香港,全名係中華人民共和國香港特別行政區,係歸中國管嗰一隻特別行政區,佢位嘚亞洲嗰南滴子,珠江口嗰東邊,由香港島、九龍半島、新界內陸地區,跟到262隻島構成。佢嗰北邊係廣東嗰深圳市,南邊係廣東嗰珠海市萬山群島。佢跟澳門蠻攏嗰,箇兩隻地方佮拕喊做「港澳地區」。
香港特別行政區嗰建立係揸得中國跟英國簽訂嗰《中英聯合聲明》。秦朝以後香港就係中國領土,一直到19世紀清朝中葉,佢拕割或租得英國。1997年7月1號英國統治結束對香港,拿主權交得中華人民共和國。中方答應實行一國兩制,並且50年內不會變,箇就係所謂嗰「港人治港、高度自治」。
第二次世界大戰後,香港嗰經濟跟社會迅速發展。身為「亞洲四小龍」之一,香港係全世界最富裕、經濟最發達跟生活水準最高的地區之一。香港係亞洲重要嗰金融、服務跟航運中心,佢嗰廉潔嗰政府、良好嗰治安、自由嗰經濟體系跟完善嗰法制讓佢世界聞名。
香港嗰人類活動歷史有五六千年箇久。秦朝以後,基本上劃歸廣東地方管。1842年鴉片戰爭以後,香港分幾次拕割或租得英國。中日戰爭嗰時候,香港拕日本佔領。戰後中華民國政府想要回香港,但中英冇話成。一直到中華人民共和國時期,香港變成中國内地唯一嗰物資轉運中心。1984年12月19號,中英達成協定,英國決定到1997年7月1號拿香港還把中國。主權移交後嗰箇幾年,香港接連受到亞洲金融危機、禽流感、SARS嗰滴子打擊,政治方面也有滴子變故。2004年以後,香港經濟開始好轉。
香港面積攏共有2,755.03平方公里,土地有1,103.97平方公里,主要分成香港島、九龍半島、新界三塊地方。
到2005年,香港總共有693萬多人,箇也讓香港成為世界上人口最密嗰地方之一,每平方公里平均有6420隻人。
香港總嗰GDP係1兆4722億9100萬港幣,世界排嘚35名。人均GDP 有21萬4710港幣,世界排嘚26名。
香港箇下實行「港人治港、高度自治」嗰政策,跟内地嗰政治制度完全不搭界。
香港嗰電影、流行音樂跟中餐等到全世界都有蠻大嗰影響力。
This article uses material from the Wikipedia 贛語 article 香港, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 除非另寫了,不然頁面內容都以 CC BY-SA 4.0 嗰條款授權。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 贛語 (DUHOCTRUNGQUOC.VN) is an independent company and has no affiliation with Wiki Foundation.