歐拔·愛因斯坦: 德國猶太裔物理學家，相對論嘅創立人

童年到大學

愛因斯坦喺德國烏爾姆市出世，一年後成家人搬咗去慕尼黑。佢屋企都係猶太人，但係冇入猶太教。佢爸爸本來賣床褥，後來開電器舖。

五歲嗰年，佢爸爸送咗個指南針畀佢，佢就發現有啲睇唔到嘅嘢牽引住枝針。後來愛因斯坦話嗰次嘅經驗係佢一生中最有啟發性。雖然佢識砌啲機械模型嚟玩，但係讀書讀得好慢。可能係因為學習障礙病，又或者只係因為怕醜，又或者係因為佢個腦結構特殊。最新嘅理論話愛因斯坦應該係患咗亞氏保加症（Asperger's Syndrome），係自閉症嘅一種。因為當時呢個病未畀人發現，佢父母重以為佢係低能。

愛因斯坦話自己之所以諗得出相對論，正係因為細個時學嘢慢，遲過其他小朋友開始思索時空，到嗰陣思想已經比較成熟。

因為成功發現光電效應，愛因斯坦獲得1921年諾貝爾物理學獎。

後來佢又寫咗好多有關時空，物質嘅理論。不過，因為當時嘅人睇唔明佢嘅理論，導致佢無法得到應有嘅尊重。

佢嘅理論，喺佢死後50年，先有人開始明白少少。但至今，重有好多都睇唔明佢寫乜。不過，最大唔同嘅係，人已經尊重佢，而唔係當佢癲佬。

 

佢第一任老婆係米列娃，兩人係大學同學。1902年，大女莉莎出世，但米列娃並冇帶莉莎返嚟柏林見愛因斯坦，所以冇人知莉莎去咗邊。根據愛因斯坦響一年之後寫畀米列娃嘅信入面，呢次最後一次提起莉莎，之後就唔見愛因斯坦提起佢，令人懷疑莉莎可能畀人收養或者夭折咗。

1903年尾，愛因斯坦正式同米列娃結婚，先後生咗兩個仔，大仔叫漢斯，細仔叫愛德華。但係佢同米列娃過得並唔開心，愛因斯坦曾經同初戀瑪莉寫信，話自己受到「只有男人先感受到嘅不快樂」。之後米列娃帶兩個仔搬去蘇黎世，而愛因斯坦就留響柏林。

1919年，愛因斯坦正式同米列娃離婚。同年6月，愛因斯坦同遠房親戚艾莎結婚，兩個人有一個契女瑪格。後嚟為咗唔畀納粹德國打，佢哋1933年搬咗去普林斯頓。兩年之後，艾莎同時有心臟病同埋腎病，一病不起，最終響1936年死咗。之後經契女瑪格介紹，愛因斯坦識咗瑪嘉她（Margarita Konenkova），之後仲同佢拍拖。

二仔愛德華1930年嗰陣因為長期研究精神分析而導致思覺失調，長年需要阿媽，最終響1965年死咗。而大仔漢斯就去咗美國，後嚟做咗一個水利工程師，仲係美國水利工程學嘅權威之一。漢斯有三個仔，分別係大仔巴克納、二仔克勞斯同埋三仔大衛，而後嚟漢斯契咗個女依芙蓮（Evelyn Einsten）。但係響呢四個仔女入面，就淨係得巴克納同依芙蓮可以成年。