Tatayna

tayna nu mauzipay

tatayna sa, mitudu' tu tayna a tademaw, misawantan tu tama a tademaw. tayna a kamu sa namakay mauzipay a kakuniza, musaungay i tademaw. i mauzipay a kakuniza sa, izaw ku cucu atu puki atu zuma nu taynaay a kidu atu labu'. tatayna nu Sakizaya sa, kya kamu sa, izikuzay a "na" sa, u "ina", iayaway a "tatay" sa, u "tata" saan, u tatenga' kuizaway. u tatenga'ay a kamu sa, u mala ina, u tatenga'ay a ina sa u "tatayna" sanany. anu balaki tu ku tatayna, inayi' ku wawa, caay ku tatenga'ay a tatayna sasukamu nu babalaki.

 

salungan nu Sakizaya

u salungan a tatayna sa, tabaki ku cucu, tabaki ku kuku', tabaki ku udu, mahiza sa, matineng mulecuh tu wawa, matineng malukay. mahiniay a tatayna sa, salungan. iayaw a niyazu', u ina ku mitelung tu luma',mikuwan tu luma'. u lala', u wawa, u luma', u kalisiw atu zuma, u ni ina mikuwan. anu palaacawa ku tatama atu tatayna, kya tatama atayza tatayna a luma' mueneng. musabilil a wina, siwa a bulad, palecuh tu wawa, sisa, u wawa atu ina yadah ku masasiketay. yu zuma a binawlan(社會), iayaw a demiad, musabilil atu sibulad ku tatayna, sisa, caay kaala ku kakalimaan a kinli, manay, caay katalakaw ku eneng(地位) nu binawlan. ayza a demiad, masumad tu ku azih nu mita, talakaw tu atudi' ku eneng nu tatayna, yuzasa, caayhenay kataneng.

salungan nu zuma a binacadan

 

 

u salungan a tatayna nu Ya-co sanay, bangcal ku ihekalay, bangcal ku bihid, salengacay ku banges, tabaki ku mata, talakaw ku cihek, adidi ku laway, inayi' ku lumeniay a banges atu tungaw, ahemi' ku banges. caay kalecad ku O-co, u salungan a tatayna nu O-co, u bangcalay a kidu, sakakumced ku kidu, talakaw ku kidu, sikunizaay a zateng, madimel ku kidu atu balucu', kadihi tu mamidang, malemu tu kakaydihan, taneng misimaw atu midiput tu wawa niza.

 

zayhan apuyu' ku tatayna tu tatama

sausian ku tabakiay a tademaw, talakaw ku tatama, apuyu' ku tatayna, izay mihiza saw? kya mahiza ku ipabaway namisanga' tu tademaw, caay kalucek ku ipabaway. caay nu ipabaway a mungangaw. kya lalekelan mahiza, hicica ku talakaw nu kidu, nay u ukak miketun. caay kalecad u 發育 nu tatama atu tatayna. tatayna maka i 18-20 a mihca sa, caaytu kabalaki. u tatama sa, katukuh 25 a mihca mahezek tu balaki. matenes ku balaki a mihcaan ku tatama, sisa, talalaw ku tatama, apuyu' ku tatayna.

Wikipayke paybalucu'ay pulungamin a cudad-女性

Taywan Sakizaya putiput(台灣撒奇萊雅族協會) i Youtube-dadipasan nakulitan ni Yiyang Sayun-婦女祭典舞歌

nasulitan nay paybalucu'ay a kawaw nu subana'ay a pu 2018-1, nasulitan ni Tuku Sayun