Beliz

Beliz Belize
Informa jeneral
Capital:	Belmopan
Lingua ofisial:	Engles
Dirije
Governa:	Monarcia constitual parlamental
- Xef de stato:	Charles 3
- Xef de governa:	Dean Barrow
Otras
Area:	22 966 km²
Popla:	335 188
Densia:	14.5
PIB:	US$ 2 800 milion
Mone:
Zona de ora:	-6
Numero de telefon:	+501
Interede:	.bz

Beliz (en engles Belize, en creol belizan Bileez, en espaniol Belice), nomida Onduras Brites a ante, es un pais nondependente a la costa este de America Sentral. Lo ave fronteras a norde con Mexico, a ueste e sude con Guatemala e a este con la Mar Caribe. Sua area es 290 cilometres longa e 110 cilometres larga. La site capital es Belmopan.

La area es sirca 22 966 cilometres cuadrida e la cuantia de abitores, en la anio 2007, ia es sirca 294 385 persones. Sua densia de popla es la plu basa de America Sentral. La taso de crese es de 1,87% per anio (2015), numero du de la plu altas en la rejion e un de la plu altas en la emisfera ueste.

La sivilia maia ia estende a la rejion de Beliz entre 1500 aec e 300 ec e ia flori asta 1200. Campanias de esplora european ia comensa en 1502 cuando Cristoforo Colombo ia naviga longo la Golfo Onduras. Colonias european ia comensa con la colonistes engles en 1638. Esta periodo ia es ance marcada par reclamas de la rejion par Espania e Britan asta cuando Britan ia vinse Espania en la batalia de Caio San Jorjio (1789). Lo ia deveni un colonia brites en 1840, conoseda como Onduras Brites, e un colonia de la Corona en 1862. La pais ia ateni nondepende de Rena Unida en 21 setembre 1981.

Beliz ave un sosia diversa cual es composada de multe cultures e linguas cual refleta sua istoria rica. Engles es la lingua ofisial de Beliz, en cuando creol belizan es la lingua nasional la plu parlada (32,9%), esente lingua prima de plu ca un tri de la abitores. Plu ca la dui de la popla es multilingual e espaniol es la lingua du de la plu parladas (46%). Otra linguas parlada es maia (8,9%), garifuna (3,4%) e deutx 3,3%. La pais es conoseda per sua Selebras de Setembre e sua parador de coral.

La abunda de spesies teran e maral e sua diversia de ecosistemes fa ce Beliz ave un loca xef en la Coredor Biolojial Mesoamerican. Lo es considerada como un nasion caribe e de America Sentral. Lo es un membro de la Comunia Caribe (CARICOM), la Comunia de Statos Latina e Caribe (CELAC) e la Sistem de Integra de America Sentral (SICA), esente la sola pais-membro en la tre organizas rejional. Beliz es un parte de la Comunia de Nasiones e la rea Elizabeth 2 es sua monarca e xef de stato.

La rejistra la plu temprana de la nom "Belize" apare en la jornal de la prete dominican Fray José Delgado, con data de 1677. Delgado ia rejistra la nomes de tre rios major cual el ia traversa en cuando el ia viaja a norde longo la costa caribe: Rio Soyte, Rio Xibum e Rio Balis. La nomes de esta vias navigable, cual coresponde a la Rio Sittee, la Rio Sibun e la Rio Beliz, ia es donada a Delgado par un traduor. Lo es probable ce la "Balis" de Delgado ia es vera la parola maia "belix" o "beliz" sinifiante "acua fangosa".

Alga ia sujesta ce la nom deriva de la pronunsia espaniol de la nom de la pirata scotes Peter Wallace, ci ia institui un colonia a la boca de la rio Beliz en 1683. On no ave demostra ce Wallace ia coloni esta rejion e alga eruditas ia defini esta como un mito. Istoristes e scrivores ia sujesta otra etimolojias, incluinte orijinas franses e african.

Istoria temprana

 

La sivilia maia ia emerji a minima tre milenios ante aora en la terenos basa de la Penisola Yucatan e la montanias a sude, en la rejion de lo cual es oji Mexico sude-este, Beliz, Guatemala e Onduras ueste. Multe aspetas de esta cultur persiste en la rejion an pos sirca 500 anios de domina european. Ante sirca 2500 aec, alga xasores-coliores ia coloni la area en viletas cultival; plu tarda, los ia cultiva granes como mais, favas e zucas.

Un colie de linguas e sucultures ia developa en la cultur maia. Entre sirca 2500 aec e 250 ec, la instituidas fundal de la sivilia maia ia emerji. La apico de esta sivilia ia aveni en la periodo clasica, cual ia comensa en 250 ec.

 

 

Sivilia maia

La sivilia maia ia estende tra lo cual es oji Beliz a sirca 1500 aec e ia flori ala asta sirca 900. La istoria rejistrada de la rejiones sude e media es dominada par Caracol, un sentro political urban cual ia ave cisa 140 000 persones. A norde de la Montes Maia, la sentro political la plu importante ia es Lamanai. En la eda clasica de la sivilia maia (600-1000 ec) cisa tan multe como milion persones ia abita en la rejion cual es aora Beliz.

Cuando la esplorores espaniol ia ariva en la sentenio 16, la rejion cual es aora Beliz ia inclui tre teritorios maia diferente: provinse Chetumal, cual ia inclui la rejion sirca la Baia Corozal; provinse Dzuluinicob, cual ia inclui la rejion entre la Rio Nova e la Rio Sibun, a ueste de Tipu; e un teritorio a sude controlada par la maia manche ch'ol, incluinte la rejion entre la Rio Mono e la Rio Sarstoon.

Periodo colonial temprana (1506–1862)

La concistores espaniol ia esplora la tera e ia declara lo como parte de la Impero Espaniol, ma no ia coloni lo, par causa de sua nonfurni de recursos e la tribus enemin de Yucatan.

Piratas engles ia visita nonperiodal la costa de lo cual es oji Beliz, xercante un refuja de cual los ta pote ataca barcones espaniol e talia ematoxilos de Campetxe (Haematoxylum campechianum). Esta ia furni un fisante valuosa per tinjes de vestes, e ia es un de la modos prima de oteni un negra permanente ante la ariva de tinjes artifis. La espanioles ia dona a la colonistes brites diretos per ocupa la area e taila ematoxilos par intercambia per sua aida supresante piratia.

 

La briteses ia asinia prima un supravidor sur la rejion de Beliz en 1786. Ante alora, la governa brites no ia reconose la comunia como un colonia, par teme de provoca un ataca espaniol. La pospone de la supravide par la governa ia permete ce la colonistes institui sua propre leges e formas de governa. En esta periodo, alga colonistes susedosa ia gania controla de la legeria local, conoseda como Public Meeting ("Consenta Publica"), como ance de la plu de la tera e lenio de la colonia.

Tra la sentenio 18, la espanioles ia ataca Beliz sempre cuando la gera ia eruta con Britan. La batalia de Caio San Jorjio ia es la ultima de tal lutas. Lo ia aveni en 1798 entre un flotila espaniol e un fortia de baiores e sua sclavos. De 3 a 5 setembre, la espanioles ia atenta traversa la arena de Caio Montego, ma los ia es blocida par la defendores. La atenta ultima de Espania ia aveni a 10 setembre, cuando la baiores ia repulsa la flotila espaniol en un luta corta con no vitimes de cada lado. La aniversario de la batalia ia es declarada como un festa nasional en Beliz e lo es selebrada per onora la "belizanes prima" e la defende de sua teritorio.

Como parte de la Impero Brites (1862-1981)

En la temprana de la sentenio 19, la briteses ia atenta reformi la colonistes, menasante suspende la Public Meeting si lo no ta oserva la instruis de la governa per elimina completa la sclavia. Pos un jenera de disputas, sclavia ia es abolida en la Impero Brites. Como resulta de la capasias de la sclavos per estrae mogano, la propriores en Onduras Brites ia es compensada con £53,69 per sclavo en promedia, la plu alta paiada en cualce teritorio brites.

An tal, la fini de sclavia ia fa pico per cambia la ambiente de labora per la sclavos pasada ci ia resta en sua comersias. Un serie de instituidas ia restrinje la capasia de individuas de compra tera, en un sistem de sclavia par detas.

La taliores pasada "estraspesial" de mogano o ematoxilo ia es importante en la descrives temprana de la capasias (e donce la limitas) de persones de desende african en la colonia. Car un elite peti ia controla la tera e la comersia de la colonia, sclavos pasada ia pote sola labora taliante lenio.

En 1836, pos la autonomi de America Sentral, la brites ia reclama la direto de maneja la rejion. En 1862, Britan ia declara lo como un Colonia de la Corona Brites, suordinada a Jamaica, e ia nomi lo Onduras Brites.

Como colonia, Beliz ia comensa atrae investores brites. Entre la companias brites cual ia domina la colonia en la tarda de la sentenio 19 ia es la Belize Estate and Produce Company, cual ia oteni final la dui de tota la tera poseseda privata e ia elimina sclavia. La influe de Belize Estate es partal justida par la depende de la colonia a la comersia de mogano tra la resta de la sentenio 19 e la dui prima de la sentenio 20.

La Depresa Grande de la desenio de 1930 ia colasa cuasi la economia de la colonia cuando la esije brites de lenio ia declina rapida. La efetos de nonemplea estendeda ia es malida par la siclon cual ia colpa la colonia en 1931. Persepis de la atentas de aida par la governa ia es videda como nonsufisinte e ia es malida par sua refusa de legali sindicatos o introdui un salario minima. La state economial ia boni en la Gera Mundal Du cuando multe belizanes ia entra a la fortes armada o ia aida en la gera.

Pos la gera, la economia de la colonia ia stania. La deside de Britan de desvalua la dolar belizan en 1949 ia mali la state economial e ia gida a la crea de la Comite de la Popla, cual ia esije nondepende. La seguor de la Comite de la Popla, la Partito Unida de la Popla (PUP), ia xerca reformis constitual cual ia estende la diretos de vota a tota adultes. La eleje prima su diretos de vota universal ia aveni en 1954 e ia es ganiada par la Partito Unida de la Popla, comensante un periodo de tre desenios en cual esta partito ia domina la politica de la pais. George Cadle Prince, ativiste per nondepende, ia deveni la gidor de la partito en 1956 e la xef de governa en 1961, un posto cual el ia ave con titulos diversa asta 1984.

Su un constituida nova, Britan ia dona autogoverna a Onduras Brites en 1964. A 1 junio 1973, Onduras Brites ia es ofisial renomida Beliz. Progresa a nondepende, an tal, ia es impedida par la disputa teritorial con Guatemala.

Beliz nondependente (de 1981)

Beliz ia reseta nondepende a 21 setembre 1981. Guatemala ia refusa reconose la nasion nova par causa de sua disputa con la colonia brites, reclamante Beliz per Guatemala. Sirca 1500 soldatos brites ia resta en Beliz per preveni cualce invade posible.

Con Price como gidor, la Partito Unida de la Popla ia gania tota la elejes nasional asta 1984. En acel eleje, la prima pos nondepende, la PUP ia es vinseda par la Partito Democrata Unida (PDU), de cual la gidor, Manuel Esquivel, ia sustitui per Price como ministro xef, e Price ia perde sua seja en la Casa de Representores. La PUP su Price ia reveni a potia pos elejes en 1989. En la anio seguente, la Rena Unida ia anunsia ce lo va fini sua relata militar con Beliz, e ce la Royal Air Force (la forte de aira) va es retirada en acel anio (lo ia es ala de 1980). La soldatos brites ia es retirada en 1994, ma la Rena Unida ia lasa un uni de instrui militar per aida la Forte de Defende de Beliz.

La PDU ia regania la potia en la elejes nasional de 1993, e Esquivel ia deveni ministro xef a la ves du. Pronto a pos, Esquivel ia anunsia la suspende de un trata con Guatemala de la tempo de Price, disente ce el ia fa tro multe sedes per gania reconose de Guatemala. La trata ia restrinje cisa la disputa sur la frontera entre ambos paises. La tensas en la frontera ia continua asta la comensa de la desenio de 2000, an si la paises ia coopera en otra partes.

La PUP ia fa un vinse inondante en la elejes nasional de 1998 e sua gidor, Said Musa, ia deveni ministro xef. En la eleje de 2003 la PUP ia manteni sua majoria e Musa ia continua como ministro xef. El ia promete boni la state de vive en la sude sudevelopada e nonasedable de la pais.

En 2005 on ia ave un turba causada par noncontentia con la governa de la PUP, incluinte un aumenta de impostas en la bujeta nasional. A 8 febrero 2008, Dean Barrow ia deveni ministro xef pos un vinse inondante par la PDU. Barrow e la PDU ia es reelejeda en 2012 con un majoria plu peti. Barrow ia gida la PDU a sua vinse tre en serie en novembre 2015, aumentante la cuantia de sejas de la partito de 17 a 19. An tal, el ia dise ce acel eleje va es sua ultima como gidor de la partito e la partito es preparante per eleje sua seguor.

Jeografia fisical

 

 

Beliz es un parte de America Sentral e la Caribe. Jeografial, lo es un parte de la Penisola Yucatan.

Lo borda la stato mexican Quintana Roo a norde, la departe guatemalteca Petén a ueste, e la departe guatemalteca Izabal a ueste. A este de la Mar Caribe, lo ave un parador de coral ca cual sola un otra en la mundo es plu grande. La area es 22 960 cilometres cuadrida ma la lagones longo la costa e en la interna a norde redui la area de tera a 21 400 cilometres cuadrida.

La forma de Beliz, simil a un retangulo, ave 280 cilometres de norde a sude e 100 cilometres de este a ueste. La rios Hondo e Sarstoon defini la fronteras norde e sude de la pais. La frontera ueste traversa bosces e terenos alta.

La norde de Beliz es formida par planos costal pantanosa e bosces spesa. La sude ave la Montes Maia. La apico la plu alta de Beliz es Doyle's Delight, con 1124 m.

La jeografia ru de Beliz ia atrae a la costa e a la jungla de la pais la contrabandores de drogas, ci usa la pais como un via a Mexico. En 2011, la Statos Unida ia ajunta Beliz a la lista de nasiones considerada como produores major de drogas o paises traversada par la trafica de narcoticas.

Conserva ambiental e biodiversia

Beliz ave un varia rica de viventes savaje par causa de sua situa unica entre America Norde e Sude e sua climas e abitadas diversa per plantas e animales. La cuantia basa de abitores e sua 22 970 cilometres cuadrida de tera nondistribuida fa ce lo es un abiteria ideal per plu ca 5000 spesies de plantas e sentos de spesies de animales, incluinte armadilos, serpentes e simias.

La Cockscomb Basin Wildlife Sanctuary es un reserva natural, situada en la sentro de la sude de Beliz, e instituida per proteje la bosces e basines idrografial de un area de 400 km² de la inclinadas este de la Montes Maia. La conserveria ia es fundida en 1990 como un refujeria per la jaguar e es videda par un autor como la loca prima per conserva de la jaguar en la mundo.

Plantas e animales

An si 60% de la area de tera de Beliz es covreda par bosce, alga 20% de la tera de la pais es covreda par cultiverias e colonias umana. Savana, bosce de arboretas e pantanes constitui la resta de la tera de Beliz. Ance ecosistemes importante de rizoforas apare en la pais. Como parte de la Coredor Biolojial Mesoamerican cual estende de Mexico sude a Panama, la biodiversia de Beliz (maral e teral) es rica, con plantas e animales abundante.

 

Beliz es autoriosa en proteje biodiversia e furnis natural. Seguente la World Database on Protected Areas, 37% de la area teral de Beliz ave alga forma de proteje, donante a Beliz un de la sistemes la plu grande de areas teral protejeda en America.

Sirca 13,6% de acuas teritorial de Beliz, cual conteni la Parador de Coral de Beliz, es ance protejeda. La Parador de Coral de Beliz es un Erita Mundal reconoseda par UNESCO e es la parador de coral numero du de la plu grandes en la mundo, pos la Parador de Coral Grande de Australia.

Un studia de teledeteta fada par la Centro del Agua del Trópico Húmedo para América Latina y el Caribe (CATHALAC) e NASA, colaborante con la Departe de Forestas and la Sentro de Informas de Tera de la Ministreria de Recursos Natural e la Ambiente (MRNA) de la governa de Beliz, e publicida en agosto 2010, ia revela ce bosces covre sirca 62,7% de la pais, ma ia covre 75,9% en 1980. Un studia simil par Belize Tropical Forest Studies e Conservation International ia revela tendes simil en relata con la bosces de Beliz. Ambos studias indica ce en cada anio on perde 0,6% de la surfas de bosces, cual es 100.50 km² en cada anio. Ance la studia SERVIR suportada par USAID e fada par CATHALAC, NASA e MRNA ia mostra ce la rejiones protejeda de Beliz es estrema eficas per proteje la bosces.

Car la pais ave un grado de desforesti basa e es multe covreda par bosce, Beliz ave un potensial importante per partisipa en stratejias nova como REDD (la redui de emetes par desforesti e degrada de forestas). La studia par SERVIR sur desforesti en Beliz ia es reconoseda par la Group on Earth Observations (GEO), de cual Beliz es un membro.

Jeolojia, potensial mineral e enerjia

Beliz ave alga minerales con importa economial, ma zero en cuantias sufisinte per merita mina los. Esta minerales inclui dolomita, barita (fonte de bario), bauxita (fonte de aluminio) e oro. En 1990 calcario, usada per construi ruas, ia es la sola furni mineral esplotada per e la usa interna e la esporta.

En 2006, la cultiva de petrolio descovreda en la site Spanish Lookout ia presenta problemes e defias nova per la pais.

Parador de Coral de Beliz

 

La Parador de Coral de Beliz es un serie de resifes de coral a fas de la costa de Beliz, 300 m de la costa en la norde e 40 km en la sude, entre la fronteras de la pais. La Parador de Coral de Beliz ave un longia de 300 km e es un parte de la Sistem de Parador de Coral Mesoamerican, cual ave 900 km, comensante en Cancun en la Penisola Yucatan e fininte en Onduras. Lo es un de la sistemes de coral la plu grande en la mundo.

Lo es la atrae xef per turistes, atraente cuasi la dui de la 260 000 persones ci vade a Beliz en cada anio. Lo es multe importante per la industria de pexa. En 1842 Charles Darwin ia descrive lo como "la resife la plu notable en Indias Ueste".

En 1996, UNESCO ia declara la Parador de Coral de Beliz como un Loca de Erita Mundal car lo es danable e conteni abitadas per conserva la biodiversia local.

Clima

 

Beliz ave un clima tropical con saisones umida e seca, an si la modeles de clima varia notable entre la rejiones. La temperatur varia seguente la eleva, la prosimia a la costa, e la efetos moderada de la ventas norde-este de la Caribe. Temperatures promedia en la rejiones de costa varia de 24 grados de celsius en janero asta 27 grados de celsius en julio. Temperatures es pico plu alta interna, estra en la planos alta montanial a sude. Jeneral, la saisones es marcada plu par diferes en umidia e pluve ca en temperatur.

La pluve promedia varia de 1,350 mm en la norde e ueste asta 4,500 mm en la sude. Diferes saisonal en pluve es plu grande en la norde e sentro do, entre janero e april o maio, on ave plu ca 100 mm de pluve per mense. La saison seca es plu corta en la sude, normal entre febrero e april. Un periodo min pluvosa plu corta, conoseda como little dry ("seca peti"), aveni tipal a fini de julio o agosto, pos la comensa de la saison de pluve.

Siclones ave un rol xef en la istoria de Beliz. Belize City ia es destruida a du veses par siclones, e la capital ia es moveda a Belmopan par esta causa.

 

Beliz es divideda en ses distritos:

Estas distritos es divideda en 31 sejas.

La governa local es composada de cuatro tipos de autorias local: comites de site, comites de vila, comites de vileta e comites de comunia. La du comites de site (Belize City e Belmopan) e sete comites de vila covre la popla urban de la pais, e la comites de vileta e de comunia covre la popla campanial.

Sites

La sites la plu grande es:

1. Belize City, BZ — 70,800
2. Orange Walk, OW — 17,300
3. San Ignacio, CY — 16,800
4. Belmopan, CY — 13,500
5. Dangriga, SC — 10,800
6. Corozal, CZ — 8,900
7. San Pedro, BZ — 8,500
8. Benque Viejo del Carmen, CY — 7,200
9. Punta Gorda, TO — 5,000

Beliz es un monarcia constitual parlamental. La strutur de governa es fundida sur la sistem parlamental brites, e la sistem legal es modelida sur la lege comun de England. La xef de stato es la Rea Elizabeth 2, ci ave la titulo de Rea de Beliz. La rea vive en la Rena Unida e ave un representor en Beliz, la Governor-Jeneral. La potia de esecuta parteni a la consilio, cual consela la Governor-Jeneral e es gidada par la Ministro Xef de Beliz, ci es la xef de governa. La ministros de la consilio es membros de la partito political major en parlamento.

La pais ave un legeria o Asembla Nasional con du salones: la Casa de Representores e la Senato. La 31 membros de la Casa es elejeda par la popla a cada anio sinco. La Governor-Jeneral nomi la 12 membros de la Senato, e la presidente de la Senato es elejeda par la membros.

La potia de legi es divideda entre la governa e la Parlamento de Beliz. Securis constitual inclui libria de parla, de jornalisme, de adora, de move e de asosia. La juderia es nondependente de la potia de esecuta e de la legeria.

La membros de la juderia nondependente es asiniada. La sistem judal inclui judores local grupida en la Corte de Judores, cual escuta casos min grave. La Corte Suprema (Judor Xef) escuta casos grave como asasina, e la Corte de Apela escuta a individuas condenada ci vole es descondenada. La acusadas pote, en alga casos, apela a la Corte Caribe de Justia.

Cultur political

De 1974, la sistem de partitos en Beliz es dominada par la Partito Unida de la Popla (People's United Party, sentral sinistriste) e la Partito Democrata Unida (sentral destriste), an si otra partitos peti ia partisipa en tota tipos de votas en la pasada. An si zero de esta partitos political peti ia gania un cuantia importante de sejas, sua defia ia crese tra la anios.

Relatas esterna

Beliz es un membro de la Nasiones Unida, la Comunia de Nasiones, la Organiza de Statos American, la Sistem de Integra American Sentral, la Comunia Caribe, la Mercato Comun e Economia Caribe, la Asosia de Statos Caribe, e la Corte de Justia Caribe, cual es oji la corte de apela final per Barbados, Beliz e Guiana. En 2001, la xefes de governa de la Comunia Caribe ia vota declarante ce la rejion debe labora per cambia la Comite Judal de la Consilio Informada a la Corte de Justia Caribe. Lo es en prosede de asede la tratas de CARICOM e SICA, incluinte la tratas sur mercato comun e comersia.

Beliz es un membro orijinal (1995) de la Organiza de Comersia Mundal e partisipa ativa en sua labora. La trata envolve la sugrupo nomida Foro Caribe, cual es un parte de la Grupo de statos african, caribe e pasifica. CARIFORUM es la sola parte de la ACP cual ia fini sua trata completa con la Uni European.

La Garnison de la Armada Brites en Beliz es usada per instrui sur gera en jungla, con asede a plu ca 5000 milias cuadrida de tereno.

Fortes armada

 

La Forte de Defende de Beliz servi como la armada de la pais e es encargada per proteje la nondepende de Beliz. Con la Gardacosta Nasional e la Departe de Migra, lo es un departe de la Ministreria de Defende e Migra. En 1997, la armada normal ia ave 900 soldatos, la armada de reserva 381, la forte de aira 45 e la forte maral 36, con un cuantia de 1400. En 2005, la forte maral ia deveni un parte de la Gardacosta Belizan. En 2012 la governa belizan ia spende sirca 17 milion dolares a sua fortes armada, o 1,08% de la produi interna bruta.

Pos cuando Beliz ia oteni sua nondepende en 1981, la Rena Unida ia manteni un forte preveninte (British Forces Belize) en la pais per proteje lo de un invade de Guatemala. En la desenio de 1980, esta ia inclui un batalion e No. 1417 Flight RAF de Harriers. La fortes brites xef ia abandona la pais en 1994, a tre anios pos la reconose guatemalteca de nondepende belizan, ma la Rena Unida ia manteni un presentia de instrui par la British Army Training and Support Unit Belize (BATSUB) e 25 Flight ACC asta 2011, cuando la soldatos final brites ia abandona Ladyville Barracks, estra la conselores.

Divide

La Forte de Defende de Beliz es composada de:

• tre bataliones de infantria, cada composada de tre companias
• tre companias de reserva
• un grupo de suporta
• la fortes de aira

La Departe de Polisia de Beliz ave 1200 ofisiores e 700 siviles. Lo e la Servi de Siensa Forense Nasional reporta a la Ministro de Securia Nasional.

Aviones

Complesos

• Mountain Pine Ridge Training Area – a sude de Belmopan, usada per gera en jungla par forsas belizan, brites, esuan e nederlandes
• Price Barracks – Ladyville – xeferia de la fortes de aira e base pasada de elicotor brites; nomida per la Ministro Xef prima de la pais, George Cadle Price
• Fairweather Camp – Punta Gorda Town – xeferia de la batalion du e base pasada de la militar brites
• Orange Walk Airport (Army) – Orange Walk District
• Belizario Camp – San Ignacio – base en la frontera
• Corozal Training Centre – Corozal Town
• Dangriga Training Centre – Dangriga
• Philip S. W. Goldson International Airport – base de aira xef
• Hector Silva Airstrip – base peti situada a sude de la campo de avion; lo es un campo de avion de grado du e lo ia es usada par la soldatos brites
• Punta Gorda Airport es un campo de avion de grado du
• St. George's Caye (armada)
• Holdfast Camp (armada)
• Baldy Beacons (armada)
• Rideau Camp (armada)
• Salamanca Camp (armada)
• Militia Hall — Belize City

Reclamas nativa de teras

Beliz ia suporta la Declara de Nasiones Unida sur la Diretos de Poplas Nativa en 2007 cual ia institui diretos de tera legal per poplas nativa. Otra casos de corte ia confirma esta diretos, como cuando la Corte Suprema de Beliz ia deside en 2013 manteni sua deside de 2010 cual reconose titulos costumal de tera como tera comunial per poplas nativa. Un otra tal caso es la comanda en 2015 par la Corte Caribe de Justia sur la governa belizan, cual ia dise ce la pais debe developa un rejistra de teras per clasi e eserse un governa tradisional sur teras maia. An con esta deside, Beliz ia progresa pico per suporta la diretos de teras de comunias nativa; per esemplo, en la du anios pos la deside de la Corte de Justia Caribe, la governa de Beliz no ia lansa la rejistra de teras maia, provocante ce la grupo mesma fa lo.

La segues esata de esta casos nesesa es esaminada. En 2017, Beliz luta ancora per reconose la poplas nativa e sua propre diretos. Longo un informa nasional de 50 pajes cual Beliz ia crea sur sua progresa en dirije a la Ojetos de Developa Sustable de la NU per 2030, la poplas nativa no apare en la indicadores de la pais. En fato, la grupos "creol" e "garinagu" no es incluida en la documento e "maia" e "de raza miscada" apare a sola un ves en tota la reporta.

Disputa teritorial con Guatemala

 

Tra la istoria de Beliz, Guatemala ia reclama la posese de tota o alga de la teritorio belizan. Esta reclama es refletada a veses en mapas desiniada par la governa guatemalteca, mostrante Beliz como la departe dudes-tre de Guatemala.

La reclama teritorial de Guatemala envolve sirca 53% de la teritorio de Beliz, cual inclui partes importante de cuatro distritos: Belize, Cayo, Stann Creek e Toledo. Aprosima 43% de la popla (154 949 belizanes) abita en esta teritorio.

En 2019 la disputa sur la frontera con Guatemala ia resta nonsolveda e alga controversa. La reclama guatemalteca de teritorio belizan es fundida, en parte, sur Article 7 de la Trata Engles-Guatemalteca de 1859, cual ia obliga la briteses a construi un via entre Belize City e Guatemala. A veses, la tema ia nesesa es arbitrada par la Rena Unida, la xefes de governa de la Comunia Caribe, la Organiza de Statos American, Mexico e Statos Unida. An tal, a 15 april 2018, la governa guatemalteca ia fa un referendo per determina esce la pais debe envia sua reclama teritorial a la Corte Internasional de Justia per solve la problem. Guatemaltecas ia vota ce si. Un referendo simil ia debe aveni en Belize a 10 april 2019, ma un judi de la corte ia pospone lo. La referendo ia aveni a 8 maio 2019 e 55,4% de votores ia deside envia la problem a la Corte Internasional de Justia.

 

 

Beliz ave un economia comersial privata fundida xef sur cultiva e la industria de cultiva, con ce turisme e construi ia deveni plu importante en tempo plu resente. La pais produi minerales e petrolio. En cultiva, zucar es la gran xef, esente la dui de la esportas, e la industria de la banana es la empleor la plu grande.

La governa nova fronti defias importante per stablia economial. Atas rapida per boni la colie de impostas ia es prometeda, ma un manca de progresa per controla spende risca presa la taso de intercambia. Infrastrutur resta un defia de developa economial major; Beliz ave la eletrica la plu custosa de la rejion. Comersia es importante e la asosiores comersial xef es la SUA, Mexico, la Uni European e America Sentral.

Industria interna es limitada par causa de la custa alta de labora e enerjia e un mercato interna peti. Turisme atrae la plu de investi stranjer direta, an si investi stranjer importante es trovada en enerjia, telecomunica e cultiva.

Beliz ave cuatro grupos de bancos comersial, de cual la plu grande es la Belize Bank. La otra tre es Heritage Bank, Atlantic Bank e Scotiabank. Un rede forte de sindicatos de credito ia comensa en la desenio de 1940 su la gida de Marion M. Ganey, S.J.

Beliz es situada en la costa de America Sentral. Fundida sur sua situa, lo es un loca famosa per vacanses. An tal, e ance par causa de sua situa, lo es deveninte conoseda per atrae multe asosias de trafica de drogas en America Norde. La dolar belizan es fisada a la dolar esuan con proportio 2:1. Esta atrae traficores de droga e lavores de mone ci vole usa la sistem bancal. En ajunta, Beliz ofre a nonabitores la capasia de crea contas. Par esta, la Departe de Stato de Statos Unida ia nomi Beliz un de "la paises xef en la mundo per lava de mone".

Infrastrutur industrial

La furnor de servi eletrical la plu grande es Belize Electricity Limited. 70% de lo ia es poseseda par Fortis Inc., un distribuor de furnis parteninte a un investor canadian. Fortis ia prende controla de la maneja de BEL en 1999, invitada par la governa belizan en un atenta de lejeri la problemes finansial presedente con la furnor de servis local. En ajunta a sua investi regulada en BEL, Fortis posese Belize Electric Company Limited (BECOL), un compania nonregulada de jenera idroeletrical cual opera tre complesos de jenera idroeletrical a la Rio Macal.

Turisme

 

Un combina de fatores natural – clima, la parador de coral de Beliz, plu ca 400 caios, pexa eselente, acuas secur per barci, rios per caiaci, reservas de viventes savaje como ance construerias maia – suporta la industria de turisme. Lo ave ance la sistem de cavas la plu grande de America Sentral. La custa de developa es alta, ma la governa de Beliz ia fa ce turisme es sua conserna cuasi xef de developa, pos sola la cultiva. En 2012, 917 868 turistes ia ariva (de cual 584 683 ia veni de la SUA) e los ia dona plu ca 1,3 biliones a la economia.

Demografia

On estima ce Beliz ia ave 360 346 abitores en 2017, e 408 487 en 2019. La taso de fertilia en 2009 ia es 3,6 enfantes per fem. Sua taso de nase ia es 22,9 nases/1000 (en un estima de 2018) e la taso de mori ia es 4,2/100 (estima de 2018). Un cambia etnical en sua demografia es aveninte de 1980 – la proportio de creoles/miscadas ia cambia de 58/48 a 26/53 car creoles ia move a SUA, persones de raza miscada ia ave un taso alta de nase, e multe persones ia veni de Salvador.

Etnicos

Maias

On crede ce la maias abita Beliz e la rejion de Yucatan de la milenio du aec, ma plu de la abitores maia orijinal de Beliz ia mori par causa de lutas constante entre tribus. Multe otras ia mori par maladias portada par europeanes. Oji, tre grupos maia abita la pais: la maias de Yucatan (ci ia veni de Yucatan, Mexico, fujinte de la Gera de Castes de la desenio de 1840), la mopanes (nativa de Beliz ma forsada a vade a Nicaragua par la briteses ci ia ataca sua colonias; los ia reveni a Beliz per evita es sclavida par la guatemaltecas en la sentenio 19) e la cectxi (ci ia fuji ance de sclavia en Guatemala en la sentenio 19). La grupos ultima es situada en la Distrito Toledo. La maias parla sua linguas nativa e espaniol, e los parla ance engles e creol belizan.

Creoles

Creoles (conoseda como kriols) es 21% de la popla belizan e 75% de la diaspora. Los desende de la "baiores" (propriores de sclavos) e de sclavos traeda de Africa per la esplora de forestas. Esta sclavos ia ave asendentes african orijinal de Africa sentral e ueste (ance miscitos de Nicaragua) e africanes ci ia pasa periodos en Jamaica e Bermuda. La jamaicanes e caracoles ia ariva en la tarda de la sentenio 19, ajuntante plu a esta popla ja diversa, creante esta etnico.

Creol belizan ia developa en la tempo de sclavia e lo ia es istorial parlada sola par sclavos pasada. An tal, esta etnico ia deveni un parte de la identia belizan, e, como resulta, lo es parlada par 45% de la belizanes. Esta lingua deriva de engles con sustrato de miscito e linguas african ueste e bantu variosa traeda par sclavos. Creoles es trovada en tota Beliz, ma xef en rejiones urban como Belize City, vilas e viletas costal, e la Vale de Rio Beliz.

Garifunas

La garifunas es 4,5% de la popla, e los es un misca de africanes de Africa sentral e ueste, arauaces, e caribes. An si los ia es caturada e moveda de sua propre paises, esta persones ia es nunca rejistrada como sclavos. La du teorias dominante es ce, en 1635, los ia es o survivores de du barcones ruinada o en alga modo los ia prende controla de la barcon en cual los ia veni.

Los ia es noncoreta eticetida como caribes negra. Cuando la briteses ia concista San Vinsent e la Grenadines pos la Trata de Paris en 1763, los ia es oposada par la colonistes franses e sua aliadas garifuna. La garifuna ia sede a la briteses en 1796. La briteses ia separa los ci ia pare plu african de los ci ia pare plu nativa. 5000 garifunas ia es escluida de la isola Grenadina a Baliceaux. An tal, sola 2500 ia survive la viaja de Roatan, un isola a fas de la costa de Onduras. La lingua garifuna parteni a la linguas arauac, ma lo ave parolas prestada de linguas caribe e engles.

Car Roatan ia es tro peti e nonfertil per suporta sua popla, los ia demanda a la autorias espaniol de Onduras per es permeteda a coloni la costa de la continente. La espanioles ia emplea los como soldatos e los ia estende longo la costa caribe de America Sentral. La garifunas ia coloni Seine Bight, Punta Gorda e Punta Negra (Beliz) en 1802. An tal, en Beliz, 19 novembre 1832 es la data ofisial reconoseda como "Dia de coloni garifuna" en Dangringa.

Un studia jenetical ia trova ce, en promedia, 76% de sua asendentes ia es african, 20% arauc/caribe e 4% european.

Miscadas

La miscadas es persones desendente de espanioles e maias. Los ia veni a Beliz en 1847, per fuji de la Gera de Castes, cual ia aveni cuando miles de maias ia revolta contra la stato de Yucatan e ia masacra cuasi un tri de la popla. La survivores ia fuji tra la frontera a teritorio brites.

La miscadas es en tota Beliz, ma xef en la distritos norde de Corozal e Orange Walk. Alga otra miscadas ia veni de Salvador, Guatemala, Onduras e Nicaragua. La miscadas es la etnico la plu grande en Beliz, e los constitui cuasi un dui de la popla. La sites miscada ave un plaza xef a la sentro, e la vive sosial foca a la Eglesa Catolica construida a un lado de lo.

Espaniol es la lingua xef de la plu miscadas e desendentes de espanioles, ma los parla engles e creol belizan. Par influe de esta du linguas, multe miscadas parla Kitchen Spanish. La misca de comedas latina e maia como tamales ia veni de Mexico e la tortilias de mais ia es pasada par la maias. La musica veni xef de marimba, ma los ance jua la gitar. Dansas fada en festas de vileta inclui zapateados, la mestizada, la pasodoble e multe otras.

Menonitas

La majoria de la popla menonita es composada de la menonitas rusce, desendente de deutxes, ci ia coloni la Impero Rusce en la sentenios 18 e 19. La plu de la menonitas rusce abita en colonias menonita como Spanish Lookout, Shipyard e Blue Creek. Esta menonitas parla platdeutx en sua vive dial, ma usa deutx prescriveda per leje (la Biblia) e scrive. La plu menonitas ci parla platdeutx ia veni de Mexico en la anios pos 1958 e los es trilingual con espaniol. On ave ance menonitas de la ordina vea ci parla deutx de Pennsylvania. Los ia veni de la Statos Unida e Canada en la desenio de 1960. Los vive xef en Upper Barton Creek e colonias liada. Esta menonitas ia atrae persones de otra fondos anabatiste ci ia formi un comunia nova. Los aspeta simil a la amixes de la ordina antica, ma los es diferente.

Otra grupos

La 5% restante de la popla es un misca de indianes, xineses, blancas de la Rena Unida, la Statos Unida e Canada, e multe otra grupos stranjer traeda per aida en la developa de la pais. En la desenio de 1860, un grupo grande de indianes ci ia spende periodos corta en Jamaica e veteranes de la gera interna esuan de Louisiana e otra statos sude ia institui colonias confederada en Onduras Brites e ia introdui la produi de cana de zucar en la colonia, instituinte des-un colonias en la interna.

La sentenio 20 ia vide la ariva de plu asianes de Xina, Corea Sude, India, Suria e Lubnan. Said Musa, la fio de un migror de Filastin, ia es la ministro xef de Beliz de 1998 a 2008. Migrores de Salvador, Onduras e Nicaragua e sitadanes esuan e african ia comensa vade a la pais.

Migra e cambias demografial

Par causa de la lutas en la nasiones de America Sentral, refujadas miscada de Salvador, Guatemala e Onduras ia fuji a Beliz en cuantias importante en la desenio de 1980, e los ia aumenta notable esta grupo. Esta du avenis ia cambia la demografia de la nasiones en la tredes anios la plu resente.

Linguas

Engles es la lingua ofisial de Beliz. Esta es car la pais ia es un colonia brites. Lo es la sola pais en America Sentral con engles como lingua ofisial. Ance, engles es la lingua xef de educa publica, la governa e la plu medias. Sirca la dui de la belizanes parla creol belizan e, an si engles es jeneral parlada, creoles es usada en tota situas (formal, nonformal e sosial), an en la Salon Basa. Creol es la lingua franca de la nasion.

Sirca 50% de la popla identifia se como latina e 30% parla espaniol como lingua nativa. Cuando Beliz ia es un colonia brites, espaniol ia es proibida en scola, ma oji lo es enseniada como lingua du. Kitchen Spanish es un misca de espaniol e creol belizan parlada en la sites norde como Corozal e San Pedro.

Plu ca la dui de la popla es multilingual. Esente un stato peti e multietnical, ensircada par nasiones parlante espaniol, multilingualisme es promoveda.

Beliz ave ance tre linguas maia: cectxi, mopan e maia yucateca. Sirca 16 100 persones parla garifuna e 6 900 menonitas parla platdeutx, ma un minoria de menonitas par la deutx de Pennsylvania.

Relijio

Longo la conta de abitores de 2010, 40,1% de belizanes es catolica, 31,8% es protestante (8,4 pentecostal, 5,4 adventiste, 4,7 anglican, 3,7 menonita, 3,6 batista, 2,9 metodiste, 2,8 nazareno), 1,7 Atestores de Iaue, 10,3% segue otra relijios (relijio maia, garifuna, minorias mormon, induiste, budiste, muslim, bahai, rastafari e otras) e 15,5 es nonrelijiosa.

Longo PROLADES, Beliz ia ave 64,6% catolicas, 27,8% protestantes, e 7,6% otras en 1971. Asta la fini de la desenio de 1990, Beliz ia ave un majoria catolica. Catolicas ia es 57% de la popla en 1991, ma ia cade a 49% en 2000. La cuantia de catolicas ia cade par causa de la crese de la eglesas protestante, otra relijios e persones nonrelijiosa.

En ajunta a la catolicas, on ia ave sempre un minoria grande protestante. Lo ia es traeda par la brites, deutxes e otra colonistes a la colonia brites de Onduras Brites. De la comensa, lo ia es xef anglican e menonitas. La comunia protestante de Beliz ia ave un influe pentecostal e adventiste liada a la estende de ramos evanjelial tra America Latina. La menonitas abita xef en la distritos campanial de Cayo e Orange Walk.

La eglesa ortodox elinica es presente en Santa Elena.

On ia ave 7776 bahais en 2005, o 2,5% de la popla. Esta estimas sujesta la aumenta la plu alta de la proportio de bahais en tota la paises. Esta datos sujesta ce bahais es la relijio du en Beliz, segueda par iudisme. Induisme es segueda par la plu de migrores indian, ma la sices ia es la migrores prima a Beliz, e George Singh, judor xef pasada de Beliz, ia es la fio de un migror sic. On ia ave ance un ministro sic en la governa.

Muslimes reclama ce la muslimes prima ia ariva a Beliz en la sentenio 16, traeda par sclavos african, ma no fontes suporta esta. La popla muslim de oji ia comensa en la desenio de 1920. Muslimes ia es 243 en 2000 e 577 en 2010, longo la statistica ofisial, e los es 0,16% de la popla. Un mascita esiste en la Mision Muslim de Beliz, ance conoseda como la Comunia Muslim de Beliz. Un otra mascita, Masjid Al-Falad, ia abri ofisial en Belize City en 2008.

Educa

Un cuantia de enfanterias, liseos e universias esiste en Beliz per dona educa a la studiantes (la plu es finansiada par la governa). Beliz ave des-du instituidas de educa de universia, de cual la plu importante es la Universia de Beliz, cual ia evolui de la University College of Beliz instituida en 1986. Ante esta, St John's College, instituida en 1877, ia domina la educa de universia. La Open Campus de la Universia de Indias Ueste (UWI) ave un loca en Beliz. Lo ave complesos en Barbados, Trinidad e Jamaica. La governa de Beliz contribui finansial a la UWI.

Educa en beliz es obligada entre 6 e 14 anios. En 2010, la proportio de alfabetisme ia es 79,9%, un de la plu basas en la emisfera ueste. La politica educal segue la Education Sector Strategy 2011-2016, cual ave tre ojetos per la anios veninte: boni de asede, cualia e maneja de la sistem de educa par furni educa e instrui.

Sania

Aida medical es furnida par sistemes publica e privata. La Ministreria de Sania es la parte de la governa cual es encargada per supravide la campo de sania, e es la furnor xef de servis de aida medical publica en la pais. Lo ofre cura a bon custa a la majoria de belizanes, con un foco forte a aida medical de bon cualia par programes e instituidas publica diversa.

La Karl Heusner Memorial Hospital, situada en Belize City, es la ospital de refere nasional e rejional.

Beliz ave un frecuentia alta de maladias comunicable, como maladias respiral e intestinal.

Femes

En 2013, la World Economic Forum ia judi Beliz a numero 101 de 135 paises en la Global Gender Gap Report. Lo ia es la numero tre ante la plu basas de tota la paises de America Latina e Caribe e ia ave la proportio la plu basa mas/fema en enscrives per scola prima. En 2013, la NU ia asinia a Beliz 0,435 en la Gender Inequality Index, numero 79 de 148 paises. En 2013, 48,3% de femes en Beliz ia labora, contrastada con 81,8% de omes. 13,3% de la sejas de la Asembla Nasional de Beliz es ocupada par femes.

Crimin

Beliz ave un taso relativa alta de crimines violente. La plu de violentia veni de ativia de ganges, cual inclui la trafica de drogas e persones, la proteje de vias de contrabanda de drogas, e la oteni de teritorio per trafica de drogas.

En 2018, 143 omisides ia es rejistrada en Beliz, donante a la pais un taso de omisides de 36 per 100 000 abitores, un de la plu altas en la mundo, ma plu basa ca en Onduras e Salvador, sua paises visina. La Distrito Beliz (conteninte Belize City) ia ave la plu omisides en compara con la otra distritos. En 2018, 66% de la omisides ia aveni en la Distrito Beliz. La violentia en Belize City (spesial la parte sude) es par causa de gera entre ganges.

En 2015, on ia ave 40 casos de viole reportada, 214 rubas, 742 efratas e 1027 furas.

La Departe de Polisia de Beliz ia reali multe modos protejente per diminui la cuantia de crimines. Estas inclui la ajunta de plu patrulias a "puntos calda" en la site, la oteni de plu furnis, la crea de la program Do the Right Thing for Youths at Risk (Ata Bon per Jovenes Perilida), la crea de la servi telefonal Crime Information Hotline, la crea de la Yabra Citizen Development Committee (un organiza cual aida jovenes), e multe otra stratejias nova.

La Departe de Polisia de Beliz ia comensa un campania de natal contra la criminores; como resulta, la tasos de crimin ia cade en acel mense. En 2011 la governa ia institui un sesaspara entre la ganges xef, reduinte la taso de omisides.

En Beliz, la prostitui es legal, ma la compra de servis sesal no es. Ativias liada, como la opera de un bordel, la esplota e la solisita de seso es ance nonlegal. An tal, la prostitui aveni comun, en stradas, bordeles, bares, locas de note e oteles. Orange Walk Town es conoseda par sua consentra alta de bordeles.

Beliz es un pais de orijina, traversa e destina per la omes, femes e enfantes ci es sesal traficada.

Strutur sosial

La strutur sosial de Beliz es marcada par diferes durante en distribui de ricia, potia e prestijia. Par causa de la cuantia basa de abitores e la scala intima de relatas sosial, la distantia entre ricas e povres, en cuando sinifiosa, no es tan vasta como en la sosias de la Caribe e American Sentral, como en Jamaica o Salvador. Beliz no ave la lutas de clase e raza cual on trova en otra nasiones visina.

La potia political e economial resta con la elites local. La grupo media es composada de persones de etnicos diversa. La grupo media no composa un clase sosial unida, ma conteni alga grupos de clases media e laborante, gidada par disposas comun sur educa e posibles de asende la scala sosial. Esta credes, e la praticas sosial cual los crea, aida distingui la grupo media de la majoria de belizanes.

En folclor belizan, on ave la lejendas de Lang Bobi Suzi, La Llorona, La Sucia, Tata Duende, X'tabai, Anansi, Xtabay, Sisimite e la cadejo.

La plu de la festas nasional en Beliz es festas cristian o de la Comunia de Nasiones, an si alga parteni spesial a la cultur belizan, como la Dia de Coloni Garifuna e la Dia de Eroes e Beneficores, nomida Baron Bliss Day a ante. En ajunta, la mense setembre es regardada como un tempo spesial de selebra nasional, nomida September Celebrations, con un mense completa de ativia.

En ajunta a la Dia de Nondepende e la Dia de Caio San Jorjio, belizanes selebra ance la carnaval en setembre, cual inclui avenis variosa en dias diferente, de cual la xef es la Carnival Road March, usual a la saturdi ante 10 setembre. En alga partes de Beliz, an tal, la carnaval es selebrada en la tempo tradisional ante cuaresma.

Cosini

La cosini belizan es un misca de tota la etnicos de la nasion, e sua comedas. Lo es simil a la cosinis de Mexico e America Sentral a un lado e la cosini engles e caribe a la otra, ma con inovas belizan cual ia pasa tra jeneras. Tota la comunias migrante ia ajunta sua parte, spesial la indianes e xineses.

La dieta belizan es moderna e tradisional. Lo no ave regulas. La come de matina es tipal pan, tortilias de farina, o fry jacks (pesos de pasta profonda fritada, cual on come con ceso, gaxas, ovos o sereales, e lete polvida, cafe o te). On come ance tacos preparada con tortilias de mais o farina. La come media es la come xef, usual nomida dinner. Lo varia, con ris e favas con o sin lete de coco, tamales e otras. On come ance carne fritada de gal.

En rejiones campanial, comedas es usual plu simple. La maias usa mais, favas o zuca per la plu de la comedas, e la garifunas gusta la comedas de mar, manioca (spesial pan de manioca) e vejetales. La nasion ave multe restorantes, ance de comedas rapida, cual es vendeda con custa basa.

Musica

Punta es un jenero popular de musica garifuna e ia deveni un de la plu populares en la pais. Lo es african-caribe, e on dise a veses ce lo es preparada per populari internasional como otra jeneros simil (rege, calipso, merenge).

Brukdown es un tipo de musica moderna belizan relatada con calipso. Lo ia evolui de la musica e dansa de leniores, spesial de un forma nomida buru. Ance popular entre la jovenia es rege, danshal e soca importada de Jamaica e la resta de la Indias Ueste, rap, hiphop, roc metal, e roc de la Statos Unida.

Sporte

La sportes xef en Beliz es futbal, bascetbal, volibal e siclisme, con seguores ance de atletisme, balmol, criceta, rugbi e netbal. Pexa es ance popular en rejiones costal.

La Cross-Country Cycling Classic, es considerada como un de la avenis la plu importante de sporte en Beliz. Este dia de sporte es per siclistes-amatores, ma lo ia gania popularia mundal. Lo ia comensa cuando Monrad Metzgen ia prende la idea de un vileta peti a la via Northern Highway (oji Phillip Goldson Highway). La popla de esta vileta ia traversa distantias longa sur sua bisicles per vade a la jua semanal de criceta. El ia improvisa de esta, creante un aveni sur la tereno difisil de la Western Highway, cual ia es alora mal construida.

Otra avenis de sporte importante es la Defia de la Rio Ruta Maya, un maraton de canoa per cuatro dias en marto. La corsa vade de San Ignacio a Belize City, tra un distantia de 290 cilometres.

A pascua, sitadanes de Dangringa partisipa en la torneo de pexa. La premios es donada seguente puntos combinada de grandia, spesie e cuantia. La torneo es difusada par stasiones de radio local.

La ecipo nasional de bascetbal es la sola ecipo nasional cual ia ateni vinses internasional importante. La ecipo ia gania la Torneo de Bascetbalores Mas de CARICOM en 1998, cual ia aveni en la Sentro Munisipal de Belize City, e ia partisipa en la Torneo Centrobasquet en Havana de 1999. La ecipo nasional ia fini como numero sete de oto ecipos, pos gania sola un jua.

En un repete de la jua a la Torneo de CARICOM en 2000 en Barbados, Beliz ia fini en la loca cuatro. Pico a pos, Beliz ia entra a la rejion America Sentral e ia gania la Juas de America Sentral en 2001. La ecipo no ia repete sua susede, fininte en locas 2 e 4 en la Torneo de COCABA en 2006. La ecipo ia fini en la loca du en la Torneo de COCABA en 2009 en Cancun (Mexico) do lo ia perde par 3-0 en jua de grupo. Beliz ia gania la max prima en la Torneo Centrobasquet en 2010 contra Trinidad e Tobago, ma ia perde contra Mexico en la final de COCABA. Los ia gania contra Cuba ma ia perde contra Puerto Rica e donce los no ia cuali.

Simone Bile, ganior de cuatro medalias de oro en la Juas Olimpial de Verano de 2016 en Rio, es un sitadan de e la Statos Unida e Beliz, cual el regarda como sua pais du. Biles desende de esuanes e belizanes.

Simboles nasional

La flor nasional es la orcidea negra (Prosthechea cochleata, ance nomida Encyclia cochleata). La arbor nasional es la mogano (Swietenia macrophylla), cual ia inspira la slogan Sub Umbra Floreo, cual sinifia "Su la ombra me flori". La animal nasional es la tapir, e la avia nasional es la tucana de beco-cilia.

• Radises de la lingua e cultur de Beliz