Danii

Danijan Kunigahuz
Kongeriget Danmark
Flag;	Valdkundznam;
Pälidn	Kopenhagen
Eläjiden lugu (2018)	5,809,502 ristitud
Pind	43,094 km²
Kel'	danijan
Valdkundan pämez'	Frederik X
Päministr	Mette Frederiksen
Religii	hristanuskond, ateizm
Valüt	Danijan kron (DKK)
Internet-domen	.dk
Telefonkod	+45
Aigvö	tal'vel UTC+1,; kezal UTC+2

Vspäi 1973 Danii om EÜ:n ühtnijan. Om PAKO:n ühteks alusenpanijoišpäi. Sen pälidn da kaikiš suremb lidn om Kopenhagen.

Nece om vaiše kontinentaližele Danijale pühätadud kirjutuz. Danijal om kaks' avtonomijad avaroidenke oiktusidenke, no penenke ristitištonke: Grenland i Fareran Sared.

Istorii

Vn 1949 sulakun 4. päiväspäi Danii om PAKO:n ühtnii.

Valdkundan ezmäine Konstitucii (Konstitucine Akt, dan.: Danmarks Riges Grundlov) oli olmas vspäi 1849. Jäl'gmäine videnz' lugul Konstitucii om vahvištadud vl 1953. Se om väges vn 1972 vilukun penidenke vajehtusidenke, tehtas niid kaikuččen uden monarhan tulendas.

Geografijan andmused

Danii om mavaldkundröunoiš Saksanmanke kuivudedme suves (piduz — 68 km). Randanpird om 7314 km. Norvegii sijadase pohjoižpoles, Ročinma om päivnouzmpoles.

Kunigahuz sijadase Jutlandan pol'sarel da 443 nimitadud saril sen sires, päivnouzmpoles. Reljef om vezo, äi tazangištoid. Valdkundan kaikiš korktemb čokkoim om Mollehoi-sija, 170 m valdmeren pindan päl. Kaikiš madalamb čokkoim om Lammefjord, 7 m alemba valdmeren tazopindad. Kaikiš znamasine jogi om Gudano.

Danijan klimat om ven, mererandaline, lämän tal'venke, kauktan kezanke, sel'ktatomidenke voz'aigoidenke. Uhokun lämuz om 0..+1 C°, heinkun — +15..+17 C°. Paneb sadegid 712 millimetrad vodes.

Londuseližed pävarad oma kivivoi, londuseline gaz, kivihil', kala; toižed varad — keitandsol, mouckivi, kived, gravii, letked.

Politine sistem

Ohjandusen form om konstitucine monarhii. Se om unitarine valdkund.

Vspäi 2024 valdkundan pämez' om Frederik X-kunigaz. Hän paneb päministrad (dan.: Danmarks statsminister) da toižid ministrid radsijha parlamentan nevondan mödhe, voib pästta parlamentad radmaspäi. Kunigaz om armijan päkäsknik. Edeline valdkundan pämez' om Margrete II-kunigaznaine, ohjasti 52 vot, pučihe valdištmespäi andmaha tobmut ičeze vanhale poigale.

Parlament om üks'kodine suim — fol'keting (dan.: Folketinget, «rahvahan suim»), mülütab 179 ühtnijad, niiden keskes kaks' ühtnijad kaikuččes avtonomijaspäi — Grenlandaspäi da Fareran Sarišpäi. Valičendad parlamentha oleldas kerdan nelläs vodes.

Parlamentan ühtnijoiden järgenduseližed valičendad oliba vn 2019 5. päiväl kezakud. Nügüdläine päministr om Mette Frederiksen vs 2019 kezakun 29. päiväspäi.

Administrativiž-territorialine jagand

Kacu kirjutuz: Danijan administrativiž-territorialine jagand.

Vspäi 2007 Danijan Kunigahuz jagase videks agjaks (regionaks). Sen ližaks, Erthol'men-sarišt om kaičendministrusen ohjandusen al, se ei mülü nimiččehe agjaha. Agjad alajagasoiš 98 municipalitetaks — lidnad (voidas alajagadas lidnümbrikoikš — dan.: Bydel) da kommunad (dan.: Kommune).

Eläjad

Danijas elädas danijalaižed. Vl 2014 valdkundan eläjiden lugu oli 5 655 750 ristitud. Kaikiš suremb ristitišt om nügüd'.

Rahvahad (2018): danijalaižed (sidä kesken Grenlandan eläjad i fareralaižed) — 86,3%, turkad — 1,1%, toižed rahvahad — 12,6% (surembad gruppad oma pol'šanmalaižed, sirijalaižed, saksalaižed, irakalaižed i romanijalaižed).

Uskondan mödhe (2019): lüteranad-evangelistad (oficialine religii) — 74,7%, islamanuskojad — 5,5%, toižed uskojad, religijatomad i märhapanendata — 19,8%.

Danijan sured lidnad (enamba 100 tuh. ristituid vl 2006, surembaspäi penembha): Orhus, Odense, Ol'borg. Lidnalaižiden pala om 88,1% (2020).

Ižanduz

Vl 2012 Danijan päeksport oli mašiništ (sidä kesken elektromašiništ), zelläd, kivivoi, liha, kala, maidproduktad.

Homaičendad

Irdkosketused

Danijan Kunigahusen oficialine sait (denmark.dk). (angl.) (ven.) (saks.) (fr.) (isp.) (port.) (kit.) (arab.)
Danijan Statistikan radnikoičend (dst.dk). (dan.) (angl.)

Danii Vikiaitas

	Evropan valdkundad
	Evropan valdkundad Alamad \| Albanii \| Andorr \| Armenii¹ \| Azerbaidžan¹ \| Avstrii \| Bel'gii \| Bolgarii \| Bosnii da Gercegovin \| Čehanma \| Danii \| Estinma \| Francii \| Grekanma \| Gruzii¹ \| Horvatii \| Irlandii \| Islandii \| Ispanii \| Italii \| Kazahstan¹ \| Kipr¹ \| Latvii \| Lihtenštein \| Litvanma \| Lüksemburg \| Mad'jaranma \| Mal't \| Moldov \| Monako \| Mustmägi \| Norvegii \| Pohjoižmakedonii \| Pol'šanma \| Portugalii \| Ročinma \| Romanii \| San Marino \| Saksanma \| Serbii \| Slovakii \| Slovenii \| Suomenma \| Sur' Britanii \| Šveicarii \| Turkanma¹ \| Ukrain \| Vatikan \| Vaugedvenäma \| Venäma¹
	¹ Om Azijas mugažo.

This article uses material from the Wikipedia Vepsän article Danii, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Südäimišt voib kacta CC BY-SA 4.0, ku ei ole ozutadud nimidä tošt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Vepsän (DUHOCTRUNGQUOC.VN) is an independent company and has no affiliation with Wiki Foundation.