Wikipédja

Vèrsyon-yan di diféran lanng ka itilizé menm lojisyèl di piblikasyon, MediaWiki, é gen menm laparans, men li ganyen tchèk varyasyon annan yé kontni, yé èstrigtir ké yé modalité pou lédisyon-an épi pou jésyon-an.

Lansiklopédi-a épi so lanvironnman sa ébèrjé asou Lentèrnèt grémési sèrvò-ya ki finansé pa Wiki Foundation, lòrganizasyon ké lòbjègtif ki pa likratif anmériken ki dépozitèr di lanmark Wikipédia.

Lansiklopédi sa an lib agsé, an lègtir kou an markaj, a pou di ki nenpòrt ki moun pouvé, lò i k'alé asou sit-a, modifyé près totalité-a di artik-ya ki pibliyé anba lisans CC-BY-SA 3.0. An ògtòb 2017, Wikipédja sa senkyenm sit ki pli frékanté annan monn-an, é ka konstitchwé pli gran ké pli popilèr di ouvraj-ya di référans jénéral di Lentèrnèt. An févriyé 2014, i té gen mondjalman près 500 milyon di vizitò chak mwè épi an mè 2014, 22 milyon di kont pou éditò, don pli di 73 000 sa konsidéré kou agtif.

Istorikman, annglé-a té prensipal lanng itilizé, anvan ki roun miltitid di sit ouvri annan ròt lanng (283 lanng an 2016). Wikipédja an annglé toujou konsèrvé sa enpòrtans roulativ : nonm di artik ka élvé sokò jouk pli di 5 milyon.