葡萄牙文: 印歐語系羅曼語族嘅語種，講喺以葡萄牙、巴西為核心嘅葡文世界

遍佈四個大洲嘅九個葡文國家組成咗葡萄牙文國家共同體，佢哋有共同嘅文化同歷史。共同體推廣葡文文化，政治外交上甚至教育、科技、健康等等領域都有合作。喺2005年嘅一次會議中，佢哋宣佈以5月5號為葡萄牙文文化日（葡文：Dia da Cultura Lusófona）。

西班牙加利西亞嘅官方語言加利西亞文同葡萄牙文非常之相似，基本上可以互相理解，有人認為係同一隻語言，都有人認為係兩隻好接近嘅語言。而葡文同西班牙文就冇辦法完全互相理解。

響澳門特別行政區，有大概2%人口識講葡萄牙話，同時佢亦係澳門嘅官方語言之一。

土生葡文係一隻澳門嘅混合語，主要以葡文為基礎，有大量嘅馬拉話、粵語、英文等語言嘅借詞。喺澳門嘅歷史超過300年。由於澳門教育教授標準葡文、粵語同英文，忽視土生葡文，而家使用者已經剩返唔夠100人。佢同標準葡文有一定差異，比較難互相理解。

由於使用範圍遍佈全世界，所以都有好多本身唔係講葡文嘅國家都喺國內提供葡文教育，畀國民可以更容易接觸世界，尤其係喺南美巴西附近同一啲非洲國家。

葡萄牙文同其他羅曼語言一樣，有文法性別。例句：

A	casa	é	linda.
指定冠詞	名詞（陰性）	動詞	形容詞
嗰（間）	屋	係	靚嘅

O	carro	é	lindo.
指定冠詞	名詞（陽性）	動詞	形容詞
嗰（架）	車	係	靚嘅

—根據葡文嘅文法規則，指定冠詞同形容詞都要喺性別上同隻名詞一致。上便兩句例句，喺指定冠詞上一句用咗陰性嘅 A 一句用咗陽性嘅 O，而喺形容詞上就係一句用咗陰性嘅 linda 一句用咗陽性嘅 lindo（兩隻字詞都係形容詞指靚，分別在於兩隻字詞性別唔同）—兩句都係做到指定冠詞同形容詞都喺性別上夾返隻名詞。

• 西班牙文

  葡萄牙文係楔位文，同語言有關，你可以編輯爾版充實內容。