Tombak

Vum große Aandeil vun Koffer kütt och dä Name: en de malaiische Sproch (die se en Malaysia un Indonesie kalle dun) heiß dat Koffer tembaga. Em Handel sin ungerscheedliche Zoote met eigene Name. Rudtombak hädd mieh als 90 Prozent Koffer, Goldtombak oder Meddeltombak mieh als 85 Prozent Koffer, un gääle Tombak mieh als 72 Prozent Koffer.

Blechblosinstrumente sin off us Goldmessing gemaaht. Dat es nix anderes als Goldtombak. Un de ahle Münze für 5 oder 10 Penning us de D-Mark-Zick sin us Stohl gemaat, met ene decke Schich Tombak rundheröm. Ene andere Gebruch es in de Munition vun Plemme un Knabühße. Do weet och hückzedag noch Blei verschosse, dat manchmol ene Hüll us Tombak hat.

Siliziumtombak es kei Tombak, villmieh es dat ene spezielle Zoot vun Messing. Un Wieße Tombak es övverhaup kei Messing, weil do dat Zink fählt. Et hät stattdesse Arsen dren un es ene spezielle Zoot vun Bronß. Och Talmigold, dat vür ech bellige unechte Schmuck genomme weed, nenne se off Gold-Tombak. Dat es ävver Rudguss, met Blei dren, dat se vergoldet han öm et für duselige Lück wie ech Gold ussinn ze losse.