Шаблон:Серпасыс абу
Кольчурин Василий Григорьевич |
Кольчурин Василий Григорьевич (1961) — перым коми гижысь-сатирик.
Василий Кольчурин чужӧма 1961-ӧд вося йирым тӧлысь 8-ӧд лунӧ Кудымкар районса Белоев сикт сӧвет улӧ пырысь Мечкор грездын. Медводдза классӧ велӧдчӧма Мечкорса школаын, 1972-ӧд восянь 1977-ӧд воӧдз – Отевса кӧкъямысвося школаын, 1977-ӧд восянь 1979-ӧд воӧдз – Белоевса шӧр школаын. Помалӧма Перымса канму педагогика институтлӧн филология факультетысь перым коми-роч юкӧн (1984). Нёль во уджалӧма Пятина школаын, 1988—1995-ӧд воясын – Кудымкар районса Егоровскӧй шӧр школаын. 1995-ӧд восянь журналисталӧма: гижӧма перым коми да роч кывйӧн «Парма» кытшса газетын, дасьтӧма «Коми говк» юкӧн.
Олӧ Кудымкарын.
Гижисьлӧн медводдза кывбуръясыс чужисны школаын велӧдчигӧн, кор сылы вӧлӧма 13 арӧс. Медводдза висьтсӧ — «Медбӧрья греххез» — вӧлі йӧзӧдӧма 1981-ӧд воын «По ленинскому пути» газетын. Тайӧ жӧ ним улын 2002-ӧд воын Перым-Коми кытшса небӧг лэдзанінын петӧма медводдза небӧг. Сэтчӧ пырисны неыджыд висьтъяс, эссе, кывбуръяс, шмонитаан гижӧдъяс, бывальщинаяс, кодъяс матынӧсь йӧзкостса висьталӧмъяслы.
Гижӧдъясыс петавлісны «Парма» газетын, «Бичирок», «Иньва» да «Тыра ӧшымӧс» литературно-художественнӧй чукӧръясын.
Мӧд небӧг — «Адззисьлытӧдз, старик!» (2013) — гижӧд чукӧр, кытчӧ пыртӧма коми да роч кывъя шмонитана висьтъяс, а сідзжӧ мифологическӧй персонажъяс йылысь йӧзкостса висьталӧмъяс, кодъясӧс автор мичмӧдӧма ас кывнас.
Коймӧд небӧгыс — «Эн осудит менӧ, мамок».
Унаысь пырӧдчывлӧма журналистъяслӧн кытшса, обласьтса да ставроссияса конкурсъясӧ. Вермывлӧма финн-йӧгра прессалӧн I ставроссияса конкурсын «Хранители традиций» нимпасын (2003).
Вермӧма «ЛИФФТ-2018» III-ӧд ставмирса Евразийскӧй литературнӧй конкурсын «Проза. Короткий рассказ» нимпасын (сетӧма эзысь медаль да диплом) (Сочи, 2018-ӧд вося ода-кора тӧлысь).
2013-ӧд восянь пырӧ Россияса гижысь котырӧ.
This article uses material from the Wikipedia Коми article Кольчурин Василий Григорьевич, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Мӧдтор кӧ абу индӧма, контентыскӧд позьӧ тӧдмасьны CC BY-SA 4.0 лицензия серти. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Коми (DUHOCTRUNGQUOC.VN) is an independent company and has no affiliation with Wiki Foundation.