Cayon

Quel articllo est ècrit en arpitan forésien de Vers-Charmasél / ORB lârge.

Cél articllo pôrte sus la bétye. Por la chèrn de cayon, vêde Cayon (chèrn).

Por los articllos homonimos, vêde Cayon et Puerc.

Sus domesticus

Tropa de cayons : na caye et cinq champassons.

Cllassement

Règno	Animalia
Fôrche	Chordata
Sot-fôrche	Vertebrata
Cllâssa	Mammalia
Sot-cllâssa	Theria
Supèr-ôrdre	Eutheria
Ôrdre	Artiodactyla
Famelye	Suidae
Sot-famelye	Suinae
Genro	Sus

Èspèce

Sus domesticus
Erxleben, 1777

Sinonimos

• Sus scrofa domesticus Erxleben, 1777

Le cayon [ka.ˈjɔ̃] ou ben le puerc [pwar] — ou uncor le gadin [ɡa.ˈdĩ], le porchèt [pɔr.ˈtsɛ] ou ben le toui [ˈtu.i] en vâldoten — (Sus domesticus, sinonimo Sus scrofa domesticus) est un mamifèro domèstico, sentient, omnivôro de la famelye de los Porcins. Il est réstâ prôcho du sengllar que sè pôt crouesiér avouéc.

Un cayon mâcllo pas châtrâ est un vèrrât [var.ˈra]. La femèla du cayon at nom en arpitan la caye [ˈka.jə], la trouye [ˈtru.jə] ou ben la ganda [ˈɡã.da]. Los tietons sont los gorréls [ɡɔr.ˈre] ou ben los champassons [tsã.pa.ˈsɔ̃].

La chèrn que vint de l’èxplouètacion de quela bétye est la ples consomâ dins le mondo quand ben que la consomar fouét la chousa d'un entèrdét alimentèro dins doux-três religions monotèistes : le judâismo, l’islame et três églléses crètiènes : l’adventismo, l’Égllése ètiopièna ortodoxa et l’Égllése kimbanguista.

La produccion de chèrn de cayon est concentrâ dins três zones geografiques : l’Eropa (la Russia avouéc), l’Amèrica de Bise (le Canada — yon de los ples grands productors, le Quèbèc avouéc — et los Ètats-Unis) et l’Asia (notament la China, qu’avouéc 46 milyons de tones (2003) per an, fouét quâsi la mêtiêt de la consomacion mondiâla.

Comprenalye (a controlar)

En fonccion des critèros tèstâs, los cayons pôvont étre considèrâs coma més entèligents que los chins ou uncor èyent des capacitâts èquivalentes a los chimpanzès.

Los cayons ont na bôna mèmouère espaciâla et mèmorisont les mèlyores sôrses de nurretera.

Pôvont aprendre a fâre lors besouens dins un endrêt prècis en três jorns.

Sont jouyors (bâla, bâton, sôts, corrata...) et pôvont âssé entèragir avouéc des juès vidèo.

Reusséssont una varianta du tèst du merior onte un bol de nurretera pôt étre trovâ solament en dèduisent sa posicion du reflèt du merior.

Sâvont difèrencar los ôtros cayons et âssé distingar un homo famelyér d'un ôtro.

Un cayon que sât onte sè trôve un pouent de nurretera est capâbla de dèvelopar na stratègie por cachar son emplacement a un ôtro cayon qu'at l'habituda de lui volar sa nurretera.

Bétye de compagnie (a controlar)

La plepârt de los cayons empleyês coma bétyes de compagnie sont des cayons de races détes nènes. Coma novèla bétye de compagnie, le cayon bènèficiye pas de la lègislacion eropèèna sus les bétyes de compagnie, qu'est pôpra ux carnivôros domèsticos (chins, chats et furèts). Complique franc son passâjo a les frontiéres. Bènèficiye pas nan ples de la lègislacion eropèèna pôpra a los èquidos domèsticos.

Provoque des dèbats por que le cayon devegne oficièlament na bétye de compagnie, dins tôs los câs a muens por los cayons nens.

De nombrox foyérs abandônont lor bétye sêt porce que pensâvont avêr achetâ un cayon nen et que sè retrôvont avouéc un cayon de race bouchiére, sêt porce qu’ant pas su l'èducar ou aportar una rèponsa a sos besouens spècificos, dû a son comportament.

Notes