YouTube no sambua mbolokha gu'ö internet si tobali nahia wamazaewe video (gambara digital saliŵa-liŵa) nifasindro me ndröfi 2005.
Ba mbolokha gu'ö andre tola lafairö, lafaigi ba lafazaewe niha video. Oya ngawalö video nifairö ba YouTube, so mbalö film, TV ma video musik, he video raradödö (li Inggris entertainment) ba he göi video famahaö (li Inggris educational). Baero da'ö so göi video he sanau ba sadogo-dogo nifairö ero samösa niha.
Jenis usaha | Ono perusahaan |
---|---|
Jenis situs | Nahia wangirö'ö video |
Li | 54 li khala-khala |
Tefasindro | 14 Februari 2005 |
Tuhe gödo | 901 Cherry Avenue San Bruno, Kalifornia, Amerika Serikat |
Operasi ba | Sagörö ulidanö (baero negara si lö manehegö YouTube) |
Samasindro |
|
Tokoh | Susan Wojcicki (CEO) |
Sektor |
|
Produk | YouTube Premium YouTube Music YouTube TV YouTube Go |
Pendapatan | US$19,8 billion (2020) |
Ina perusahaan | Google LLC (2006–ma'ökhö) |
Bolokha gu'ö | YouTube.com |
Bosi Alexa | 2 (Global, January 2020[update]) |
Iklan | Google AdSense |
Famasura'ö töi | Tola so tola lö'ö (opsional)
|
Tefa'olo ba zato | 14 Februari 2005 |
Status | Aktif |
Lisensi konten | Samairö zangokhögö hak cipta (lisensi standar); tola göi mufili Creative Commons. |
Bahasa pemrograman | Python (core/API), C (börö CPython), C++, Java (börö platfrom Guice), Go, JavaScript (UI) |
Video nifairö ba YouTube töra oya moroi khö ndra samösa niha, bahiza so göi nifairö perusahaan media simane BBC, Vevo, Hulu, btn.
Ba mbaŵa November 2006 i'öli YouTube Google ba i'otarai da'ö tobali ia ono perusahaan Google. Fa'ebua mbölinia me i'öli Google 1,6 miliar dolar Amerika. Tuhe gödonia so ba San Bruno, Kalifornia.
YouTube andre mufasindro ba San Bruno, Kalifornia, Amerika Serikat me 2005. Datölu zangotomosi ya'ia: Chad Hurley, Steve Chen awö Jawed Karim, aefa laröi halöŵöra ba perusahaan PayPal. Ha döfi aefa tefasindro YouTube, i'öli ia Google ba mbaŵa sifelezara 2006 1,65 miliar dolar Amerika, irege tobali ono perusahaan Google.
Molo'ö nisura ngawalö media, Hurley faoma Chen zamörötaigö YouTube andre me lö lasöndra lala wamaezaewe video nihalöra ba ginötö owasa wemanga ba apartemen Chen ba San Francisco ba mböröta döfi 2005. Awöra, Karim, lö si möi ba gowasa andre ba lö itema wa no irai alua gowasa andrö. Bahiza iŵa'ö Chen wa tohare ide YouTube aefa gowasa wemanga andrö si tobali börö tohare ba gowuloa da'ö ba hulö manandraŵa ia ba iŵa'ö, lö irai alua gowuloa da'ö, ba iŵa'ö Chen wa söndra wangehaogö YouTube tohare me aefa gowasa wemanga andrö.
Tebörögö YouTube faoma sambua perusahaan teknologi nilaso faoma foko 11,5 juta dolar Amerika Serikat moroi khö Sequoia Capital i'otarai Nov 2005 irugi Apr 2006. Gödo si föföna sibai so yaŵa sambua restoran Jepang faoma restoran pizza ba San Mateo, Kalifornia Töi nahia nifotöi domain youtube.com
tefa'olo me 14/2/2005.
Video si föföna sibai mufairö ba YouTube ya'ia "Me at the zoo". Bakha ba video da'a oroma Jawed Karim, samösa ba gotalua zamasindro YouTube, si so ba kabu gurifö San Diego. Video da'a lafairö me 24/4/2005 ba irugi ma'ökhö (26/2/2022) no lafaigi ia niha 222 juta kali.
Versi fanandraigö (to'ölö latötöi ia beta) YouTube tefaehagö ba Mei 2005, önö waŵa fatua lö tefasindro resmi YouTube ba Nov 2005. Ba Yul 2006 töra wa'atedou wangoguna'ö niha mbolokha gu'ö andre, irege molo'ö gangombakhata perusahaan, töra 65.000 video nifairö niha ero ma'ökhö ba töra 100 juta zi möi wamaigi video ba YouTube. Molo'ö data riset pasar ni'owuloi comScore.com, No tobali YouTube sohönagö video ba gu'ö fondrege ebua ba Amerika Serikat, irege farahu khönia 43 persen mbolo pasar ba töra 14 miliar video nifaigi niha ba mbaŵa silima 2010. Molo'ö YouTube ero menit tefairö video fa'anaunia fefu 60 jam ba tölu ni'o'öfa video andrö tohare moroi baero Amerika Serikat. Ero waŵa so 800 juta wangondrasi unik ba YouTube. Molo'ö fangerai, ba ndröfi 2007 i'oguna'ö nahia wangirö'ö video YouTube si fagölö ba wa'ebua nahia fefu nösi internet ba ndröfi 2000. Molo'ö Alexa, sangera-ngerai mbosi mbolokha gu'ö ba internet, ba ndröfi 2010 YouTube no tobali bolokha gu'ö nomoro tölu fondrege asese la'ondrasi niha aefa Google ba nomero sara ba Facebook ba nomoro dua. Ba mbaŵa si'önö 2008, sambua zinura ba majalah Forbes mogölöi tödö wa sinöndra YouTube me 2008 arakhagö 200 juta dolar AS moroi ba wama'ema iklan. Ba ndröfi 2012 lahorigö ginötöra ya'ira si möi ba YouTube ba wamaigi video töra ambö 15 menit ero ma'ökhö, ambö moroi ba 4-5 jam nihorigö niha ba Amerika Serikat ba wamaigi TV.
Me Yuni 2006 falulu halöŵö YouTube khö NBC ba wamawa iklan. Ba Nov 2008 lahalö wahasara dödö YouTube, Metro-Goldwyn-Mayer, Lions Gate Entertainment, awö CBS ba wamairö film ba episode televisi safönu fa'anau yaŵa ba YouTube, inönö nahia iklan khö ndra samaigi moroi ba AS nibe'e töi "Shows". Lafalua da'a ba wamalalaŵa khö mbolokha gu'ö simane Hulu, si no mangirö'ö video moroi ba NBC, Fox (Fox Broadcasting Company) faoma Disney (Walt Disney Studios Motion Pictures). Ba mbaŵa sifelezara 2009 ibörögö YouTube wangoroma'ö "Shows" khö ndra samaigi moroi ba Britania Raya ba so mato 4.000 ngawua acara safönu fa'anau moroi khö 60 bisnis si fao. Ba mbaŵa sisara 2010, ifaehagö ba zato YouTube lala ba wosanu film, ba hiza ba mböröta andre ha te'a'asogö ia ba AS, Kanada ba Britania Raya. So töra 6.000 film si tola lasanu.
Me Mar 2010 ibörögö YouTube wangoroma'ö ösi si lö mu'öli (li Indonesia gratis) fao ba da'ö 60 wamaisa kriket ba India. Molo'ö YouTube acara andre no fangoroma'ö acara olahraga fondrege ebua ba internet si föföna sibai si gratis.
Me 31 Maret 2010 ifa'olo YouTube desain mbolokha si bohou ba wame ena'ö aoha wamaigi ya'ia ba ena'ö itugu ara lahorigö ginötöra niha ba mbolokha Youtube. Iŵa'ö Manajer Produk Google Shiva Rajaraman: "Moguna mangawuli ma'ifu furi ba mangehaogö fefu hadia ia." Me Mei 2010 i'ombakha'ö YouTube wa i'oroma'ö töra dua miliar video ero ma'ökhö, arakhagö dua kali wa'oya zamaigi acara ba ginötö nifotöi prime time ba zi tölu TV fondrege ebua ba Amerika Serikat. Me Mei 2011, itutunö YouTube wa töra tölu miliar zangondrasi YouTube ero ma'ökhö. Me Yanuari 2012, iŵa'ö YouTube fa'oya zangondrasi andrö no monönö tobali öfa miliar ero ma'ökhö.
Ba Oktober 2010, iröi Hurley halöŵönia tobali CEO YouTube, tobali ia penasehat perusahaan ba Salar Kamangar tobali CEO.
Me April 2011, iŵa'ö James Zern, samösa teknisi program YouTube, wa 30 persen video si so YouTube no tobali fangali zi 99 persen zangondrasi mbolokha gu'ö andre. Eluahania ha 30 persen video si so ba YouTube nifaigi arakhagö fefu zangondrasi YouTube.
Ba mbaŵa si felezara 2011, media sosial Google+ adölö tefakhai ba YouTube faoma fuka gu'ö Chrome, irege tola lafaigi niha video-video YouTube ba Google+. Ba mbaŵa si felendrua 2011 tefa'olo ba zato khala-khala si bohou YouTube. Anösöla video mufataro ba dalu nga'örö Golayama, simane wama'anö duria ba mbolokha media sosial. I'anema'ö göi te'oroma'ö versi si bohou logo YouTube si so lumö-lumö soyo sabölö ogömi. Da'a wamohouni desain si föföna sibai i'otarai Oktober 2006.
Iada'e ba no tola ta'alui gofu hadia manö zi fakhai ba nono Niha yaŵa ba YouTube. Na ta'alui "Nias" ba tesöndra oya sibai ngawalö video, he nihaogö Nono Niha ba he göi niha si tenga Ono Niha.
Gofu heza so niha iada'e, he ba kota ba he ba mbanu-banua misa, asala tefakhai ira ba internet ba tola lafairö gofu hadia manö video nihalöra ba mbanua misa. Ba börö me no ato niha sangehaogö video nifairö ba YouTube (asese latötöi ira YouTuber) moroi ba Danö Niha, tola sa'ae tafaigi hadia manö zalua ba Danö Niha yaŵa ba YouTube.
This article uses material from the Wikipedia Li Niha article YouTube, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tersedia di bawah CC BY-SA 4.0 kecuali dinyatakan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Li Niha (DUHOCTRUNGQUOC.VN) is an independent company and has no affiliation with Wiki Foundation.