Robin Thicke

Hy is de soan fan 'e Kanadeeske akteur Alan Thicke en de Amerikaanske sjongster en aktrise Gloria Loring, dy't faninoar skieden doe't er sân jier wie.

Robin Thicke
sjonger en/of muzikant
Robin Thicke in Hollywood California - July 2019
persoanlike bysûnderheden
echte namme	Robin Thicke
nasjonaliteit	Amerikaansk
berne	10 maart 1977
berteplak	Los Angeles (Kalifornje)
etnisiteit	Angelsaksysk Amerikaansk Angelsaksysk Kanadeesk
wurkpaad
sjenre	soul, R&B, pop
sjongtaal	Ingelsk
grutste hit(s)	Blurred Lines
jierren aktyf	1994 – no
offisjele webside
www.robinthicke.com

Thicke krong de muzykyndustry binnen doe't er noch mar in tsiener wie, en die dat sûnder de stipe fan syn heit (dy't wegere om foar it opnimmen fan syn earste demo te beteljen), om't dy leaver sjoen hie dat syn soan him ynstee op syn stúdzje talein hie. Yn 't earstoan wie Thicke benammen as lietsjeskriuwer foar oare artysten aktyf, en hied er yn dy hoedanichheid gedoente mei ferneamde popstjerren as Christina Aguilera, Usher en Mary J. Blige. Letter, nei't er sels in beskieden súkses berikt hie mei syn earste albums, wurke er ek gear mei Pharrell Williams en Nicki Minaj.

Ynternasjonale ferneamdheid krige Thicke troch syn single Blurred Lines, fan it album mei deselde namme, dy't er yn gearwurking mei Pharrell Williams en T.I. yn maart 2013 útbrocht. Yn 'e byhearrende fideoklip sprongen trije modellen (Emily Ratajkowski, Jessi M'Bengue en Elle Evans) topless om, en mei dêrtroch wie it liet tige kontroversjeel, wat lykwols de ferkeapsifers allinnich mar te'n goede lieken te kommen. Williams, dy't it nûmer skreau, liet him dêrby ynspirearje troch it ferske Got to Give It Up, fan Marvin Gaye, út 1977, wat neitiid late ta in bittere juridyske striid mei de erven Gaye oer de fraach oft Blurred Lines ynbrek makke op harren auteursrjochten. Yn maart 2015 besliste in Amerikaanske federale sjuery dat dat yndie sa wie, en waarden Thicke en Williams feroardiele ta it beteljen fan $7,4 miljoen oan skeafergoeding.

Robin Thicke wie foarhinne troud mei aktrise Paula Patton, dy't er foar it earst met hie yn in útgeansgelegenheid foar minderjierrigen yn 1991, doe't er fjirtjin jier wie. Hy begûn yn 1993 serieus mei har om te gean, en troude yn 2005 mei har. Hja krigen in soan, Julian Fuego Thicke, dy't berne waard yn 2010. Yn febrewaris 2014 giene Thicke en Patton lykwols útinoar en nettsjinsteande it feit dat Thicke dat jiers syn album Paula útbrocht, dat er opdroech oan syn frou (mei û.m. it nûmer Get Her Back), fregen se yn oktober 2014 in skieding oan. Harren leafdesperikelen waarden breed útmetten yn 'e rabbersblêden.

studio-albums

• 2003 – A Beautiful World
• 2006 – The Evolution of Robin Thicke
• 2008 – Something Else
• 2009 – Sex Therapy: The Session
• 2011 – Love after War
• 2013 – Blurred Lines
  • mei dêrop it nûmer Blurred Lines
• 2014 – Paula

Foar de folsleine diskografy fan Robin Thicke (ynklusyf singles en fideoklips), sjoch op dizze side op 'e Ingelske Wikipedy.

• (in) Offisjele webside fan Robin Thicke
• (in) Biografy en filmografy fan Robin Thicke yn 'e Internet Movie Database (IMDb)