Revolui Industrial

Esta cambia ia inclui vade de metodos de produi par mano a macinas, prosedes nova de produi fero, la usa cresente de la potia de vapor, la developa de macinas-utiles e la asende de la sistem de fabricerias.

La stofa ia es la industria dominante de la revolui industrial en relata con emplea, valua de esflue, e capital investida. La industria de stofa ia es ance la prima en usa metodos de produi moderna.

La revolui industrial ia comensa en Britan, e multe de la inovas ia es fada par persones brites. En la dui de la sentenio 18, Britan ia controla un impero comersial global con colonias en America Norde e Africa, e con alga influe political en la sucontinente indian, tra la ativias de la Compania Brites de India Este. La developa e asende de comersia ia es la causas xef de la revolui industrial.

La revolui industrial ia es un punto de cambia major en la istoria, casi tota aspeta de vive dial ia es influeda en alga forma. Spesial, la revenu promedia de la popla ia comensa esibi creses sustable sin presedente. Alga economistes dise ce la efeto major de la revolui industrial ia es ce la model de vive per la popla jeneral ia comensa crese coerente per la ves prima en istoria, an si otras ia dise ce lo no ia comensa boni sinifiosa asta la sentenio 19 tarda e la sentenio 20 temprana.

La produi interna bruta per person ia es larga stable ante la revolui industrial e la emerji de la economia capitaliste moderna, contra ce la revolui industrial ia comensa un era de crese economial per persones en economias capitaliste. La istoristes de economia acorda ce la comensa de la revolui industrial es la aveni la plu importante en la istoria de umania pos la doma de animales e plantas en la eda neolitica.

La comensa e fini esata de la revolui industrial es ancora discuteda par la istoristes, car lo es un move de cambias e economial e sosial. Eric Hobsbawm ia dise ce la revolui industrial ia comensa en la Rena Unida en la desenio de 1780 e ia no es sentida intera asta la desenio de 1830 0 1840, contra cual T. S. Ashton ia dise ce lo ia aveni entre 1760 e 1830. Industri rapida ia aveni un en Britan, con proportios alta de crese en macinas de vapor e produi de fero aveninte pos 1800. La produi de stofa par macinas ia estende de Rena Unida a Europa continental e a Statos Unida en la sentenio 19 temprana, con sentros importante de stofa, fero, e carbon emerjinte en Beljia e Statos Unida e a pos stofa en Frans.

Un retrosede economial ia aveni de la desenio 1830 tarda a la desenio 1840 temprana cuando la adota de la inovas orijinal de la revolui industrial, como fili e texe macinida, ia lenti e sua mercatos ia maturi. Otra inovas ia develop plu tarda en la periodo, como la adota cresente de locomotivas e barcones de vapor, fonde de aser par soflon calda e tecnolojias nova, como la telegraf eletrica, introduida jeneral en desenios 1840 e 1859, ia no es bastante potiosa per crea proportios plu grande de crese. Crese economial rapida ia comensa pos 1870, orijinante de un grupo nova de inovas cual ia es nomida la revolui industrial du. Esta inovas nova ia inclui prosedes nova per fabrica aser, la fabrica vasta de macinas de produi, e la usa de macinas plu avansada en la fabricerias propulsada par vapor.