Eswatini

Kingdom of Eswatini, (si)Swati: Umbuso weSwatini, frejas bis 2018 Swasiland mid an s (z) zwengs en (isi)Zulu, is a vo Land umschlossna Stoot in n sidlinga Afrika. Ar grenzt mid Mosambik af n Noadoustn u mid Sidafrika af n Noadn, Westn u Siḏn zamm. Mid ned amol 200 km Noad-Sid- u 130 km Oust-West-Asdeanung is Eswatini oins vo dea kloawinzingann Lenda z Afrika; u zant dan han es Klima u d Topographie, es Weda u d Geḡatn, recht vaschiḏn, u dastreckn se von n köjlln u beagnatn Houchland af s hoissa u trickata Tejffland.

D Bvelkaring vo umma 1,2 milljona Leitn han umma 84 % (ema)Swati, wou d Swati-Sprouch, eihoimisch siSwati, ren un umma 10 % (isi)Zulu-Sprecha, wos min (si)Swati za d Nguni-Sprouchn ghejad. Es modeana Kinereich vo de (ema)Swati hod da Ngwane III i da Mitt von n 18. Jh. gschaffn. Es Land u de (ema)Swati nenna se nou en Kine Mswati II, da wou in 19. Jh. es Land daweitat u vaoint houd; d heintinga Grenzn han 1881 zmidst in n Dabeitn vo Afrika zong woan. Nou en Zwoitn Burn-Krejḡ is s Kinereich min Nama Swasiland 1903 a britischs Protektorat woan u houd en 6. Settemma 1968 d Unohangekait daglengt. En April 2018 is da Nama amtle umgnennt woan vo Kingdom of Swaziland af Kingdom of Eswatini, ba den wou Eswatini gwissamaassn d Entsprechung vo Swasiland auf (si)Swati is.

Es Land is faktisch a absoluta Monarchi u wiad seit 1986 von n Kine Mswati III reḡiad. Es Untahaus (House of Assembly) u da Senat wean olle fimf Jouana, zletzt 2018, gwelt. D heintinga Vafassing is 2005 õgnumma woan. Wichtinga nazionala Dareigniss oda Festt han da Umhlanga-Tanz in n August/Settemma u da Incwala-Tanz in n Dezemma/Jenna.

Eswatini is a hintnou hatschats Land, wou klassifiziad wiad wej a Wiatschaft vo gringane Mittl-Eikumma. Fia Eswatini wej a Mitglid vo da Zollunion von n Sidlinga Afrika (SACU) un en Gmoisaman Moakt von n Estlinga u Sidlinga Afrika (COMESA) is da gressta Gscheftsportna Sidafrika. Zwengs da Stabilitet is aa d Währung vo Eswatini, da Lilangeni, õn n sidafrikanischn Rand buntn. D grejsstn iwasejatn Gscheftsportna han dej Vaoinigtn Stootn u d Eiropejsche Union. D mejran Stelln han in n landwiatschaftling un in n produziratn Sektor. Eswatini is a Mitglid vo da Antwicklingsgmoischaft von n Sidlinga Afrika (SADC), da Afrikanischn Union, en Commonwealth of Nations u de Vaointn Naziona.

A von n Gsund steckn vill Leit durtn i koinn gouṯn Fell niad. HIV u, in an gringan Umfang, TB han schwar umatum. Ma schetzt, umma 26% vo de Vulljahratnan han HIV-positiv. 2019 hod Eswatini mid duachschnittle umma 60 Jouana en 12. Plotz vo de gringstn Lemsdawoatunga vo da Welt eignumma. Dej Bvelkaring is aa vo destweng recht jung, mid an Medianolta vo 21,7 Jouana.

•  
  A Koatn vo 1896.
•  
  A Reljeffkoatn.
•  
  Nu a Reljeffkoatn vo Eswatini.
•  
  D Flußtela i da Region.
•  
  A Satelintbiltl.
•  
  Dej durtata Landschaft.
•  
  Exportproduktt vo Eswatini.
•  
  D Zentrolbank z Mbabane.
•  
  Da Kine Mswati III.
•  
  A Strouhittn a tradizionella.
•  
  A Zuckafabrik z Eswatini.
•  
  Ban Umhlanga-Fest.
•  
  A Fluß in n Mlilwane-Natuaschutzpark.
•  
  Felsnmolarein.
•  
  Tradizionelle Stoff.
•  
  Da Mantenga-Wossafoll.
•  
  I de Beag i da Gnejchtn von n Oat Piggs Peak.