Шаблон:Серпасыс абу
Жеребцов Любомир Николаевич | |
Чужан лун: | 1925-ӧд вося йирым тӧлысь 15-ӧд лун |
---|---|
Чужанін: | |
Кулан кад: | 1990-ӧд вося урасьӧм тӧлысь 28-ӧд лун (64 арӧс) |
Куланін: | |
Канму: | |
Мыйся уджыс: |
Жеребцов Любомир Николаевич (1925—1990) — этнограф, коми войтырлысь оласног туялысь, история наукаясса кандидат (1953), Коми АССР-са наукаын нимӧдана уджалысь (1980).
Любомир Жеребцов чужӧма 1925-ӧд вося йирым тӧлысь 15-ӧд лунӧ Усть-Сысольскын. Батьыс Н.М. Жеребцов, Рочмуса прапорщик, вӧлӧма Коми обласьтын физкультурно-спортивнӧй удж котыртысьяс лыдын. Кулӧма водз; Любомирӧс да кык чойсӧ быдтӧма мамыс, начальнӧй классъясын велӧдысь (сёрӧнджык — Драма театрса бухгалтер). Школаын велӧдчигӧн Л. Жеребцов сьӧкыда висьмылӧма туберкулёзӧн.
Помалӧма сыктывкарса 12 № школа (1943, Коми канмуса педагогика институт (1948). Рӧдвуж да ёртъяс корӧм серти медводз пыралӧма велӧдчыны физматӧ, но регыд вуджӧма история факультетӧ. IV-ӧд курса студентӧн на лаборанталӧма институтса история жырйын, лыддьӧма ичӧтджык курссаяслы важ мирса да шӧр нэмъясса историяысь лекцияяс. Институт помалӧм бӧрын водзӧ уджалӧма лаборантӧн, сэсся веськӧдлӧма Коми обкомлӧн ВКП(б) бердса партшколаын социально-экономическӧй наукаяс жырйӧн, велӧдӧма важ история.
1948-ӧд вося арнас пырӧма велӧдчыны СССР-са наукаяс академиялӧн Коми Базаса аспирантуралӧн дасьтысян курс вылӧ (1949-ӧд восянь — СССР-са наукаяс академилӧн Коми филиал), во мысти вуджӧма аспирантуралӧн медшӧр курс вылӧ. Медводз кӧсйӧма специализируйтчыны историяысь, но вӧлӧма вакансияыс сӧмын этнографияысь да археологияысь.
А. С. Сидоров вӧзйӧм серти бӧрйӧма этнография нырвизь. 1953-ӧд воын Москваын СССР-са наукаяс академиялӧн этнография институтын дорйӧма комияслӧн оланін серти диссертация (веськӧдлысь — Николай Николаевич Чебоксаров).
1961-ӧд вося урасьӧм тӧлысьӧдз вӧлӧма младшӧй научнӧй сотрудникӧн, 1972-ӧд вося урасьӧм тӧлысьӧдз — старшӧй научнӧй сотрудникӧн да этнографъяс котырӧн веськӧдлысьӧн. Кыв, литература да история институтн этнография сектор котыртӧм бӧрын — секторӧн веськӧдлысь (1988-ӧд вося рака тӧлысьӧдз). 1988—1990-ӧд воясӧ уджалӧма старшӧй научнӧй сотрудникӧн, 1990-ӧд вося урасьӧм тӧлысь помын мунӧма пенсия вылӧ.
Кулӧма 1990-ӧд вося урасьӧм тӧлысь 28-ӧд лунӧ Сыктывкарын, гуалӧма Сыктывдін районса Сёськаын.
Л.Н. Жеребцовлӧн медводдза уджыс петӧма 1955-ӧд воын, шусьӧ «О времени появления коми на верхней Мезени». Тасянь сылӧн пансьӧма коми войтырлысь этническӧй история туялӧмыс: мукӧдлаӧ овмӧдчӧм, овъяс артмӧм, этническӧй котыръяс чужӧм,орчча вотыркӧд йитӧдъяс ладмӧдӧм. Тайӧ мытшӧдъясыс босьтӧны медшӧр ин сылӧн туясян уджъясас.
Дасьтылӧма доктор ним вылӧ диссертация, но абу удитӧма дорйыны.
Гижӧма 130 сайӧ удж, на пиын некымын небӧг.
This article uses material from the Wikipedia Коми article Жеребцов Любомир Николаевич, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Мӧдтор кӧ абу индӧма, контентыскӧд позьӧ тӧдмасьны CC BY-SA 4.0 лицензия серти. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Коми (DUHOCTRUNGQUOC.VN) is an independent company and has no affiliation with Wiki Foundation.