia comanda ce Stangerson resta a la stasion e ia revade mesma a la casa de Sra Charpentier. Pos un disputa fisical con la fio de Sra Charpentier, Drebber ia entra a la taxi de Hope e ia spende alga oras en bevi. Ultima, Hope ia prende el a la casa en la Via Brixton, do Drebber ia entra con la crede enebriada ce lo es un otel. Ala, Hope ia obliga Drebber a reconose el e a eleje entre du piles, de cual un es venenosa e la otra es nonosiva. Drebber ia prende la pil venenida, e en cuando el ia mori, Hope ia mostra a el la anelo de sposia de Lucy. La stimula, en junta con sua aneurisme, ia fa ce sua nas sangue; el ia usa la sangue per scrive RACHE sur la mur supra Drebber.

Reveninte a sua taxi, Hope ia descovre ce el ia perde la anelo, ma pos revade a la casa, el ia encontra la polisior Rance, ci el ia evade par finje ce el es enebriada. A pos, Hope ia fa ce un ami desembla como un fem vea per prende la anelo de cual Holmes ia anunsia sua trova. A pos, Hope ia oserva la otel de Stangerson; ma esta, informada sur la mori de Drebber, ia refusa sorti. Hope ia entra a la sala de Stangerson par trepa tra la fenetra, e ia ofre a el la mesma eleje de piles, ma el ia es atacada par Stangerson e obligada a coteli el a la cor.

Pos es informada sur esta, Holmes e Watson revade a la Strada Baker. Hope mori de sua aneurisme en la note ante sua apare en corte, con fas suriente. En la sera seguente, Holmes revela a Watson como el ia dedui la identia de la omisidor e como el ia usa la Nonreguladas per xerca un taxiste con acel nom. El mostra alora un jornal en cual on dona la onora completa per la solve a Lestrade e Gregson. Watson responde ce Holmes o el mesma debe publici la raconta vera de la aventura.

La libro ia es traduida a lingua franca nova par Simon Davies en 2018.

• [https://lfn.fandom.com/wiki/Vicitestos:Un_studia_en_scarlata/0 Tradui en lingua franca nova]