Ko te Hāhi Tika o Ihu (Reo Pākehā: True Jesus Church) he hāhi tū wehe i whakatūria i Peihinga, Haina i te 1917. Ināianei, kua tae ki te 1.5 miriona ngā mema i ngā whenua whā tekau. I puta mai te hāhi hei rerenga hainamana o ngā hāhi e kīa nei he hāhi petekoha. Ka puta mai aua tūmomo hāhi i ngā tau whakatuwhera o tērā rautau. Ka whakahē te hāhi ki te tikanga o te tokotoru tapu; ka piri kē ki te whakaakoranga o te Ingoa o Ihu. Nō te 1990, ka poua te hāhi i Aotearoa e ngā tāngata manene i tau mai i Taiwana, he whenua i Āhia-ki-te-Rāwhiti. Kāhore e whakanuia e ngā mema o te hāhi ngā rā o te kirihimete, o te aranga rānei, i tō rātou whakaaro he rā mohoao ērā. Nga Whakapono o te Hāhi:
- “Ko te whiwhitanga i te Wairua Tapu mā te reo kē, he kī taurangi o tō tātou whakawhiwhinga ki te Rangatiratanga o Te Atua.”
- “Ko te iriiritanga ki te wai te hākarameta hei muru i ngā hara, hei “whakaora anō i te tangata”. Ka iriiria te tangata i roto i te wai ora, wai tūturu pēnei i te awa, te moana, te puna rānei. Ka whakahaeretia te iriiritanga e tētahi Kaiiriiri kua iriiri kētia ki te wai, kua whiwhi kē i te Wairua Tapu, i runga anō i te ingoa o te Ariki Ihu Karaiti. Me rumaki katoa te kaiwhiwhi iriiritanga ki te wai, me te tupou, te anga whakararo hoki, o tōna māhunga.”
- “Mā te hakarameta o te horoi wae ka whai wāhi ai te tangata ki a Ihu Te Ariki. Hei whakamaumahara tonu rā ia me whiwhi e te tangata te aroha, te tapu, te whakaiti, te murunga hara, me te tūmautanga. Ko ia ka iriiritia ki te wai, kia horoia ōna wae ki te ingoa o Ihu Karaiti. Me whai ngā tikanga o te wā me te wāhi te horoia o ngā wae o tētahi e tōna hoa, me ō tōna hoa e ia.”
- “Ko te Kai Hapa he hakarameta hei whakanui i te matenga o Te Ariki Ihu Karaiti. Mā reira tātou ka kai ai i te kikokiko me te toto o tō tātou Ariki, ka noho pātata ai ki a Ia kia whai oranga mutungakore ai tātou, kia ara ake ai tātou i te Rā Whakamutunga. Me tū taua hakarameta nei I ngā wā ka taea. Kia kotahi te parāoa rēwena-kore, me te inu kerepi.”
- “Ko te Hāpati, te rā tuawhitu o te wiki (Rāhoroi) he Rā Tapu, nā Te Atua i whakatapu, nāna i whakapai. He mea whai i raro i te tohu aroha o Te Ariki, hei whakamaumaharatanga i te orokohanganga me te whakaoratanga a Te Atua, ā, ki te tūmanako hoki o te whakangā mutungakore o te ao kei te haere mai.”
- “Ko te kupu ko Ihu Karaiti nāna i whakakikokiko a tinana, nāna tonu i mate rīpeka kia murua ai ngā hara o te hunga mau a hara, nō te rā tuatoru, nāna hoki i whakaora ai, i whakairia ki te rangi tūhāhā. Koia anake te ōranga o te ira tangata, te kaihanga o te rangi me te whenua, te atua tupono o ngā atua katoa.”
- “Ko Te Paipera Tapu, arā Te Kawenata Tawhito me Te Kawenata Hōu, he ranga wairua nā Te Atua. Ko ia anake te pono ā-karaipiture, kei a ia anake ngā ritenga mō te ao Karaitiana.”
- “Ko te hāhi tika o Ihu i whakatūria ai e tō mātou Ariki e Ihu Karaiti mā te Wairua Tapu i te wā o te ‘ua o muri’ te whare karakia pono i whakahoungia ai i te wā āpotoro.”
- “Ma te whakapono ki a Te Atua, ka tukuna mai e ia te aroha me te whakaoranga. Me whirinaki atu nga tangata whakapono ki te wairua tapu ki te whai i te tapuranga, ki te whakahonore i a Te Atua, me te aroha ki te tangata.”
- “Ko Te Rā Whakamutunga, ko te Hokinga Tuaruatanga o Te Atua ina heke mai ia i te rangi ki te wharite, whakawā i ngā iwi katoa; ka whakawhiwhia te hunga tika ki te oranga tonutanga, ka peia te hunga kino mō ake, ake, ake.”
Hoto ki waho
This article uses material from the Wikipedia Māori article Hāhi Tika o Ihu, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Māori (DUHOCTRUNGQUOC.VN) is an independent company and has no affiliation with Wiki Foundation.