Tera: La planeta tre de la sistem solal

Lo es un de la planetas terin. Lo es unica en la sistem car lo es la sola planeta sur cual on ia confirma la presentia de la vive. Sirca de 29,2% de la surfas de la Tera es tera composada de continentes e isolas. La 70,8% restante es covreda con acua, la majoria con mares, golfos e otras corpos de acua salosa, ma ance con lagos, rios e otras de acua dulse, ce juntas formi la idrosfera. Multe de la rejiones polar de la Tera es covreda en jelo. La strato esterna de la Tera es divideda en multe placas tetonical rijida ce migra traversante la surfas tra multe miliones de anios, en cuando sua interna permane ativa con un cor interna de fero solida, un cor esterna licuida ce jenera la campo magnetal de la Tera, e un capa convetante ce move placas tetonical.

La atmosfera de la Tera es composada per la plu de nitrojen e osijen. Plu enerjia solal es resetada par rejiones tropical ca rejiones polal e redistribuida par sirculi atmosferal e maral. Gases invernerial ance fa un rol importante en la regula de temperatur de la surfas. La clima de un rejion no es determinada sola par latitude, ma ance par la altia e prosimia de mares moderante, entre otras fatores. La clima sever, como siclones tropical, tempestas, e ondas de caldia aveni en la majoria de la areas e causa un grande efeto en la vive.

La gravita de la Tera interata con otra ojetos en spasio, spesial en la Luna, ce es la unica satelite natural de la Tera. Movente sirca la Sol, la Tera ave un orbita pico nonsirculo (un elise). Sua distantia de la Sol es 149 600 000 km (= 1 UA), e lo ave un rapidia de 29,8 km/s. Lo jira en 23 oras, 56 minutos e 3,5 secondos. Acel move determina la dia e la note. Sua diametre ecuatoral es 12 756 km.

 

Formi

La plu vea materia trovada en la Sistem Solal es datada par 4.5682 Ga (bilion de anios) ante aora. Per 4.54 ± 0.04 Ga la Tera primeval ia ave formida.