Sernjany: Wjes w Budyskim wokrjesu, gmejnski dźěl Ralbic-Róžanta

Hač do lěta 1974 běchu Sernjany samostatna gmejna z wjesnym dźělom Hrańca (wot 1957), po tym dźěl Róžeńčanskeje gmejny.

Sernjany
Zerna

DEC
gmejna:	Ralbicy-Róžant
zagmejnowanje:	1974 (do Róžanta)
wobydlerstwo:	211 (31. decembra 2023)
wysokosć:	147 metrow n.m.hł.
51.28111111111114.237777777778147 Koordinaty: 51° 16′ 52″ S, 14° 14′ 16″ W
póstowe čisło:	01920
předwólba:	035796
Stołp z lěta 1790 wuchodnje Sernjan
wikidata: Sernjany (Q160597)

 

Sernjany leža we wysokosći 147 metrow nad mórskej hładźinu na lěwym brjoze Klóšterskeje wody w serbskich Delanach. Susodne wjeski su Nowoslicy na sewjerowuchodźe, Hrańca na juhu a Róžant na sewjerozapadźe.

Po sydlišćowej formje jedna so wo rozšěrjeny kulowc. Prěnje historiske naspomnjenje jako Czscherna pochadźa urbarija krajneho bohotstwa Hornjeje Łužicy z lěta 1419. Po Arnošće Muce wotwodźuje so wjesne mjeno wot sornow, prawdźepodobniša je pak hladajo na prěnju dokumentowanu formu wotwodźenka wot ćernjow. Ležownostne knjejstwo porno susodnym wsam klóšter njewukonješe, ale hižo 1570 naspomnjene ryćerkubło we wsy samej. Cyrkwinsce słušachu Sernjany do wutworjenja Ralbičanskeje wosady w lěće 1716 do Chrósćic.

Dnja 4. julija 1787 zniči wulki woheń nimale cyłu wjesku a tež knježi dwór ze wšěmi pódlanskimi twarjenjemi, młyn a kowarnju. Při dalšim wohnju wotpali 24. awgusta 1884 šěsć statokow.

W Druhej swětowej wójnje padny 12 Sernjanskich muži. Sernjany same běchu kaž susodne wsy w poslednich dnjach wójny wot ćežkeho wojowanja potrjechene.

Nazymu 1981 bu něhdyši Sernjanski hród zwottorhany.

Wobydlerstwo

W lěće 1884 měješe wjes po Mukowej statistice 160 wobydlerjow, kiž běchu bjez wuwzaća Serbja. Arnošt Černik zwěsći 1956 serbski podźěl wobydlerstwa wot 98 %.

• Róža Domašcyna (* 1951) – lyrikarka a spisowaćelka, rodźena w Sernjanach

 

• Pawoł Rota: Sernjany – serbska wjes w Hornjej Łužicy. W Rozhledźe 7/8 1993, str. 253–260
• Józef Mauder: 1419–2019. 600 lět Sernjany. W Serbskej protyce 2019, str. 81–86