Anjel

En la relijios abramica, anjeles es comun imajida como esentes sielal e bonvolente ci ata como ajentes intercambiante entre Dio o sielo e umania. Otra roles de anjeles inclui proteje e gida umanas e esecuta la taxes de Dio. En esta relijios, anjeles es comun organida en ierarcias, an si acel ierarcias pote difere entre setos en cada relijio. Alga angeles ave nomes o titulos spesifada, como Gabriel o Michael. La parola "anjel" ia es ance estendeda a ideas variosa de spiritos o divines de otra tradisiones relijiosa. La studia teolojial de anjeles es nomida "anjolojia". Anjeles cual ia es espulsada de sielo es refereda como "anjeles cadeda" o an "demones". La prima forsa de malia en esta relijios es un anjele cadeda nomida "Satan".

En artes bela, anjeles es tipal depintada como simil en forma como umanas, ma con belia estraordina, comun con alias simil a los de avias, areolas supra sua testas, e ensircada par lus. La jenero de anjeles es tipal no indicada, an si los ia es orijinal videda como mas. Comensante en la sentenio 19, los ia es videda plu como femas, o omes femin.

Orijinal entre la popla iudi de edas antica ia persepi anjeles como semidivin, dios suordinada, simil a la multe dios en la mitolojias de la levante. Ma con la aveni de monoteisme plu clar, esta esentes - tipal nomida "fios de Dio" - ia es "basida" a anjeles, comprendeda como esentes creada par la un Dio, ma nonmortal e donce superior a umanas. Esta conseta de anjeles es plu bon comprendeda como constrastada con demones.

Cristianes erita la idea iudi de anjeles. Orijinal, anjeles ia es videda como mesajores de Dio. Plu tarde, cristianes comensa dona personalia a los, seguente la nomes iudi los trovada en la Biblio. Final, la imaje de anjeles ia deveni plu definada en teolojia en la artes.

La Atesta Nova inclui multe interatas e conversas entre anjeles e umanas. Per esemplo, un anjel informa Zecaria ce el ta ave un fio, ci ta deveni Juan la Batiste, la anjel Gabriel visita Maria per predise la nase de Jesus, e anjeles selebra la nase a sua nase.

En edas plu resente, la idea ce anjeles es persones bon ci ia mori, cual servi dio, e la idea de un revive de corpos ia deveni plu un parte de cristianisme ofisial o credes de setos plu tradisional. Posible la plu de cristianes crede ce un person ta es serta "reviveda", ma como un anjel, imajinada con alias, robas longa e blanca, e areolas de oro.

Crede en anjeles es fundal en islam. La Curan es la fonte xef de la conseta muslim de anjeles. Alga de los, como Gabriel e Michael, es notada par nom en la Curan. En islam, como en iudisme e cristianisme, anjeles es comun representada en formas umana, combinada con imajes supranatural, como alias, grandia enorme, o portante articles sielal.