Jey'urã Oporomonga'úva

Ñemonga'u niko mba'eguasu avano'õ rekóre hetaite tetãme. Tetãnguéra oguereko apoukapy ha léi ambuéva hekome'ẽva jey'urã oporomonga'úva apopy, ñemu, ha jey'u. Oĩ tetã ombotoveite umi mba'e, hákatu jey'urã oporomonga'úva hekopegua niko haimete opa Yvy pehẽnguéme.

Alkoo hína peteĩ pohã oporomboguejýva, sa'i oje'úrõ oporombovy'ami, oporopy'aguapymi, ha oipytyvõ tapichakuéra oñomoirũ porãve hag̃ua. Heta oje'úrõ, oporomonga'u vai, oporomonge, oporombotavy, térã ikatu oporojuka. Hetaite ára oje'úrõ, ojehecha oĩ alkoo jeporuvai ha ñemonga'u vai. Alkoo hína peteĩ umi pohã ombovy'ávagui ojeporuvéva Yvýpe, amo 33% opa yvypóragui ho'u jey'urã oporomonga'úva. Ary 2015-pe, Tesãi Arapygua Atyguasu (OMS) he'i Paraguái niko upe tetã oje'uvéva jey'urã oporomonga'úva irundyha Latinoamérika-pe. Jey'urã oporomonga'úva oñemohenda mbohapýre upéicha: umi kaguyjúi, kaguy opaichagua, ha umi jey'urã mondykymbyre—alkoo umi jey'urã orekóva niko amo 3% ha 50% mbytépe.

Heta ñehesa'ỹijo ojuhu mba'etuja ohechauka yvypóra oipuru mba'e haguino ojapo hag̃ua jey'urã oporomonga'úva amo 12.000 ary ko'ãga mboyve. Oĩ mymbanguéra ho'u alkoo avei, ikatúramo ho'u, ha ohasa vai ho'uitérõ, yvypóraicha, hákatu yvypóra añónte ikatu ojapo jey'urã oporomonga'úva oipotaháicha.

•   Wiki Commons oguereko ta'ãnga Jey'urã oporomonga'úva reheguaCommons.