Myanmar

De Myanmar, och nach Burma oder Birma genannt an offiziell Republik vun der Unioun Myanmar (op Birmanesch: Pyidaunzu Thanmăda Myăma Nainngandaw) ass e Staat a Südostasien.

Republik vun der Unioun Myanmar Pyidaunzu Thanmăda Myăma Nainngandaw ပြည်ထောင် စုသမ္မတမြန်မာနိုင်ငံတော်
Detailer Detailer
Offiziell Sprooch:	Birmanesch
Haaptstad:	Naypyidaw
Staatsform:	Republik
• President:	Htin Kyaw
• Staatsberoderin:	Aung San Suu Kyi
Fläch:	676.578 km² (40.)
• Dovu Waasser:	3,06 %
Bevëlkerung:	51.486.253 (25.)
• Bevëlkerungsdicht:	76/km²
Onofhängegkeet:	4. Januar 1948 (vu Groussbritannien)
Nationalhymn:	Kaba Ma Kyei ("Bis zum Enn vun der Welt")
Wärung:	Kyat
Zäitzon:	UTC +6:30
Internet TLD:	.mm
Internationalen Telefonsprefix:	+95

De Myanmar ass zënter 1997 Member vun der Associatioun vu Südostasiateschen Natiounen (ASEAN) a grenzt un Indien a Bangladesch am Westen, un Thailand a Laos am Osten, an un d'Volleksrepublik China am Norden an am Nordosten. De Süden huet eng 1.930 Kilometer laang Grenz um Golf vu Bengalen an d'Andaman-Mier. Bei der Vollekszielung 2014 huet sech erausgestallt, datt d'Bevëlkerung mat 51 Milliounen Awunner vill manner héich ass wéi erwaart^,. De Myanmar huet 676.578 Quadratkilometer an ass domat ongeféier sou grouss wéi Frankräich an d'Belsch zesummen. D'Haaptstad ass zënter 2005 Naypyidaw an déi gréisst Stad a fréier Haaptstad ass Yangon (fréier Rangoon).

Zu de fréien Zivilisatiounen am Myanmar gehéieren d'Pyu Staat-Stied am ieweschte Burma an d'Mon-Kinnekräicher am ënneschte Burma. Am 9. Joerhonnert ass d'Bamar-Vollek an den ieweschten Dal vum Irrawaddy komm, an nom Etablissement vum Bagan-Kinnekräich an den 1050er Joren hu sech d'birmanesch Sprooch a Kultur an den Theravada-Buddhismus duerchgesat a si lues a lues dominant ginn. Wéinst der Invasioun vun de Mongolen ass d'Pagan-Kinnekräich zerfall an huet Plaz fir verschidden aner Staate gemaach. Wéi am 16. Joerhonnert, d'Land vun der Dynastie vun den Taungu nees vereenegt gouf, war et fir eng kuerz Zäit dat gréisst Räich an der Geschicht vum kontinentale Südostasien. Am fréien 19. Joerhonnert huet d'Konbaung-Dynastie iwwer eng Fläch regéiert, zu där de moderne Myanmar gehéiert huet an huet och kuerzzäiteg Manipur an Assam kontrolléiert. No dräi brittesch-birmanesche Kricher hunn d'Britten de Myanmar am 19. Joerhonnert besat an doraus eng brittesch Kolonie gemaach. 1948 ass de Myanmar onofhängeg ginn; fir d'éischt als demokratesch Natioun a spéider, nom Staatsstreech 1962, als Militärdiktatur.

De Gros vun der Zäit zënter der Onofhängegkeet war de Myanmar an ethnesch Konflikter verwéckelt an déi vill verschidde birmanesch ethnesch Gruppen streiden an engem vun de längste Biergerkricher op Welt. Wärend där Zäit hunn d'Vereent Natiounen an aner Organisatiounen reegelméisseg a systematesch Verstéiss géint d'Mënscherechter am Land bericht.^, 2011, no de Walen 2010, ass d'Militärjunta offiziell opgeléist ginn, an nominell ass eng zivill Regierung un d'Muecht komm. Wärend fréier Militärleaderen nach ëmmer enorm vill Muecht am Land hunn, huet d'birmanesch Arméi Schrëtt ënnerholl, fir d'Kontroll iwwer d'Regierung ze reduzéieren. Dat, zesumme mam Fräiloosse vun der Aung San Suu Kyi an anere politesche Prisonéier, huet dem Land seng Relatioune mam Ausland a säi Ruff, wat d'Mënscherechter ugeet, verbessert, an och zu enger Labberung vun den Handels- an anere Sanktioune gefouert.^, Trotzdeem gëtt d'Regierung weiderhi staark dofir kritiséiert, wéi si mat der moslemescher Rohingya-Minoritéit ëmgeet a fir hir schlecht Äntwert op reliéis Ausernanersetzungen.^,, Bei den historesche Walen 2015 krut der Aung San Suu Kyi hir Partei d'Majoritéit an den zwou Chamberen.

Am Myanmar gëtt et vill Jade an Edelsteng, Pëtrol, Naturgas an anere Mineralressourcen. 2013 hat d'Land en nominale PIB vu 56,7 Milliarden US-Dollar (oder 221,5 Milliarden US-Dollar PPP). D'Akommesdifferenz am Myanmar ass eng vun den héchsten op der Welt, well grouss Deeler vun der Wirtschaft vu Supportere vun der fréierer Militärregierung kontrolléiert ginn.^, Dem Human Development Index (HDI) 2016 no hat de Myanmar e mëttleren Niveau vu mënschlecher Entwécklung, mat dem 145. Rang vun 188 Länner.

•  
  Déi historesch Stad Bagan
•  
  Historesch Tempelen zu Mrauk U
•  
  Déi gréisst Stad Yangon
•  
  Aarbechter an engem Räisfeld
•  
  E Stroossemaart zu Yangon
•  
  Deplacéiert Membere vun der Rohingya-Minoritéit
•  
  Lahpet, e beléifte Plat
•  
  Frae vun der Kayan-Volleksgrupp
•  
  D'Grenz mat Thailand