Gunuang

Pagunuangan adolah barisan gunuang. Gunuang biasonyo labiah tinggi jo curam daripado bukik, tapi ado kasamoan nan panggunoannyo acok tagantuang pado adaik satampek daerah. Gunuang jo Pagunuangan tabantuak disababkan pagarikan karak bumi atau tektonis jo vulkanis. Babarapo otoritas mandefinisikan gunuang jo puncak nan labiah dari gadangan tatantu; misalnyo, Encyclopædia Britannica butuah katinggian 2000 kaki (610 m) supayo dapek didefinisikan sabagai gunung.

Katinggian pado pagunuangan mambuek iklim nan labiah dingin pado dataran nan labiah randah. Iklim nan labiah dingin ko badampak sacaro laweh pado ekosistem pagunuangan. Katinggian nan balainan mambuek jinih hewan jo tumbuahan nan balainan pulo.

Gunuang maliputi 54% kawasan Asia, 36% Amerika utara, 25% Eropa, 22% Amerika Selatan, 17% Australia jo 3% Afrika. Sacaro kasaluruahan, 24% dari daratan di Bumi tadiri dari pagunuangan. Salain itu, 1 dari 10 urang di dunia tingga di kawasan pagunuangan. Sado sungai utamo di dunia bamulo dari gunuang, jo labiah saparuah manusia bagantuang kapado gunuang untuak aia .

Puncak tatinggi di bumi adolah puncak Gunuang Everest di Pagunuangan Himalaya, Asia, satinggi 8.848 m (29.029 kaki) di ateh pamukoan lauik. Sadangkan puncak tatinggi di Tata Surya nan alah dikatahui adolah Gunuang Olympus di Mars satinggi 21.171 m (69.459 kaki).

Sabananyo indak ado definisi umum untuak gunuang. Katinggian, volume, relief, kacuraman, jarak, jo kontinuitas dapek dijadikan kriteria dalam mandefinisikan gunuang. Manuruik KBBI, definisi gunuang adolah "Bukit yg sangat besar dan tinggi (biasanya tingginya lebih dari 600 m)" (Bukik nan sabana gadang jo tinggi (biasonyo labiah dari 600 m)) Gunuang tatinggi di Indonesia adolah Puncak Jayawijaya nan ado di Papua.

Tinggi gunuang pado umumnyo diukua dari ateh pamukoan lauik, itulah nan manjadikan Gunuang Everest 8.848 meter (29.028 kaki) tatingi di dunia. Bilo katinggian gunuang diambiak dari kaki gunuang hinggo ka puncak, mako Mauna Kea di Hawaii nan tagak 10.203 meter (33.476 kaki) dari dasa lautan Pasifik manjadi nan tatinggi di dunia. Caro maukua katigo adolah dari pusek bumi hinggo ka puncak, manjadikan Gunuang Chimborazo di Pagunuangan Andes sabagai nan tatinggi.

Tadapek banyak bana panyabuikan untuak "gunuang" dalam bahaso daerah di Indonesia. Babarapo di antaronyo adolah

• Gunong, glee (Aceh)
• Deleng (Karo)
• Dolok (Batak)
• Bukit (Melayu, baarti gunuang kaciak)
• Pasir (Sunda)
• Igir, wagir, wukir, meru (Jawa)
• Bulu (Bugis)
• Keli (Flores)
• Nga (Papua padalaman)
• Olet (Sumbawa)

• Dafta gunuang
• Puncak

Cari tau tantang Gunuang di proyek-proyek Wiki lainnyo:
	Definisi dan terjemahan dari Wiktionary
	Gambar dan media dari WikiCommons
	Buku dari Wikibooks
	Entri basis data #Q8502 di Wikidata

•   Media tantang Gunuang di Wiki Commons

• http://www.langsing.net/gunung/artikel/gunung.html Archived 2008-01-31 di Wayback Machine.