Charlie Chaplin

Se dice ca fuje 'o cchiù canusciuto attore 'e cinema 'e cummedia d''a primma metà d''o seculo XX.

'O perzunaggio standard suojo, 'e na cumicità drammateca, fuje Charlot, 'o pezzente, cu cappiello a bommetta, bastone e mustacce. Stu pezzente era secutato 'e tutte 'e mmale ca cumparevano annanz'a isso pe' circustanza o malasciorta, ma po' nfin'a quanno venceva na situazziona, 'o faceva pe' bbia 'e ll'onestità.

Nascette a Londra 'e pariente puvverielle, ca nun 'o putevano mantenè. Tanno, a nu cierto mumento e pe' putè campà, 'e ppariente nchiudettero Charles e 'o frate suojo Sidney int'a nu culleggio pe ll'urfanielle. 'O pate murette quanno Charlie teneva dudece anne e 'a mamma, cu na malatia mentale, fuje misa ncoppa ll'ospedale 'e Croydon, addò murette int''o 1928

Int''o 1906 trasette int''a cumpagnia tiatrale 'e Fred Karno, addò rummanette nfin'ô 1913, quanno pe' tramente ca faceva nu giro ammericano cu sta cumpagnia ricevette n'offerta migliore pe' faticà int'a lle State Aunite. Int'a sta cumpagnia 'e triato, chiammata 'a Keystone 'e Mack Sennett, faceva 'a parte d''o mbriaco, e chiano chiano se facette cchiù annummenata d'isso, e accumminciaje a ffà spisso 'o perzunaggio 'e Charlot.

'O mese 'e jennaro 'e 1914, 'a Keyston accumminciaje a girà 'o primmo curto suojo, Making a Living, addò Charles cumpareva già, facenno unu d''e perzunagge, pe' primma vota annanz''e cammere 'o 14 'e jennaro 'e 1914.

Int''o 1915 facette finarmente 'o primmo film comme riggista pe' bbia e ll'Essanay e int''o 1918, c''a First National, addeventaje pruduttore d'isso stesso.

Int''o 1921 giraje 'o primmo film luongo, chiammato 'O Nennello. Int'a chist'anno, 'e cuntrarie suoje cchiù forte erano Buster Keaton e Harold Lloyd. C''o passo d''o tiempo, facette sempe film cchiù e cchiù luonghe comme 'A freva 'e ll'oro (1925), 'O circo (1928) e 'o capolavoro Luce d''a città; quanno accumminciaje 'o cinema sonoro, chello nun cagnaje, e nfin'ô 1940 facette sempe 'e film mute.

'O granne dittatore fuje 'o primmo film suojo cu ll'audio e voce, addò facette e criticaje 'o perzunaggio d'Adolf Hitler. Po' facette Monsieur Vedoux (1947) ca generaje nnove discussione; int''o 1952, facette 'o Canto d''o cigno: Luce d''a ribbalta.

Pe tramente ca steva int'a ll'Ammereca, fuje dichiarato communista, e fuje pecchesto ca turnaje int'a ll'Europa. Int''o 1972 però, vencette n'Oscar d'anore â carriera soja.

Ll'urdemo film ca facette fuje 'A cuntessa 'e Hong Kong d''o 1966. Murette a Vevey, Sguizzera int''o 1977

Curtometragge

• Vita 'e cane
• Charlot surdato
• Charlot int''a campagna
• Na jurnata 'e vacanza
• Charlot e 'a màschera 'e fierro
• 'O pellerino

Luongometragge

• 'O Nennello
• 'A femmena 'e Parigge - sulo riggista
• 'A freva 'e ll'oro
• 'O circo
• Luce d''a città
• Tiempe muderne
• 'O granne dittatore
• Monsieur Vedoux
• Luce 'e ribalta (1952)
• Nu re a Nova Jorca
• 'A cuntessa 'e Hong Kong - sulo riggista

• Scheda inta l'Internet Movie Database