Societât Filologjiche Furlane

I oms daûr la sô fondazion a forin i plui impuartants raprestants de culture furlane in chê volte, come Giovanni Lorenzoni (che al fo ancje il prin president), Bindo Chiurlo, Ugo Pellis, Ercole Carletti. La Filologjiche e fo intitulade al glotolic gurizan Graziadio Isaia Ascoli, fondadôr dal studi de dialetologjie in Italie e che al descrivè par prin in mût sientific la lenghe furlane intal Archivi glotologjic talian (Saçs ladins, 1873).

La Filologjiche e fo costituide in Ent morâl cun Regio Decreto dai 7 di Avost dal 1936; i siei fins a son presentâts intal prin articul dal Statût (aprovât te samblee straordenarie dai socis ai 23 di Fevrâr dal 2003): promovi e slargjâ l’ûs de lenghe furlane, prudelâ e valorizâ la minorance linguistiche furlane, studiâ, cognossi e incressi la cussience dai problemis culturâi dal Friûl par dut ce che al rivuarde la lenghe, la filologjie, la leterature, l’insegnament, la formazion culturâl e professionâl, la storie, l'art, la musiche e il spetacul, lis arts e lis tradizions popolârs, il studi, la conservazion, il restaur e la valorizazion dai bens culturâi tant movii che no movii, tant materiâi che no materiâi, che a vedin un particolâr interès linguistic, architetonic, artistic, storic, archeologjic, etnografic, museâl, sientific, bibliografic e archivistic par che ducj a puedin gjoldint. La Societât e promôf la cognossince des lenghis e des culturis di minorance, e lis considere imprescj di pâs tal mont e di fradilance tra i popui.

La Filologjiche e à un miâr di socis e al è un impuartant riferiment culturâl te regjon Friûl-Vignesie Julie, e e à relazions e scambis culturâi cun associazions e ents public e privâts e universitâts. E à ancje contribuît a lavôrs impuartants come l'Atlant linguistic talian e l'Atlant storic linguistic etnografic furlan.

La sede centrâl e je a Udin, ma a son sedis ancje a Gurize (par il Friûl orientâl), Pordenon (par il Friûl ocidentâl) e Tumieç (pe Cjargne).

• (furlan) Sît uficiâl