Etnografy (fan it Grykske ἔθνος, ethnos, dat folk betsjut, en γράφω, grapho, dat ik skriuw betsjut) is de stelselmjittige stúdzje nei folken en kultueren.
Dêrby wurde ornaris per ûndersyk ien of mear kulturele ferskynsels by ien of mear folken bestudearre, fanút de kontekst fan 'e kultuer dêr't se ta hearre. Ek is it mooglik om by ien ûndersyk de hiele kultuer fan in etnyske groep fêst te lizzen, mar dat is tsjintwurdich net mear wenst, hoewol't it foarhinne wol in protte dien waard. It wurd "etnografy" kin sadwaande sawol slaan op in beskate beskriuwing fan in kultuer of in kultureel ferskynsel ("in etnografy"), as op 'e hiele stúdzjerjochting ("de etnografy").
As stúdzjerjochting komt de etnografy fuort út it sammelwurk oangeande minsklike maatskippijen en kultueren sa't dat ferrjochte waard troch de iere biologyske, sosjale en kulturele antropology. De tsjintwurdige etnografy hat lykwols behalven mei antropology ek in protte reitsflakken mei de sosjology, kommunikaasjekunde, skiednis en godstsjinstwittenskippen. In moderne etnografy beskriuwt alle waarnommen hâlden en dragen en leit alle symbolistyske ferskynsels út, mar boppedat is it in holistyske (alomfiemjende) stúdzje, en omfettet sadwaande ek in beheinde skiednis fan 'e oangeande etnyske groep en in analyze fan it fysike terrein en it klimaat fan harren wengebiet en it habitat dat hja dêrbinnen ynnimme. Yn alle gefallen moat in etnografyske stúdzje in oannimlike reäliteit útdrukke en in bydrage leverje oan it begryp fan 'e minsklike maatskippij.
Boarnen, noaten en/as referinsjes: |
Foar boarnen en oare literatuer, sjoch ûnder: References en Further reading, op dizze side. |
This article uses material from the Wikipedia Frysk article Etnografy, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.