Emmy Award
De Emmy Awards binne in groep Amerikaanske prizen dy't jierliks yn in grut tal kategoryen útrikt wurde oan programma's, produsinten en yndividuën yn 'e tillefyzjewrâld.
Se wurde rûnom beskôge as de wichtichste Amerikaanske tillefyzjeprizen, en korrespondearje datoangeande mei de Oscars (foar film), de Tonys (foar toaniel) en de Grammys (foar muzyk).
| Emmy Award | ||
| algemiene ynformaasje | ||
| nasjonaliteit |  Amerikaansk | |
| útrikt foar | tillefyzje | |
| útrikt troch | ATAS NATAS IATAS | |
| frekwinsje | 1x jiers | |
| datum | [mear as 1 seremoanje] | |
| plak | Los Angeles (Kalifornje) / Burbank (Kalifornje | |
| ynsteld | 1949 | |
| 1e útrikking | 1949 | |
| offisjele webside | ||
| www.emmys.tv/awards (ATAS) www.emmyonline.tv (NATAS) www.iemmys.tv (IATAS) | ||
Underskate Emmys
Om't de Emmys oan tige ferskate sektors fan 'e tillefyzje-yndustry útrikt wurde, besteane der 6 ferskillende útrikkingsseremoanjes jiers, dy't organisearre wurde troch 3 ferskillende organisaasjes. It bekendst en meast prestizjeus binne de Primetime Emmys (foar jûnstillefyzje), dy't útrikt wurde troch de Academy of Television Arts & Sciences (ATAS), en de Daytime Emmys (foar deitillefyzje), dy't útrikt wurde troch de National Academy of Television Arts & Sciences (NATAS). De NATAS organisearret dêrnjonken ek de útrikking fan 'e Technology and Engineering Emmy Awards (foar tillefyzjetechnyk), de Sports Emmy Awards (foar sportferslachjouwing) en de News and Documentary Emmy Awards (foar nijsprogramma's en dokumintêres). Fierders binne der dan noch de International Emmy Awards, foar ynternasjonale tillefyzje, dy't útrikt wurde troch de International Academy of Television Arts & Sciences (IATAS). Dêrnjonken wurkje de NATAS en de ATAS gear by de útrikking fan Regional Emmy Awards, foar regionale tillefyzje yn tweintich ûnderskate regio's fan 'e Feriene Steaten.
Skiednis
De ATAS rjochte yn 1949 de Emmy Award op as in middel om it medium tillefyzje te promoaten, dat doe noch yn 'e berneskuon stie. De earste jierren wie de útrikking in regionaal barren, dat folslein op Los Angeles en omkriten taspitst wie, en ek allinnich dêr útstjoerd waard. Yn 'e fyftiger jierren waard der in nasjonaal evenemint fan makke, en yn 1955 waard yn New York de NATAS oprjochte as susterorganisaasje fan 'e ATAS, om 'e leden oan 'e eastkust te tsjinjen en teffens om dêr tafersjoch op 'e útrikking te hâlden. De NATAS stifte yn 'e jierren dêrnei njoggentjin regionale ôfdielings ferdield oer de hiele Feriene Steaten, dy't (mei de ATAS foar de krite fan Los Angeles) ferantwurdlik waarden foar de útrikking fan 'e regionale Emmys. Oarspronklik waarden de nasjonale Emmys ienris yn it jier allegear tagelyk útrikt, mar nei't de ATAS en de NATAS yn 'e santiger jierren spul krigen hiene, waard yn 1977 besletten om 'e boel op te dielen en elk har eigen paad te gean. De ATAS behold de (wichtichste) útrikking fan 'e prizen foar jûnstillefyzje, wylst alle oare prizen nei de NATAS giene. De beide organisaasje kamen wol oerien om 'e rjochten op 'e trofee en it hannelsmerk te dielen. Underwilens wie 1969 de IATAS oprjochte om in ynternasjonale ferzje fan 'e Emmy Awards op te setten.
Keppelings om utens
- (in) Offisjele webside fan 'e Emmy Awards fan 'e ATAS
- (in) Offisjele webside fan 'e Emmy Awards fan 'e NATAS
- (in) Offisjele webside fan 'e International Emmy Awards fan 'e IATAS
| Boarnen, noaten en/as referinsjes: |
| Foar boarnen en oare literatuer, sjoch ûnder: References, op dizze side. |
This article uses material from the Wikipedia Frysk article Emmy Award, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.