Fiji Ahmadiyya Anjuman Ishaat-I-Islam

Ahmadiyya ke dharmik movement hae jiske 19th century ke end me Mirza Ghulam Ahmad (1835-1908) ke teaching follow kare waala log banain rahaa. Fiji me pahila Mulim preacher logan Ahmadiyya rahin aur ii log ke agwaai me Fiji Muslim League ke sruwaat bhais rahaa. Kuchh din baad me Fiji ke majority Sunni logan League se nikaal diin jiske kaaran uu logan ke a dusra sanstha suruu kare ke parraa.

1926 me Fiji ke Muslim logan ek national sanstha, Fiji Muslim League, ke banae rahin, jisme khaas haanth Janab A. G. Sahu Khan ke rahaa. Uu time Fiji me Arya Samaj kaafi taagatwar rahaa aur duusra dharam ke log se bahas kare maangat rahaa. Kahe ke Fiji me koi etna parrha likha Muslim nai rahaa jon ki aapan aur duusre ke dharam ke baare me jaane, Fiji Muslim League India se koi laae ke kosis karis aur ek Ahmadiyya, Maulana Mirza Muzaffar beg Sateh, tiin saal ke contract me, 1933 me, Fiji aais. Uske Fiji aae ke baad League me split hoe gae aur Ahmadiyya logan ke League se nikal dewa gais aur Toorak Mosque jaae se bhi rika gais.

3 October 1934 me Ahmadiyya Anjuman Ishaat-I-Islam ke Fiji me ek dharmic sanstha ke rup me register karaa gais rahaa. Uske pahila pardhan, Muhammed Twahir Khan, pahila mantri, A. G. Sahu Khan, pahila treasurer, G.N. Dean rahaa. Pahila committee ke aur member rahin M. E. Khan (Nadi), Ramzan Khan (Nadi), Maulvi Abdul Karim (Nausori), Mehboob Khan (Nadroga).

1940s me Fiji ke Muslim log ii tae karin ki uu logan ke ek saathe hoe ke kaam kare ke chaahi jisse ke uu logan ke haq khatir aur achchaa se larrai karaa jaawe sake. Iske khatir Muslim Asociation of Fiji ke banawa gais rahaa aur duuno Muslim sanstha ek hoe ke aapan political haq ke maang karin lekin 1966 me Anjuman ke fir se revive karaa gais.

• Paigham-E-Haqq: January - March, 1974 Archived 2010-10-19 at the Wayback Machine