La Verdaera Elésia Jesús
La Verdaera Elésia Jesús (en ingrés True Jesus Church ) es una elésia pentecostal que assigura tenel al reol dos millonis miembrus assitiaus en quarenticincu paisis en seis continentis.
Esta elésia hue hundá nel sigru XX, en concretu nel añu 1917, i la huerça los miembrus s´alcuentran en China i Taiguán .
La missión esta elésia es pedrical el evangéliu a tolas nacionis enantis la segunda vinia Jesucristu.
Las Dies Prencipales dotrinas i creyéncias
Las dies dotrinas i creyéncias essenciales la Verdaera Elésia Jesús son:
1. El Espritu Santu
La efetiva rececición el Espritu Santu se manifiesta nel palraeru de luengas desconocias i es, velaí, la garantia de tenel una eréncia nel cielu .
2. El Bautismu
El bautismu n'áugua es un sacramentu pa la remissión los pecaus i pa la regeneración. El bautismu debi acontencel en áugua corrienti natural, es izil, nun riu, nel mari u nun manantal. El bautizaol -ya bautizau anteriol en áugua i nel Espritu Santu- derigi el bautismu nel nombri Jesucristu i la pressona que recebi el bautismu debi sel margullia tuita en áugua.
3. El Lavau Piezis
El sacramentu el lavau piezis premiti al creyenti tenel parti con Jesucristu. Tamién sirvi comu recordaeru del debel de tenel amol, santiá, umildá, perdón i selvíciu. Tol qu'á alcebiu el bautismu en áugua, tien que recebil el lavau piezis nel nombri Jesucristu. El lavau entri unus i otrus de los piezis puei sel platicau siempri que seya mestel .
4. La Santa Comuñón
La Ucaristia es el sacramentu que conmemora la muerti Jesucristu. Premiti participal de la calni i de la sangri Jesús i estal en comuñón con Él pa puel tenel via eterna i resucital nel úrtimu dia. Esti sacramentu veloí se has tan de continu comu seya mestel i se gasta pan sin lua i çumu uva .
5. El Sábau
El dia libri, el sétimu dia la semana, el Sábau, es un disantu, bendiziu i santificau pol Dios. Tien que sel osselvau embaju la grácia el Siñol pa la conmemoración la criación i la sarvación provista pol Dios, cona asperáncia descánsiu eternu ena desotra via.
6. Jesús
Jesucristu, dalcuerdu con esta Elésia, resucitó al tercel dia i arcendió a los cielus, huendu sarvaol la umaniá, criaol los cielus i la tierra i el únicu Dios .
7. La Bíblia
La Santa Bíblia, compuesta pol Antíguu Testamentu i el Nuevu Testamentu, está espirá pol Dios i costitui l'única verdá escrita pa la via cristiana .
8. La Sarvación
La Sarvación l'atorga Dios pol mé la fe. Los creyentis tienin que confial nel Espritu Santu, pa andal en cata la santiá, pa honral a Dios i amal al restu pressonas .
9. La Elésia
La Verdaera Elésia Jesús, estalachá pol Jesucristu pol mé el Espritu Santu pa pola llúvia postrera, es la elésia verdaera restaurá del tiempu apostólicu.
10. La Segunda Vinia
La Segunda Vinia Jesucristu acontecerá nel úrtimu dia, de que abaji del cielu pa julgal al mundu. Los justus recebirán via eterna, pero los impius bicharán la condenación eterna .
Referéncias
Atijus
- Web oficial sobri la Elésia (En ingrés i castellanu).
This article uses material from the Wikipedia Estremeñu article La Verdaera Elésia Jesús, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El testu está disponibri baju la Licéncia Creative Commons Attribution/Share-Alike; cláusulas adicionalis puén apricalsi. Guipai Terms of Use pa conocel más detallis. Güiquipeya es una marca rustria la Wiki Du học, una olganización sin ánimu de lucru. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Estremeñu (DUHOCTRUNGQUOC.VN) is an independent company and has no affiliation with Wiki Foundation.