Cun monede si intint ogni ben materiâl o entitât astrate che e à la funzion di misure dal valôr di scambi tal acuist e la vendite di bens e servizis.
Tal passât si identificave la monede cui minûts di metal, che a jerin discs di difarentis dimensions e composizion doprâts come imprescj par paiâ o come riserve di bêçs. Intes economiis modernis i minûts a 'nd àn pierdût un pôc in impuartance, sostituîts dai biliets di cjarte, plui facii sei di produsi che di doprâ, plui altris formis astratis (par esempli i deposits in bancje).
Par cui la monede e je dut ce che al à funzion di monede, ven a stâi mieç di paiament e unitât di cont, cence distinzion de carateristichis concretis che e pues vê.
Prime de monede i scambis a jerin fats par mieç dal barat, par cui si dave alc in cambi di une robe; chest sisteme al pues funzionâ dome in economiis primitivis, parcè che e à diviers limits (par dî, si pues sparagnâ dome lis robis che si tegnin tal timp). Al puest dal barat in Europe si difondè l'ûs di tocs di aur, di arint, o di altris metai preziôs.
Par grêc la monede si clamave nomisma, par latin nummus; cheste peraule invezit e derive dal episodi dal asedi dai Gjai di Brenno a Rome tal 396 p.d.C.; sul cuel dal Campidogli al jere il templi dedicât a Junon, dulà che si tiravin su lis ocjis sacris ae dee. La storie nus conte che chestis ocjis sberlant svearin l'ex consul Manli e cussì l'atac dai Gjai al cuel al fo disfantât. Di chê volte, Junon cjapà l'apelatîf di Moneta, dal verp latin monēre, ven a stâi visâ, amonî, parcè che ducj pensavin che fos stade je a sveâ lis ocjis.
Dopo, viers il 269 p.d.C., dongje dal templi e fo fate sù la Zeche che fo metude sot de protezion de Dee Moneta. Di li a pôc tal popul l'apelatîf al passà prime al edifici, e po a ce che si produseve li dentri.
This article uses material from the Wikipedia Furlan article Monede, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contignût al è disponibil sot de licence CC BY-SA 4.0 se nol è specificât in altre maniere Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Furlan (DUHOCTRUNGQUOC.VN) is an independent company and has no affiliation with Wiki Foundation.