Tupãsy Ka'akupe

Upe peve oguata Paraguái retãyguakuéra oparupigua, ohechauka hag̃ua ijerovia. Pápa Francisco, oho jave Paraguáipe, ojapo Ka'akupe tupãogui peteĩ vasílika, opa rire pe ñembo'e guasu ojejapóva ára 11 jasypokõi 2015 jave, upéicha Paraguáipe oĩ mokõi vasílika.

Ary 1912 jave ojejapo Tupãsy Ka'akupe ra'angápe guarã peteĩ mba'yru itatĩgui, ogueraha hag̃ua hi'ári pe ta'anga, upéva niko karai Félix Granda rembiapo, ko ára peve ojeipuru oñemomba'évo ko ta'anga.

Oikójekoraka’e Tovatĩme peteĩ ñande ypykue hérava Hose, ojapóva opaichagua ta’ãnga yvyrágui. Rasa jeko ikatupyry upe mba’épe. Ndaiporivoi hasaha. Oñemombe'u Franciscano-kuera, oikóva upépe, omongaraihague chupe ha upehaguére Hose ojeroviaitereiha Hesukirito ha Tupãsýre.

Peteĩ ára Hose osẽ oheka yvyra oikotevẽtava hembiaporã. Oguata jave ka’aguýre, oñandúsapy’a hyapúva ijerére… nimbora’e Guaikurukuéra, ndaha’éiva hesegua, ohecha hikuái Hosépe ha oñemboja hese mbeguekatu kirirĩme, ojukaségui ichupe. Hose oñandúvo chupekuéra ndaje tuichaiterei oñemondýi ha oñepyrũ oñani ka’aguýre. Peichahágui ojuhu hapépe peteĩ yvyra kakuaa ha upéva kupépe jeko oñemi ha oñepyrũ oñembo’e Tupãsýme. He’i chupe: “Néina che Sy Guasu, chepytyvõmina ha asẽramo ko’águi tekovére ajapóta ne ra’ãnga kóva ko yvyra kakuaágui”.

Upe jave ndaje Guaikurukuéra ohasa ijyke rupi ha jeko ndohechái ha noñandúi hikuái Hosépe. Uperire Hose osẽ yvyra kupégui ha ome’ẽ aguyje Tupãsýme; oho hógape ha oñepyrũ hembiapo ohechakuaávo Tupãsy ñepytyvõ. Hérape ojapo mokõi ta'ãnga; peteĩ tuichavéva, ohejava’ekue Tovatĩme; ha ambue michĩvéva ojeguerahava’ekue Ka’akupépe ha ha’éva upe oñemomorãva ha oñemomba’eguasuvéva.

•   Wiki Commons oguereko ta'ãnga Tupãsy Ka'akupe reheguaCommons.