Waldimar Pelser: Suid-Afrikaans joernalis

Pelser het in 1996 aan die Paul Roos Gimnasium op Stellenbosch gematrikuleer. In 1999 behaal hy die graad B.A. Regte aan die Universiteit Stellenbosch met regte, filosofie en politieke wetenskap as hoofvakke, en in 2001 B.Phil. Joernalistiek aan dieselfde instelling. Daarna behaal hy in 2002 die graad M.Phil in Joernalistiek aan die Universiteit Stellenbosch en in 2004 'n M.Phil. in ontwikkelingstudies aan die Universiteit van Oxford, waar hy met ’n Rhodes-beurs studeer het.

Sy eerste aanstelling was as verslaggewer by Die Burger in Kaapstad (Januarie 2001 tot Junie 2002), waartydens hy onder meer Suid-Kaapse korrespondent was in George. Van 2004 tot 2007 was hy ’n senior verslaggewer by die Johannesburgse dagblad Beeld. In 2007 gaan werk hy in Media24 se kantoor in Lagos, Nigerië, as Wes-Afrika-korrespondent en bly daar tot in 2008. Sy volgende aanstelling was as nuusredakteur by Beeld in Johannesburg, waar hy vertoef van 2009 tot 2011. In die loop van 2011 word hy redakteur van die kortstondige nuustydskrif NuusNow/NewsNow. Kort voor dié tydskrif se sluiting word hy by Rapport aangestel as senior adjunkredakteur. Hy het Bokkie Gerber in 2013 as redakteur opgevolg. Hy is die aanbieder van die politieke program KN Verslag In Gesprek op kykNET, waarna hy in 2022 aangestel is as die Besturende Direkteur van kykNET.

• (en) Who’s Who Southern Africa Geargiveer 17 Augustus 2016 op Wayback Machine. URL besoek op 12 Mei 2016.

• Waldimar Pelser op LitNet
• Waldimar Pelser op Twitter
• Waldimar Pelser op Instagram
• Insig op YouTube