لمقالات د ويكيپيديا خاصها تكون مبنية على عيون موتوقة ؤ منشورة، لي كاتضمن بلي جميع لأراء لأساسية ؤ حتا تّانوية لي عندها وزن، ممتلة ف لمحتوى د لمقال (شوف: ويكيپيديا:منضور حيادي).
يلا ماكانو حتا عيون موتوقة على لموضوع، ماخاصش يكون مقال عليه ف ويكيپيديا.
هاد لڭيد كيناقش نواع لعيون ؤ دّرجة د لموتوقية ديالها على حساب لحالات. سّياسة لي كاتحدّد لعيون كاينة ف ويكيپيديا:لمراجعية. هاد سّياسة كاتطلّب عيون ف سّطورا ل أي محتوى لي كيتقابحو فيه لكتاتبيا، ؤلا يقدرو يتقابحو فيه، ؤ ل جميع لقتيباسات. سّياسة د لمراجعية كاتطبّق بدون نيقاش ؤلا ستيتناء على جميع لمحتويات ف لمجال سّمياتي رّئيسي، بما فيها لمقالات، لّيستات ؤلا لمقاطع د لمقالات، ؤ لمعلومات لي فيهوم. باش تعرف كيفاش تزيد لعيون ف سّطورا، شوف معاونة:كيفاش تزيد لعيون.
لكتاتبيا خاصهوم يناقشو بيناتهوم لعيون لي مقبولين ؤلا ماشي مقبولين، ؤ لقرارات كيتجمعو ف ويكيپيديا:لحكام د لمحتوى - عيون لكلام.
لعين ؤلا لمرجع ؤلا لمصدر ؤلا سّورس هيّا لبلاصة منين كاتجي شي معلومة مكتوبة ف ويكيپيديا. أمتيلا ديال عين هوما مقال صحافي، كتاب، ؤلا پاج د أنتيرنيت. لعين تقدر تكون ورقية، ف جورنال ؤلا كتاب، ؤلا ديجيطالية (رقمية) ف أنتيرنيت، على شكل تصويرة ؤلا ڤيديو ؤلا پاج د سيت د لويب. تقدر تكون موتوقة ؤلا ماشي موتوقة، على حساب لموضوع، شكون دارها، ؤ طّاريقة د لإنتاج ؤ تّخدام ديالها. هاد لعوامل ؤ عوامل خرين خاص لكتاتبيا ياخدوهوم ف عين لعتيبار باش يناقشو لموتوقية ديال عيون لكلام.
كلمت "منشورة" كيتّقصد بيها عادتن تّيكست لي تّنشر ؤ كيقدر يطّالع عليه لواحد ؤنلاين ؤلا ف وراق ؤلا شي وسط أخور، ولاكين تقدر تكون على شكل ؤديو ؤلا ڤيديو يلا كانت لجيهة لي صدرات لعين موتوقة، بحال وتائقي د صّيونص ساهمات فيه جاميعة معروفة، ؤلا تسجيل ديال موحاكمة صدراتو مؤسسة قضائية. ماشي ضروري تكون نّسخة لأصلية متوفّرة، حيت ڤيرسيون مأرشيڤية لي فيها نفس لمحتوى د لعين لأصلية تقدر تكفي. بشكل عام لعين خاصها تكون موتاحة مبدئيا ل لكتاتبيا لخرين باش يقدرو يراجعوها. لوتايق سّرية لي مسدود عليها من طاراف شي مؤسسة ؤلا شركة ماخاصهاش تخدّم كا عين، من غير يلا كان تتاحت ل لعوموم ؤلا تسرّبات ب شي طاريقة ؤ أي واحد ولا قادر يطّالع عليها. لقانونية ديال هاد لإتاحة ؤلا تّسريب ماشي مسؤولية ديال ويكيپيديا، ولاكين ويكيپيديا ماكاتشجّعش ب أي طريقة ؤلا شكل من لشكال باش يتسرّبو بحال هاد لوتايق بشكل لاقانوني. تّخدام ديال بحال هاد لعيون خاصو ياخد ب عين لعتيبار صّالح لعام، ؤ يتجنب على قدر ليمكان يتسبّب ف شي ضرر ل جيهة مؤسساتية ؤلا أشخاص. ب لإضافة ل هادشي، خاص لكتاتبيا يتسنّاو حتا يخرج تقرير ديال خوبارا لي كيضمن لموتوقية ديال هاد لوتايق ؤلا لعيون باش يقدرو يتّستعملو ف مقال.
This article uses material from the Wikipedia داريجة article ويكيپيديا:عيون موتوقة, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.