Estetica

La estetica (de un parola elinica cual sinifia sensa) es la parte de la filosofia cual conserna la esense e la persepi de la belia.

El studia la judis e la emosias estetical, e ance la formas diversa de la arte.

Estetica
Detalia de "La nase de Venus", par Botticelli
Estetica
"Fonte", par Marcel Duchamp, un artiste de la promove "dada"

Estetica ia es comun videda como un capasia per judi la cualia de un obra de arte (incluinte musica e leteratur). David Hume, per esemplo, ia indica a "un capasia per deteta tota la ingredientes en un composa" e ance "a doles en ajunta a plaseres, cual evita la resta de umania", o, plu simple, la capasia per plaser.

Per Immanuel Kant, joia es la resulta cuando plaser deriva de sensa, ma judi alga cosa como "bela" ave un otra nesesa: sensa debe dona plaser par engrana nosa capasias de contempla refletante. Judis de belia es sensal, emosial, e inteletal tota a un ves. Kant ia oserva de un umana "si el dise ce vino canario es plasente, el es contente si algun otra coreti sua termas e remente el per dise en loca: Lo es plasente per me" car "Cadun ave sua propre sensa de sabori". La caso de "belia" difere de mera "plasente" car, "si el proclama ce alga cosa es bela, alora el nesesa la mesma gusta de otras; el alora judi no sola per se mesma ma per cadun, e el parla de belia como lo es un cualia de cosas".

Interpretas de belia pote a veses es oservada como posesente du consetas de valua: estetica e sofistica. Estetica es la idea filosofial de belia. Sofistica es la resulta de un prosede de educa e consensa de valuas cultural de un elite aprendeda tra esposa a cultur jeneral. Pierre Bourdieu ia esamina como la elite en sosia defini la valuas estetica como sofistica, e como grados variosa de esposa a esta valuas pote resulta en varias par clase, esperia cultural, e educa. Seguente Kant, belia es sujetal e universal: alga cosas spesifada es bela per tota. En la opina de Wladyslaw Tatarkiewicz, on ave ses fundas per la presenta de arte: belia, forma, representa, reprodui de realia, espresa artal, e inova. Ma on pote no es capas de indica esta cualias en un obra de arte.

Judis de valua estetica pare comun como envolve multe otra tipos de casos ance. Respondes como desgusta mostra ce deteta sensal es liada en modos instintal a espresas de fas e an conduis como la reflexe de nausea. Ma repulsa pote ance es aprendeda o cultural. Como [[Darwin] ia nota, si on vide un banda de sopa en la barba de un om es repulsante an si sopa mesma e barbas mesma no es repulsante. Judis estetica pote es liada a emosias, o como emosias es partal corpida en nosa reatas fisical. Per esemplo, la mervelia inspirada par un vista bela pote mostra se fisical con un cor batente rapida o un pupil dilatante. Reatas fisiolojial pote espresa o an causa la senti de mervelia inisial.

En ajunta, judis estetica pote es condisionada par cultur a un grado. A un eda, la popla pote vide un forma de arte como vea, ma alga desenios plu tarda, e los vide la mesma arte como bela. Judis de belia pote es liada a desira, an a desira sesal. Los pote es liada a judis de valua economial, political, o moral. Per esemplo, on pote judi ce un auto par Ferrari es bela car lo es desirable como un simbol de prestijia, o lo pote judi el como fea car lo sinifia consuma esedente cual ofende nosa valuas political o moral.

La filosofiste Denis Dutton ia identifia ses sinias universal en estetica umana:

    1. Espertia o virtuosia. Umanas cultiva, reconose, e amira capasias tecnical en arte.
    2. Plaser nonusosa. Persones joia arte como arte, e no demanda ce lo furni la nesesadas per vive.
    3. Stilo. Ojetos e presentas artal sasia regulas de composa cual loca los en un stilo reconosable.
    4. Critica. Persones joia la ata de judi, conose, e interprete obras de arte.
    5. Imita. Con alga esetas importante, como depinta astrata, obras de arte simili esperias de la mundo.
    6. Foca spesial. Arte es poneda a un lado de vive comun e usada como un foca dramosa de esperia.

Artistes como Thomas Hirschhorn ia indica ce on ave tro multe esetas a la categorias de Dutton. Per esemplo, la instalas par Hirschhorn mesma iniora intendente virtuosia tecnical. On pote amira un madona de la renase per razonas estetical, ma tal ojetos ia ave comun la funsionas spesifada de adora. Alga esemplos de arte, como la fonte de Duchamp, no loca la obra en un stilo reconosable. Plu, la categorias pare tro vasta: un fisiciste pote joia la mundos cual el imajina cuando el developa sua teoria. Un otra problem es ce la usa de categorias trata la ideas tradisional european de estetica e arte como universal, cuando lo oblica ce on ave multe cultures en cual ideas como estetica e an arte es nonesistente.

En la dui prima de la sentenio 20, un cambia sinifiante en teoria jeneral de estetica ia aveni cual ia atenta aplica teoria estetica entre formas variosa de arte, incluinte la artes de leteratur e la artes vidal, a lunlotra. Esta ia resulta en la aveni de un scola de critica nova, e un debate sur la falasia de intende. La demanda a la sentro es esce la intendes estetica de la artiste en crea la obra de arte, en cualce forma, debe es asosiada con la critica e evalua de la produi final, o si la obra debe es evaluada per sua propre meritas autonom de la intendes de la artiste.

En 1964, William K. Wimsatt e Monroe Beardsley ia publici un esajo nomida "La falasia de intende", en cual los sujesta ce la intende de la autor no pertine a la judi de belia de un obra de leteratur. Los sujesta ce la parolas sur la paje ia es la sola cosa cual importa. Importa sinifias de estra de la testo es nonpertinente e posible distraente.

En un otra esajo, "La falasia de afeta", Wimsatt e Beardsley ia rejeta ance a reata personal o emosial de la lejor regardante un obra de leteratur como un metodo valida de analise un testo. Ma otra teoristes, como Stanley Fish en sua esajo "Leteratur e la lejor", critica esta idea. Berys Gaut e Pisley Livingston, en sua esajo "La crea de arte", critica ance la ideas de Wimsatt e Beardsley, e dise ce la refere a intendes es esensal en fisa la interprete coreta de obras de arte, e sujesta ce on debe foca sur la prosede de crea.

En la sentenio 20, teorias de estetica ia es introduida par autores e promovores de campos diversa. La du plu bon conoseda es freudisme (o psicoanalise jeneral) e marxisme (o materialisme dialetica), ma los no ia ave un efeto grande sur la teoria de estetica jeneral, estra sua propre campos. Du otra campos ia ave alga efeto plu profonda: Sosiobiolojistes ia sujesta ce nosa sensa de belia es la resulta de evolui, e nos trova cosas como bela si los mostra, per esemplo, un mundo cual es plu bonveninte a nosa (o a nosa asendentes). Lo pare ce nos trova fases de persones cual es simetre e promedia como plu atraosa ca fases contorseda. Plu jeneral, on pote vide "belia" como la inversa de "nonserta", "perilosa", "noncoerente", "nonfamiliar", etc.

Un otra prosimi es introduida par psicolojia umaniste: Cosas es persepida como bela cuando los coraji e suporta autoreali, cuando los boni nosa comprende de la mundo, otras, e nos mesma. Lo es serta relatada a la idea ce arte e belia depende de la emosias de la oservor e la ideas de Kant.

Tags:

ArteElinica (lingua)Filosofia

🔥 Trending searches on Wiki Lingua franca nova:

SuomiSan Tomas de AquinoBiocimicaStato Islamiste de Irac e la LevanteSmilodonKobenhavnSentenio 17Joana de ArcoIerevanAmerica latinaMiamaLinguas xinesDeutx (lingua)TurismeVolapukDetroitSistem de reprodui de omesLogaritmoPaje uebStrumentos de teclasSacartveloMicaLago BalcaxSiensas naturalRio DneprAmerica SudeCanon uesteDiabete (tipo 1)OdinEletronicaNederlandHongkongSistem solalUmanBalcanesGotoMamalTsernagoraGera de TroiaXcip (lingua)GanaSudafricaOklahomaCatedral de ChartresGeoffrey ChaucerEsperantoTurcmenistanRena UnidaCarnivorPilipinasSianPaje xefUrdunLibiaAitiCanadaAntarticaGelderlandMaladia psicolojialBeogradApsideBielarusMonacoAlbert CamusMitolojia arabiLingua franca nova🡆 More