აბესალომი
აბესალომი (ებრ.
אַבְשָׁלוֹם, აბშალომ, სიტყვასიტყვით: „მშვიდობის მამა“) — ძველი აღთქმის (სამოელი 13-19) მიხედვით, ისრაელის მეფე დავითის მესამე ვაჟი გესურის მეფის ქალიშვილისგან, მისი უსაყვარლესი პირმშო.
თავისი დის, თამარის გაუპატიურებისთვის მოაკვლევინა თავისი ძმა, ამნონი. ამის შემდეგ სირიაში გაიქცა, მაგრამ დაბრუნდა მამის გულმოწყალების იმედად. მიუხედავად იმისა, რომ დავითს აბესალომი ძალიან უყვარდა, ამ უკანასკნელმა მეფობა მოინდომა და მამას აუჯანყდა ხებრონში. აბესალომმა იერუსალიმი დაიკავა და აიძულა დავითი ქალაქიდან გაქცეულიყო, მაგრამ გადამწყვეტ ბრძოლაში ეფრემის ტყეში დამარცხდა. ბრძოლის ველიდან ცხენით გაქცეული აბესალომი გრძელი თმით წამოედო ხის ტოტებს. მას დავითის მხედართმთავარი იოაბი წამოეწია და ისრებით მოკლა. დავითმა ძალიან იდარდა შვილის დაღუპვა. აბესალომი დიდ თხრილში დამარხეს და ზედ ქვები დააყარეს. ტრადიციულად მის განსასვენებლად მიიჩნევენ იერუსალიმის კედრონის ხეობაში მდებარე კლდეში ნაკვეთ ძველ მონუმენტურ აკლდამას.
ლიტერატურა
- ბიბლიის ლექსიკონი: მასალები: ტ.1 და ტ.2 / შემდგენლები: ელგუჯა გიუნაშვილი, ზურაბ კალანდაძე; რედაქტორი: ზურაბ სარჯველაძე. თბ., 2000. ISBN 90140573.
This article uses material from the Wikipedia ქართული article აბესალომი, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). შინაარსი წარმოდგენილია შემდეგი ლიცენზიით (თუ სხვა არ არის მითითებული): CC BY-SA 4.0. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ქართული (DUHOCTRUNGQUOC.VN) is an independent company and has no affiliation with Wiki Foundation.