Регион Варсинайс Суоми

Канкарыс – Турку.

'Варсинайс Суоми
'Varsinais-Suomi
Egentliga Finland''

Вужпас
Канму	Суоми
Статус	маакунта
Янсалӧм	5 район
Веськӧтлан шӧрин	Турку
Юралісь	Юхо Саво
Веськöтлан кыввез	суоми, швед
Оліссез (2011 во)	465 544 (3-ӧт места)
Оліссезлӧн тшӧкыта	43,67 морт/км²
Чужанвуж сьӧрті тэчас	финнэз, шведдэз,
Мувывтор	20 537.76 км²5-ӧт места)
Кад кытш	UTS +2
Веськöтланлöн сайт

Маакунтаын 2011' январын олісö 465 544 морт, сійöн оліссез лыд сьӧрті Варсинайc Суомиыс вöлі куимöт регион Финмуын. Отир тшöкыта сьöрті Варсинайс Суоми сулалӧ мöд местаын Финмуын.

Отирыс унажыксö финнэз, но эмöсь и шведдэз (5,7 процент) да йöзовöйöсь (3,9 процентыс).

 

 

Варсинайс Суоми куйлö Финму лунвыв-рытвылын, Саристо саридз да Похьян курья дорын. Вадӧр саридзӧт кыдз киськалӧмӧсь уна сюрс поснитик островок.

Ордчöн куйлöны сэтшöм регионнэз: Ахвенанма, Сатакунта, Пирканма, Канта Хяме да Усима.

Варсинайс Суомилöн мувывтор 20 537,76 км², ныись муыс – 10 661,61 км², мушӧрваэз – 247,53 км² да саридз ваэз – 9 628,62 км².

Регионісь медвылын чутыс, 163,9 метра Сярямяки, куйлӧ Сало ді вылісь Кикалаын . Варсинайс Суоми кӧркӧ важын вӧлі саридз увтын. Сэксянь муыс жагӧника лэбӧ, Турку архипелагын островвес ӧнӧдз быдмӧны да содӧны. А сідзту мувевдӧрыс лажмытін, а мусиныс бурачужтана. Финнэз невесь шуӧны Варсинайс Суомисӧ финскӧй карчйӧрӧн.

Мушӧрваэзісь медтӧдсаыс – Авраёки ю, кӧдалӧн ольыс важысянь мӧдкодьсьӧтӧм морт киӧн да Суомиас лыддисьӧ асланыс национальнӧй ландшафтӧн . Юыс пондӧтчӧ Орипя мусюррезсянь да котӧртӧ коммунаэз Пёвтюя, Авра, Лието да Карина пырйӧт Туркуӧ, кытӧн сія усьӧ Саристо саридзӧ.

Мӧдік юэзісь позьӧ казьтыштны Паймионъёки, Халиконъёки, Ускеланъёки, Кисконъёки-Перниӧнъёки, Мюняёки, Лаёки да Сирппуёки. Саристо саридзӧ петан юэзісь Паймионъёкилӧн медыджыт ваӧктан.

Регионісь медыджыт тыыс – Пюхяярви (Сякюлаын), кӧдалӧн кузяыс 30 км, а медпаськытіныс 8 км.

Быдмӧгсис регион понда тӧдчанажыкӧсь рассэз. Тыпуа вӧньыс локтӧ Турку архипелагӧдз да Варсинайс Суоми вадӧрӧдз. Турку одзись Руйссало остров вылын быдмӧны медпаськыт тыпуа вӧррез.

Подапӧлӧсыс сідзжӧ регионас медозыр быдӧс Суоми сьӧрті. Финмуын олісь насекомӧйезісь 80 % позьӧ пантавны Варсинайс Суомиын.

Но павкӧтлытӧм вӧр-ва регионыс пӧшти эз и коль . Юэз да важынсянь гӧрӧм муэз ӧтлаын зумыш вадӧррезкӧт лӧсьӧтӧны Варсинайс Суомиын ӧддьӧн аскодя ӧтӧр.

Регион лунвылас куйлан Турку архипелаг тэчӧм невна не 20 000 островись, кӧднаись мукӧдыс ва увтісь чурвидзан иззэз, мукӧдыс паськыт діэз. 4 км²-ся ыджытжык островвез кынымкӧ сотня. Гижӧны, діэзлӧн лыд сьӧрті Саристо саридз сулалӧ пӧ медодзза местаын мирын. Этія мувывторыс, кыдз и Авраёкилӧн ольыс - финнэзлӧн национальнӧй ландшафт. Вӧр-ваыс татӧн ӧткоста зумыш да лышкыт. Аскодяӧсь татӧн небыт ясеняиннэз да чорыт скалаэз. Медодзза Салпаусселькя нюжалӧ саридзӧ кузь лыаиннэзӧн. Медыджыт ныись Парайнен коммунаын Корппоись Юрмо. Мӧд Салапаусселькя нюжалӧ Кемиёнсари коммунаын Драгфьердісь Ӧрёӧн. Лыа діэз вылас быдмӧг да подапӧлӧс богатжыкӧсь да неӧткодьӧсь скалаэзвывся вӧр-ва сьӧрті.

 

Варсинайс Суомиын 28 коммуна (кунта), кöднаись 11 - каррез. Коммунаэз öтлаöтöмöсь вит районö:

• Вакка Суоми район
• Лойма район
• Сало район
• Турку район
• Турунма район

Варсинайс Суомиись коммунаэз:

Коми ним	Ас ним	Вужпас	Коммуна	Отир	Мувывтор км²	Отирлöн тшöкыта морт/км²	Район	Осьтöм
Турку	Turku		регионлöн шöрин	178 670	306,37	727,28	Турку район	1229
Сало	Salo		карму	55 265	2168,27	27,82	Сало район	1887
Карина	Kaarina		карму	31 062	179,49	206,61	Турку район	1869
Райсио	Raisio		карму	24 567	50,06	503,84	Турку район	1292
Нантали	Naantali		карму	18 817	688,01	60,41	Турку район	1443
Лойма	Loimaa		карму	16 883	851,93	19,91	Лойма район	1921
Усикавпунки	Uusikaupunki		карму	15 711	1932,68	31,26	Вакка Суоми	1617
Лието	Lieto		посадму	16 624	200,17	83,74	Турку район	1331
Парайнен	Parainen		карму	15 534	5548,25	17,62	Турунма район	1948
Паймио	Paimio		карму	10 482	242,24	43,98	Турку район	1997
Сомеро	Somero		карму	9256	697,68	13,86	Сало район	1867
Маску	Masku		посадму	9580	204,11	54,77	Турку район	-
Лайтила	Laitila		карму	8430	545,33	15,86	Вакка Суоми	1868
Пёвтюя	Pöytyä		посадму	8466	773,69	11,29	Лойма район	-
Мюнямяки	Mynämäki		посадму	8045	536,08	15,48	Турку район	-
Кемиёнсари	Kemiönsaari		посадму	7184	2800,87	10,46	Турунма район	2009
Руско	Rusko		посадму	5867	127,90	46,15	Турку район	-
Новсиайнен	Nousiainen		посадму	4807	199,43	24,18	Турку район	1867
Авра	Aura		посадму	3970	95,57	41,80	Лойма район	1917
Савво	Sauvo		посадму	3036	299,71	12,02	Турку район	-
Коски Тл	Koski Tl		посадму	2436	192,41	12,72	Лойма район	1869
Вехма	Vehmaa		посадму	2352	202,09	12,46	Вакка Суоми	1869
Пюхяранта	Pyhäranta		посадму	2207	291,75	15,41	Вакка Суоми	-
Марттила	Marttila		посадму	2001	195,98	10,25	Лойма район	1409
Тарвасъёки	Tarvasjoki		посадму	1964	102,41	19,26	Лойма район	1869
Тайвассало	Taivassalo		посадму	1690	217,67	12,03	Вакка Суоми	1155
Орипя	Oripää		посадму	1423	117,73	12,10	Лойма район	-
Кустави	Kustavi		посадму	888	769,88	5,34	Вакка Суоми	1874

 

Варсинайс Суомиын олӧны 460 сюрс морт гӧгӧр. Отир лыд сьӧрті сія сулалӧ Усима да Пирканма бӧрын куимӧт местаын.

Талуння Варсинайс Суоми шедіс XII векӧ шведдэз увтӧ, кӧр корольныс Эрик XI локтіс татчӧ вынӧн пыртны отирсӧ Христос вераӧ. Сія ветлӧмсяняс, кӧда вӧлі 1155 нето 1156 годӧ, лыддьӧны христоса кад Финмуын, кӧть археологгез сьӧрті, христосаэз пондӧмась овны татӧн эшӧ одзжык.

Сэкся кадӧ Финландӧн шуӧмась токӧ талуння регион Варсинайс Суоми (Подвыв Финму), сысянь и ӧння нимыс. Сёрӧнжык Финланд / Суоми нимӧн пондӧмась шуны Швед канмуись быдӧс мувывтор, кытӧн олӧмась финнэзкӧт ӧтувтыра йӧзыс.

XIII векӧ татчӧ сувтӧтӧмась медодзза кар – Турку. Джын сюрсво сія вӧлі медтӧдчана оланін Суомиын. Дзир 1809' во бӧрын, кӧр роччез кыскӧмась шӧринсӧ сэктӧдз тӧдтӧм Хельсинкиӧ, регионыс ӧштӧма одзза рольсӧ.

1831' годӧ Варсинайс Суомисӧ ӧтлаӧтӧмась Сатакунтакӧт ӧтласа Турку-Пори губерняӧ. Этія губерняыс олӧма 1997' воӧдз, кӧр Финмуын провинцияэз гырисьмӧтікӧ татчӧ лӧсьӧтӧмась Рытвыв Суоми губерня.

 

Варсинайс Суомиын медуна турист 2006 годӧ ветлісӧ то кытчӧ :

• Мумима, Нантали (281 402 вовлісь)
• Holiday Club Caribia, Турку (254 318 вовлісь)
• Туркуись вичко (196 790 вовлісь)
• Обуа Ветос & Арс Нова, Турку (195 708 вовлісь)
• Турку изкар (133 401 вовлісь)
• Seikkailupuisto, Турку (108 185 вовлісь)
• Ruisrock, Турку (65 999 вовлісь)
• Форум Маринум, Турку (55 864 вовлісь)
• Wiurilan kartano, Халикко (46 000 вовлісь)
• Luostarinmäen käsityöläismuseo, Турку (45 724 вовлісь)
• Hiidenlinna, Сомеро (Сомерниеми) (44 325 вовлісь)

• Palmunen, Lauri (toim.): Varsinais-Suomen käsikirja – Egentliga Finlands handbok. Turku: Varsinais-Suomen liitto, 2009. ISBN 952-5599-43-4. Teoksen verkkoversio (pdf) (viitattu 12.8.2009).