Jaime Faith Edmondson

Se waard bekend doe't se yn 2010 as Playmate of the Month yn it neakenblêd Playboy stie. Neitiid die se mei oan ferskate realitytillefyzjeprogramma's.

Jaime Faith Edmondson
persoan yn de seksyndustry
persoanlike bysûnderheden
echte namme	Jaime Faith    Edmondson Longoria
nasjonaliteit	Amerikaansk
berne	30 desimber 1978
berteplak	Bartow (Floarida)
etnisiteit	Angelsaksysk Amerikaansk
wurkpaad
wurksum as	neakenmodel
jierren aktyf	2010 – no
offisjele webside
Jaime Faith Edmondson op Twitter

Jonkheid en oplieding

Edmondson waard yn 1978 berne yn Bartow, yn it sintrale diel fan 'e Amerikaanske steat Floarida. Se brocht har iere jonkheid troch yn Georgia, mar ferfear mei har mem en styfheit nei súdlik Floarida doe't fiif jier wie. Se komt út in famylje mei in lange tradysje om by de plysje te wurkjen. Nei't se de middelbere skoalle trochrûn hie oan 'e North East High School yn Oakland Park, folge Edmondson in oplieding oan 'e Atlantyske Universiteit fan Floarida (FAU) yn Boca Raton, dêr't se yn 2002 ôfstudearre mei in bachelorgraad yn kriminology.

Karriêre

Neitiid wurke Edmondson twa jier by de plysje fan Boca Raton, dêr't se benammen nachttsjinsten draaide. Yn 2004 joech se dy baan op sadat se in profesjoneel cheerleader wurde koe foar de Amerikaansk fuotbalploech de Miami Dolphins, út Miami. Dêr wurke se seis jier. Yn 2009 en 2010 namen Edmondson en har kollega-cheerleader foar de Dolphins Cara Rosenthal diel oan it fjirtjinde seizoen fan it realitytillefyzjeprogramma The Amazing Race. Se berikten it twadde plak en kearden yn it achttjinde seizoen fan itselde programma werom om it nochris te besykjen, mar doe foelen se yn 'e trêde ôflevering al ôf, wêrmei't se op it njoggende plak einigen.

Yn 2010 liet Edmondson harsels neaken fotografearje foar in fotoreportaazje yn 'e Amerikaanske edysje fan it neakenblêd Playboy. Hja kaam op 'e omslach te stean en wie de Playmate fan 'e moanne jannewaris. Datselde jiers spile Edmondson harsels (yn har hoedanichheid fan Playmate) yn 'e tillefyzjefilm The Bunny House. Ek wie se as harsels te sjen yn fjouwer ôfleverings fan 'e realitysearje The Girls Next Door, en fierders hie se in roltsje yn 'e fideoklip fan it nûmer This Ain't No Love Song fan Trace Adkins.

Op 31 desimber 2015 troude Edmondson mei de Amerikaanske honkbalstjer Evan Longoria. Hja wennen doe al ferskate jierren gear. Harren dochter Elle Leona waard berne op 20 febrewaris 2013 yn Boca Raton. Edmondson stiet bekend as dierefreon, en docht frijwilligerswurk yn in hûne-asyl.

Jaime Faith Edmondson is blank, mei brune eagen en read oant readbrún hier. Neffens har offisjele opjefte is se 1.73 m lang, mei in gewicht fan 57 kg, en kupmaat 34C, dêr't se in boarstfergruttingsoperaasje foar ûndergien hat. Behalven de wenstige piercings troch de earlellen hat se ek in nâlpiercing, mar tatoeaazjes hat se net.

• (in) Jaime Faith Edmondson op Twitter
• (in) Biografy en filmografy fan Jaime Faith Edmondson yn 'e Internet Movie Database (IMDb)
• (in) Biografyske gegevens fan Jaime Faith Edmondson op FreeOnes
• (in) Beheinde biografy fan Jaime Faith Edmondson

Boarnen, noaten en/as referinsjes:

Biografy en filmografy fan Jaime Faith Edmondson yn 'e Internet Movie Database (IMDb) Biografyske gegevens fan Jaime Faith Edmondson op FreeOnes Beheinde biografy fan Jaime Faith Edmondson Commons    Ofbylden dy't by dit ûnderwerp hearre, binne te finen yn de kategory Jaime Faith Edmondson fan Wiki Commons.