Lingua Mongol

La cuantia de parlores en tota sua dialetos es sirca 5.2 milion, incluinte la majoria clar de abitores de Mongol e multe de la abitores de la Rejion Autonom de Mongol Interna (un parte de Xina). En Mongol, la dialeto halha (o khalkha), scriveda en cirilica (e en la afabeta latina per sur la rede sosial) es dominante, e cuando en Mongol Interna, la dialetos es plu diversa e es scriveda en la scrive mongol. Alga linguistes clasi alga otra linguas mongolica, como buriat (lingua) e oirat (lingua), como dialetos de mongol, ma la plu vide los como linguas autonom.

Mongol ave armonia de vocales e un strutur de silabas plu complicada ca otra linguas mongolica, e permete grupos de cual plu como tre consonantes a la fini de un silaba. Lo es un lingua aglutinante tipal cual depende de cadenas de sufisas en la dominas verbal e nomal. An si lo ave un ordina de parolas funda - sujesto-ojeto-verbo - la ordina entre formulas nomin es alga libre, e roles gramatical es indicada par un sistem de sirca oto casos gramatical. Verbos es marcada per vose (sinco de los), aspeta, tempo, e modos (incluinte un modo de validia). En liante de frases, un rol spesial es donada a converbos, pd verbos cual funsiona como sujuntas.

Mongol moderne ia evolui de mongol media, la lingua parlada en la Impero Mongol de la sentenios 13 e 14. En la cambia, un desloca major en la sistem de armonia de vocales ia aveni, vocales longa ia developa, e la sistem de casos ia cambia alga, e la sistem de verbos ia es restruturida. Mongol es relatada a la lingua estinguida, hitan (o khitan). Linguistes ia pensa ce Mongol es relatada a la linguas turcica, linguas tungusica, japanes, e corean, ma esta idea es aora desusada. Leteratur mongol es bon atestada en la forma scriveda de la sentenio 13, ma lo ave ance presedentes plu temprana en la leteratur de la popla hitan e otra poplas xianbei. La Inscrive de Huis Tolgoi, de sirca 630 ec, es la testo plu vea en un lingua mongolica.