Lew

Wystympuje we Afryce i połedniowyj Azyji.

Lew
Panthera leo
Linnaeus, 1758
Samiec lwa we Okonjimie we Namibiji
Samica we Okonjimie
Systymatyka
Dōmyna	eukariōnty
Krōlestwo	zwiyrzynta
Typ	chordata
Grōmada	cycacze
Rzōnd	carnivora
Familijŏ	felidae
Zorta	Panthera
Gatōnek	Panthera leo
Kategoryjŏ zagrożyniŏ (CKZG)
narażōny na wymarcie
Zasiyng wystympowaniŏ
Systymatyka we Wikispecies
Multimydia na Commons

Samiec, snadnie poznany po grziwie, może wŏżyć do 250 kilogramōw i ôsiōngać wysokość do 1,3 m we kłōmbie. Samury sōm znacznie myńsze, wŏżōm do 180 kilogramōw i niy posiadajōm charakterystycznyj grziwy. Lwy sōm miynsożercami żyjōncymi we familijnych grupach, skłŏdajōncych sie ze spokrewniōnych samur, jejich potōmstwa ôbōch płci i niy spokrewniōnego samca sużōncego majoryntnym samurōm do rozmnŏżaniŏ. Samury gōniōm dlŏ stada. Mode samce sōm wychrōniane ze stada, kej ôsiōngnōm dojzdrzałość.

Przeciw popularnymu ôkryślyniu „krōl dżungli”, lew je zwiyrzym ôdewrzōnych rōwniōw. Idzie go trefić w cołkij Afryce. Krōm to jako zorta je zagrożōnŏ, a srogsze populacyje wystympujōm jyny we nŏrodnych parkach Tanzanije i Połedniowyj Afryki.

Niylicznŏ terŏźnie populacyjŏ azjatyckich lwōw (podgatōnek Panthera leo persica), kere we historycznych czasach żyły ôd Grecyje, bez Persyjõ aże do Indyje, wystympujōm we Gir Forest we pōłnocnyj Indyji. Kole trzistu lwōw żyje we rezerwacie we indyjskim sztacie Gujarat. Rezerwat mŏ wiyrchniã kol. 1300 km². Tyn podgatōnek zagrożōny je wymarciem.

Stwiyrdzōne je, iże grziwa samcōw mŏ powiōnzaniŏ z godami. Bujniyjszŏ i ćmawsza grziwa ôznaczŏ lepszego kandydŏta dlŏ samury.

Przōdzij ôd Afryki, Arabskij i Bałkańskij Bōny do Indyje. Terŏźnie zasiyng ôgraniczōny je do terynōw trŏwiastych i ôdewrzōnych terynōw leśnych Afryki na połednie ôd Sahary jak tyż (podgatōnek azjatycki) rezerwatu Gir we pōłnocno-zachodnij Indyji.

• Miary:
  • Dugość ciała: 1,4-2,5 m
  • Dugość ôgōna: 0,7-1,0 m
  • Wysokość we klymbie: 0,8-1,1 m
  • Masa ciała: 120-350
  • Samce sōm srogsze ôd samur

• Wyglōnd:
  • Sirchoła lwōw je brōnnŏ, biołŏ na brzuchu i wnyntrznych tajlach nōg, rzbiet i uszy czŏrne, grziwa samca ôd brōnnyj do czŏrnyj. Mode mŏja cyntki, kere zanikajōm z wiekym

• Kust:
  • Lwy jedzōm zaôbycz kopytne cyckocze, take jak antylopy, gazele, zebry, giyrafy i dziwe świnie, jak tyż mode srogszych cyckoczy, jak elefanty i nosorożce.

• Dugość życiŏ:
  • 10–14 lŏt we naturalnym strzodowisku, a we niywoli nawet 30 lŏt.

We heraldyce lew je czynstym symbolym. Ôznaczŏ zaôbycz ôpowŏgã, waleczność, władzã krōlewskõ i siłã.

Bajszpile miasta ze lwym we wapynie

Na Ślōnsku		Na świecie
	Wrocław		Amsterdam
	Lignica		Budapeszt
	Prudnik		Praga