Soiagh Er Ard-Whaiyl Ny Steatyn Unnaneysit, 2021

V'ad geearree Trump y reayll 'sy phooar liorish lhiettrimys y chur er co-whaiyl y Chohionnal dy choontey ny voteyn voish y Cholleish Reihyssagh dy yannoo barriaght yn Eaghtyrane-reiht, Joe Biden, formoil. Cha row yn soiagh rahoil ayns lhiettal teishtys ny h-eiyrtyssyn reihyssagh. Rere bing reihyssagh y Thie, ren ronsaghey yn taghyrt, she mullagh plan shiaght ayrnyn liorish Trump v'ayn dy cheau yn reihys harrish.

Voish baare gys bun as voish clee dys jesh:

• Ny riftanyn tammylt beg lurg y vrishey stiagh
• Croghyn croghti er 6 Jerrey Geuree
• Y chied vrishey stiagh 'syn Ard-whaiyl ec 2:11
• Jake Angeli, y "QAnon Shaman", ayns Shannad ny Steatyn Unnaneysit car y soiagh. Hooar eh 41 vee ayns pryssoon kyndagh rish e chommeeys 'sy toiagh.

36 ooryn lurg y taghyrt, hooar 5 sleih baase: va un pheiagh lhiggit liorish Poleenyn yn Ard-whaiyl; hooar peiagh elley baase voish anlught druggey, as hooar troor elley baase rere cooishyn najooragh, goaill stiagh poleen Shymmey dooinney va guintit, goaill stiagh 174 poleenyn. Hooar kiare poleenyn ren freggyrt rish y toiagh baase rere hene-varroo roish shiaght meeghyn. Roish Jerrey Souree yn vlein 2022, va costys ny jeeillyn ny smoo na $2.7 millioonyn.

Gerrymit liorish Trump dys jantys haink thousaneyn dy chooidjeyderyn echey ry-cheilley ayns Washington, D.C., er 5 Jerrey Geuree as 6 Jerrey Geuree son dy hassoo lesh e aggyrtys foalsey dy row reihys 2020 "goit liorish Deynlaghteyryn bunneydagh daanit jeh'n skian chlee" as dy harey er y Lhiass Eaghtyrane Mike Pence as er y Chohionnal dy yiooldaghey barriaght Biden. Goaill toshiaght ec munlaa er 6 Jerrey Geuree, ec aachruinnaght "Save America" ec the Ellipse, ren Trump loayrtys raad ren eh aaloayrt aggyrtyssyn foalsey bentyn rish meereiltyssyn reihyssagh as dooyrt eh, "Mannagh nee shiu caggey lesh nyn greeaghyn, cha vees çheer eu." Ren thousaneyn dauesyn v'ayn, fir jeu lesh gunnaghyn, shooyl dys yn Ard-whaiyl, ren ren keeadyn jeu brishey stiagh trooid yn-linnaghyn ny poleenyn tra va'n Cohionnal goaill toshiaght rish coontey ny voteyn reihyssagh. Va toshee ny possanyn kearnagh Proud Boys as Oath Keepers coontit mastey toshee ny rouanee, as ren ad cochialg d'ymmydey yn raghlid dy chur stiagh ayns livrey-ys sheeoil y phooar.

Hie ny smoo na 2,000 rouanee stiagh 'sy troggalys, as ren ram jeu jeeyl er as spooiley ayrnyn jeh'n troggalys, goaill stiagh oikyn loayreyder roie yn Thie Nancy Pelosi as olteynyn elley yn Chohionnal. Chammah's shen, ren rouanee soiagher offishearyn Pholeenyn yn Ard-whaiyl as er naighteyryn, as ren ad eiyrtys shirrey leigh-hoyrtee dy ghoaill cappee orroo as dy yannoo aggair daue. Va crogh troggit çheu heear voish yn Ard-whaiyl, as ren fir jeh ny rouanee caayney "Hang Mike Pence" ("Crogh Mike Pence" 'sy Ghaelg) erreish da ren eh jiooldaghey aggyrtyssyn foalsey liorish Trump as sleih elley dy row yn lhiass eaghtyrane jargal eiyrtyssyn y reihys y cheau harrish.

Choud's va shickyrys y thie brisht, ren Poleenyn yn Ard-whaiyl cur magh sleih as chur ad y daa hamyr jeh'n Chohionnal fo ghlass chammah as shiartanse dy hieyn çheusthie jeh Ard-troggalys yn Ard-whaiyl. Ren ny rouanee cummaltys er shamyr ollym ny Steatyn Unnaneysit choud's ren offishearyn jeeaney-leigh conastagh coadey laare hreigit y Thie. Va bleaystanyn piobey feddynit ec kione-cherrooyn Ving Gheynlagh Ashoonagh as Ving Phobblaghtagh Ashoonagh, as va bleaystanyn pedryl feddynit ayns gleashtan faggys da'n Ard-whaiyl.

Ga dy row eh yeearrit er, yiooldee Trump geamey er y Ghardey Ashoonagh dy chionaghey ny riftanyn. Ny s'anmey 'syn 'astyr, ayns feeshan Twitter, ren eh aaloayrt e aggyrtys dy row yn reihys "molteyragh", as dooyrt eh rish e chooidjeyderyn dy "gholl dy valley dy sheeoil". Va'n Ard-whiayl seyrit voish rouanee roish çheet yn 'astyr meanagh, as ghow ad toshiaght reesht lesh coontey ny voteyn reihyssagh as va'n coontey shen jeant roish ny h-ooryn leah jeh'n 7oo jeh mee Yerrey Geuree. Ren Pence fogrey magh dy row yn varriaght ec yn Eaghtyrane-reiht Biden as y Lhiass Eaghtyrane-reiht Kamala Harris. Fo broo liorish e choonseil hirveishagh, aggyrtys arraghey, as ram ireeyn ass, chur Trump ny s'anmey rish livrey-ys oardagh pooar ayns raaitys fockley er y çhellveeish.

Shiaghtin lurg y toiagh, ren Thie ny h-Ynnydee cassid er Trump kyndagh rish greesaght irree magh, yn ynrican eaghtyrane er ny Steatyn Unnaneysit as cassid jeant er daa cheayrt. Ayns Toshiaght Arree, lurg ren Trump faagail yn oik, ren y Shannad votal 57–43 ayns foayr deyrey, red chur rish e heyrey. Hass Pobblaghtee 'sy Çhannad noi billey chrooys commishoon seyr daa-pharteeagh dy ronsaghey yn soiagh. Myr shen, ren y Thie lowal rish bing reiht lesh shiaght Deynlaghteyryn as pir dy Phobblaghtee urree dy ronsaghey ny taghyrtyn. Ren y ving nuy quaaltyssyn theayagh bentyn rish y toiagh er y çhellveeish ayns 2022, ren ad votal er son symney screeuee y chur da Trump, as fy-yerrey, chur ad coyrle da'n Rheynn Cairys (DOJ) cooish leigh y chur er Trump. Er 1 Luanistyn 2023, lurg ronsaghey pleadeilagh er lheh, va cassid kiare kerryn jeant er Trump.

Ta ny smoo na 1,200 deiney as cassid jeant orroo lesh kimmeeyssyn conastagh kianglt rish y toiagh. Roish Luanistyn 2023, ren 632 fendeilagh pleadeil kyndagh choud's va 110 fendeilee deyrit ec cooishyn leigh; ta 586 fendeilee er ny ve deyrit roish Jerrey Souree 2023. Va kuse vooar jeh commee 'sy toiagh kianglt rish possanyn anveanagh y skian sheer-yesh ny gleashaghtyn co-chialgagh, goaill stiagh Oath Keepers, Proud Boys, as Three Percenters. Va shiartanse dy cho-chialgeyryn deyrit er co-chialg kialgagh, goaill stiagh olteynyn Oath Keepers as Proud Boys; va'n briwnys s'odjey currit da oltey ny Proud Boys Enrique Tarrio, hooar 22 vlein ayns pryssoon.