La marxisme es la colie de prinsipes political, economial, filosofial formulada par la pensores deutx Karl Marx e Friedrich Engels.
La multia de aspetos cual lo inclui fa ce casi tota siensias umana ave un scola de pensa marxiste. La analise marxiste es definida par un foca materialiste e dialecticiste de la mundo. La aplica de esta prinsipe en la campo de la sosialisme ia inisia un move ideolojial nova nomida sosialisme marxiste, cual ia crese de la anios 1850 e ia ateni constante la potia en la sentenio XX en sua varias sosialdemocrata e comuniste.
La construis xef de la marxisme es fundida en la filosofia e metodolojia dialectical de Hegel, cual es multe istoriste e deterministe. Longo sua prinsipes, on no crea la ideas cual on ave, ma la ideas es un resulta de ideas presedente. Cada tende de pensa emerji como responde a la contradise de la ideas presedente. En esta modo, lo formi un tese e antetese, de cual un sintese debe emerji.
Karl Marx aplica esta teoria a la campo sosial e adata lo a la materialisme, donce en loca ce la ideas ta formi la constrinjes material, lo deveni la oposada: la marxistes opina ce la mundo material constrinje la ideas e la contradises de la ideas es la refleta de la contradises de la contradises material.
La teses economial de Marx es colieda en La Capital, cual ia deveni la obra xef de la marxisme, do la mecanicisme economial e sosial de la capitalisme, sua contradises e sua futur es analiseda.
En la analise economial, la teoria dise ce la valua de un produi coresponde a la labora cual ta es nesesada per crea un produi egal. An si la tese ia es jeneral asetada en sua tempo, la trematera political vera cual la obra de Marx ia causa ia provoca la xerca de interpretas nova. Oji lo es considerada un teoria vea e la era xef de la marxisme.
Longa Marx, la economia capitaliste es definida como la prima economia do la mone es la objetivo xef en loca de un util per oteni la produis desirada. Lo sinifia ce la comersio orijinal ia segue un lojica de P-M-P', do on vole intercambia la produi P par mone M per usa esta mone per compra la produi P'. Ma en la capitalisme, on segue la lojica M-P-M', cual sinifia ce on compra con mone M un produi P per vende lo par un cuantia M' de mone, cual es plu alta ca M. Marx ia nomi la difere entre M e M' pluvalua.
This article uses material from the Wikipedia Lingua franca nova article Marxisme, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). La contenida es disponeda su CC BY-SA 4.0, estra diferes notada. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lingua franca nova (DUHOCTRUNGQUOC.VN) is an independent company and has no affiliation with Wiki Foundation.