როჯერ ფედერერი: შვეიცარიელი ჩოგბურთელი

8 აგვისტო, 1981, ბაზელი, შვეიცარია) — შვეიცარიელი პროფესიონალი ჩოგბურთელი, მსოფლიოს ყოფილი პირველი ჩოგანი. ჩოგბურთელების და ექსპერტების დიდი ნაწილი მას ყველა დროის საუკეთესო ჩოგბურთელად მიიჩნევს.

როჯერ ფედერერი

ფედერერი 2016 წლის უიმბლდონზე
ქვეყანა (სპორტი)	შვეიცარია
საცხოვრებელი ადგილი	ვალბელა, შვეიცარია დუბაი, არაბეთის გაერთიანებული საემიროები ვოლერაუ, შვეიცარია ბოტმინგენი, შვეიცარია ობერვილი, შვეიცარია
დაიბადა	8 აგვისტო, 1981 (1981-08-08) (42 წლის) ბაზელი, შვეიცარია
სიმაღლე	185 სმ.
პროფესიონალი	1998
კარიერა დაასრულა	2022
თამაში	მემარჯვენე
მწვრთნელ(ებ)ი	პიტერ კარტერი (1991–2000) პიტერ ლუნდგრენი (2000–2003) ტონი როში (2005–2007) სევერინ ლიუთი (2007–2022) ხოსე ჰიგუერასი (2008) პოლ ანაკონი (2010–2013) სტეფან ედბერგი (2014–2015) ივან ლიუბიჩიჩი (2016–2022)
ფულადი პრიზი	130,594,339 აშშ დოლარი
ოფიციალური საიტი	rogerfederer.com
ერთეულები
კარიერის ჩანაწერები	1251–275 (81.98%)
ტიტულები კარიერაში	103 (მე-2 ღია ერაში)
უმაღლესი რეიტინგი	1-ლი (2 თებერვალი, 2004)
დიდი სლემის ერთეულთა შედეგები
ავსტრალიის ღია პირველობა	გამარჯვება (2004, 2006, 2007, 2010, 2017, 2018)
საფრანგეთის ღია პირველობა	გამარჯვება (2009)
უიმბლდონი	გამარჯვება (2003, 2004, 2005, 2006, 2007, 2009, 2012, 2017)
აშშ-ის ღია პირველობა	გამარჯვება (2004, 2005, 2006, 2007, 2008)
სხვა ტურნირები
ტურის ფინალი	გამარჯვება (2003, 2004, 2006, 2007, 2010, 2011)
ოლიმპიური თამაშები	2012
წყვილები
კარიერის ჩანაწერები	131–93 (58.48%)
ტიტულები კარიერაში	8
უმაღლესი რეიტინგი	24-ე (9 ივნისი, 2003)
დიდი სლემის წყვილთა შედეგები
ავსტრალიის ღია პირველობა	3რ (2003)
საფრანგეთის ღია პირველობა	1რ (2000)
უიმბლდონი	მეოთხედფინალი (2000)
აშშ-ის ღია პირველობა	3რ (2002)
წყვილთა სხვა ტურნირები
ოლიმპიური თამაშები	2008
გუნდური შეჯიბრები
დეივისის თასი	გამარჯვება (2014)
ჰოპმანის თასი	გამარჯვება (2001, 2018, 2019)
მედლები  შვეიცარია ოლიმპიური თამაშები ოქრო 2008 პეკინი წყვილები ვერცხლი 2012 ლონდონი ერთეულები

ფედერერს მამაკაცთა ჩოგბურთში ყველაზე მეტი – 20 დიდი სლემის ტურნირი აქვს ერთეულთა თანრიგში მოგებული. აქედან რეკორდული 8 უიმბლდონი, რეკორდული 6 ავსტრალიის ღია პირველობა (ამდენივე აქვთ როი ემერსონს და ნოვაკ ჯოკოვიჩს), 5 აშშ-ის ღია პირველობა და 1 საფრანგეთის ღია პირველობა. მან მონაწილეობა მიიღო რეკორდულ – 30 დიდი სლემის ფინალში, მათ შორის ზედიზედ 10 ფინალში 2005 წლის უიმბლდონიდან 2007 წლის აშშ-ის ღია პირველობის ჩათვლით.

შვეიცარიელს 28 მასტერსი და რეკორდული – 6 წლის შემაჯამებელი ტურნირი აქვს მოგებული. ჯამში ფედერერმა კარიერაში ATP-ის 101 ტურნირი მოიგო ერთეულებში.

ATP-ის ჩოგბურთელთა რეიტინგში იგი ყველაზე დიდხანს – 310 კვირის განმავლობაში იკავებდა პირველ ადგილს, მათ შორის ზედიზედ 237 კვირის განმავლობაში, რაც რეკორდია. 2002 წლის ოქტომბრიდან 2016 წლის ნოემბრამდე, ფედერერი უწყვეტად შედიოდა მსოფლიო რეიტინგის ტოპ 10-ში. 2018 წლის თებერვალში 5 წლიანი პაუზის შემდეგ, შვეიცარიელი 36 წლის ასაკში დაუბრუნდა მსოფლიო რეიტინგში პირველ ადგილს და გახდა მამაკაცთა ჩოგბურთის ისტორიაში ყველაზე ასაკოვანი პირველი ჩოგანი.

ოლიმპიურ თამაშებზე, ფედერერს ერთი ვერცხლის მედალი ერთეულებში და ერთი ოქროს მედალი აქვს წყვილთა თანრიგში მოპოვებული. სანაკრებო დონეზე, მან ერთი დეივისის თასი მოიგო შვეიცარიის ნაკრებთან ერთად, რომელიც პირველი იყო ქვეყნის ისტორიაში. ფედერერს საკუთარი ქვეყნის ნაკრებთან ერთად, ასევე ორი ჰოპმანის თასი აქვს მოგებული.

ფედერერი დაიბადა შვეიცარიის ქალაქ ბაზელში. მამამისი – რობერტ ფედერერი, დაიბადა შვეიცარიაში, ხოლო დედამისი ლინეტ ფედერერი დაიბადა სამხრეთ აფრიკის რესპუბლიკაში, წარმოშობით ნიდერლანდელების და ჰუგენოტების ოჯახში. როჯერს ჰყავს უფროსი და – დიანა. ფედერერი ფლობს შვეიცარიის და სამხრეთ აფრიკის რესპუბლიკის მოქალაქეობებს. ის თავისუფლად საუბრობს გერმანულის შვეიცარიულ დიალექტზე, გერმანულ, ინგლისურ და ფრანგულ ენებზე. ფედერერი საფეხბურთო კლუბ „ბაზელის“ და შვეიცარიის საფეხბურთო ნაკრების გულშემატკივარია.

ჰყავს მეუღლე – მირკა ფედერერი, რომელიც ასევე ჩოგბურთელი იყო. 2009 წელს წყვილს ტყუპი გოგონები, ხოლო 2014 წელს ტყუპი ბიჭები შეეძინათ.

1999 წლამდე

ფედერერის საუკეთესო მიღწევა ახალგაზრდულ ჩემპიონატებში, იყო 1998 წელს უიმბლდონის მოგება ვაჟთა ერთეულებში, სადაც მან ფინალში ქართველი ჩოგბურთელი ირაკლი ლაბაძე დაამარცხა 6–4, 6–4. იმავე წელს წყვილებში ბელგიელ ოლივიე როჰუსთან ერთად, მან ასევე მოიგო უიმბლდონი.

1998–2002: ადრეული კარიერა

 

ფედერერი ტოპ 100-ში პირველად 1999 წლის 20 სექტემბერს შევიდა. მისი პირველი ფინალი პროფესიონალურ დონეზე იყო მარსელის ღია პირველობა 2000 წელს, სადაც იგი შვეიცარიელ მარკ როსესთან დამარცხდა. 2001 წელს თანამემამულე მარტინა ჰინგისთან ერთად, ფედერერმა ჰოპმანის თასი პირველად მოიგო. იმავე წელს მან თავის პროფესიონალურ კარიერაში პირველი ტიტული მოიგო მილანში ჩატარებულ ტურნირზე. რამდენიმე თვეში, ფედერერმა კარიერაში დიდი სლემის ტურნირებზე პირველი დიდი გამარჯვება მოიპოვა. უიმბლდონზე მან ტურნირის შვიდ გზის ჩემპიონი და რეკორდსმენი, ამერიკელი პიტ სამპრასი დაამარცხა 5 სეტში და მეოთხედფინალში გავიდა, სადაც ბრიტანელ ტიმ ჰენმენთან დამარცხდა.

2002 წელს ფედერერი პირველად გავიდა მასტერსის ტურნირის ფინალში. მაიამის მასტერსის ფინალში იგი 4 სეტში ამერიკელ ანდრე აგასისთან დამარცხდა. შვეიცარიელმა პირველი მასტერსის ტურნირი მომდევნო წელს მოიგო, როდესაც ჰამბურგის მასტერსის ფინალში რუსი ჩოგბურთელი მარატ საფინი დაამარცხა.

1998–2002 წლებში ფედერერი 10 ტურნირის ფინალში გავიდა და 4-ში გაიმარჯვა. 2002 წელს მან პირველად დაასრულა წელიწადი ათეულში, როდესაც იგი მე-6 ადგილზე გავიდა.

2003: უიმბლდონზე გამარჯვება

2003 წელს ფედერერმა პირველად მოიგო დიდი სლემის ტურნირი. შვეიცარიელმა უიმბლდონზე ავსტრალიელი მარკ ფილიპუსისი სამ სეტში დაამარცხა. იმავე წელს ფედერერმა თავის კარიერაში ერთადერთხელ მოიგო მასტერსის ტურნირი წყვილთა თანრიგში. ბელარუს ჩოგბურთელ მაქს მირნისთან ერთად იგი მაიამის მასტერსის ტიტულს დაეუფლა. ნოემბერში წლის შემაჯამებელი ტურნირის ფინალში ფედერერმა აგასი მარტივად დაამარცხა და პირველად დაეუფლა აღნიშნულ ტიტულს. ჯამში ფედერერმა 2003 წელს 7 ტურნირი მოიგო და წლის ბოლოს რეიტინგში ამერიკელი ენდი როდიკის შემდეგ მეორე ადგილზე გავიდა.

2004: დომინაციის დამყარება

2004 წელს პირველად კარიერაში ფედერერმა 4-დან 3 დიდი სლემის ტურნირი მოიგო და გახდა პირველი ჩოგბურთელი, რომელმაც აღნიშნულ შედეგს მიაღწია 1988 წლის შემდეგ. ავსტრალიის ღია პირველობაზე მან ფინალში მარატ საფინი დაამარცხა, პირველად დაეუფლა აღნიშნულ სლემს და პირველად კარიერაში გახდა მსოფლიოს პირველი ჩოგანი. რამდენიმე თვეში ფედერერმა ზედიზედ მეორედ მოიგო უიმბლდონი, როდესაც ფინალში ენდი როდიკი დაამარცხა 4 სეტში. სექტემბერში შვეიცარიელმა კარიერაში პირველად მოიგო აშშ-ის ღია პირველობა. ფედერერმა ფინალში 2001 წლის ჩემპიონი, ავსტრალიელი ლეიტონ ჰიუიტი სამ სეტში გაანადგურა: 6–0, 7–6^(7–3), 6–0.

2004 წელს ფედერერმა სამი მასტერსის ტიტული მოიგო. 1 ჰამბურგში თიხის საფარზე და 2 ჰარდზე – ინდიან უელსში და კანადაში. წლის ბოლოს შვეიცარიელმა კვლავ მოიგო წლის შემაჯამებელი ტურნირი. ჯამში ფედერერმა 2004 წელს 11 ფინალი ითამაშა და ყველა მათგანში გაიმარჯვა, მოიგო 74 მატჩი, 6-ში დამარცხდა და წელიწადი კარიერაში პირველად პირველ ჩოგნად დაასრულა.

2005: დომინაციის გაგრძელება

 

2005 წელს ფედერერი 2 სლემის ფინალში გავიდა. ავსტრალიაში მან საფინთან მძიმე ბრძოლაში დათმო 5 სეტიანი ნახევარფინალური მატჩი, რომელიც 4 საათი და 28 წუთი გაგრძელდა, ხოლო საფრანგეთის ღია პირველობაზე, ნახევარფინალში ახალგაზრდა ესპანელ რაფაელ ნადალთან დამარცხდა. ფედერერმა დარჩენილი 2 სლემი მოიგო. მან ზედიზედ მესამედ მოიგო უიმბლდონი, სადაც ფინალში ისევ ენდი როდიკი, ხოლო აშშ-ის ღია პირველობაზე ვეტერანი ანდრე აგასი დაამარცხა, ამ უკანასკნელის ბოლო დიდი სლემის ფინალში.

2005 წელს ფედერერმა 4 მასტერსის ტურნირი მოიგო: ინდიან უელსის ფინალში ჰიუიტი, მაიამის ფინალში ნადალი, ჰამბურგის ფინალში ფრანგი რიშარ გასკე და ცინცინატის მასტერსის ფინალში როდიკი დაამარცხა. აღსანიშნავია მაიამის მასტერსის 5 სეტიანი ფინალი ნადალთან, სადაც ესპანელმა პირველი ორი სეტი მოიგო, თუმცა ფედერერმა დარჩენილ 3 სეტში იმარჯვა და მოიგო ტურნირი.

წლის შემაჯამებელი ტურნირის ფინალში ფედერერი არგენტინელ დავიდ ნალბანდიანთან დამარცხდა 5 სეტში, თუმცა რეიტინგში პირველი ადგილი შეინარჩუნა. შვეიცარიელმა წინა სეზონის მსგავსად 11 ტურნირში იმარჯვა. მან მოიგო 81 მატჩი და 4-ში დამარცხდა.

2006: კარიერის საუკეთესო სეზონი

 

2006 წლის სეზონი სტატისტიკურად საუკეთესო იყო ფედერერის კარიერაში და ერთ-ერთი საუკეთესო ჩოგბურთის ისტორიაში. მან 12 ტურნირი მოიგო (1984 წელს ამერიკელი ჯონ მაკინროის შემდეგ ყველაზე მეტი), გაიმარჯვა 92 მატჩში და მხოლოდ 5-ში დამარცხდა. ფედერერმა გაიმეორა 2004 წლის შედეგი და 4-დან 3 დიდი სლემის ტურნირი მოიგო. იგი ასევე კარიერაში პირველად გავიდა საფრანგეთის ღია პირველობის ფინალში, სადაც ნადალთან 4 სეტში დამარცხდა. დიდი სლემის ტურნირებზე ეს იყო ფედერერის–ნადალის პირველი ფინალი. 1969 წლის შემდეგ, შვეიცარიელი გახდა პირველი ჩოგბურთელი მამაკაცებში, რომელმაც დიდი სლემის ტურნირების 4-ვე ფინალში მიიღო მონაწილეობა.

ავსტრალიის ღია პირველობის ფინალში ფედერერმა კვიპროსელი მარკოს ბაღდატისი დაამარცხა. უიმბლდონის ფინალში მან პირველად დაამარცხა ნადალი დიდი სლემის ტურნირების ფინალში და ზედიზედ მეოთხედ დაეუფლა აღნიშნულ სლემს, ხოლო აშშ-ის ღია პირველობაზე შვეიცარიელმა ფინალში 4 სეტში სძლია ენდი როდიკს და ზედიზედ მესამედ მოიგო ამერიკული სლემი.

ფედერერი 2006 წელს 6-ჯერ გავიდა მასტერსის ტურნირების ფინალებში, საიდანაც 4 მოიგო (4-ვე ჰარდ კორტებზე) და 2 წააგო (2-ვე თიხაზე). აღსანიშნავია რომის მასტერსის 5 საათიანი ფინალი რაფაელ ნადალთან, რომელიც ფედერერმა 5 სეტში დათმო: 7–6^(7–0), 6–7^(5–7), 4–6, 6–2, 6–7^(5–7).

ამ სეზონში ფედერერმა მხოლოდ 2 ჩოგბურთელთან წააგო: 4-ჯერ ნადალთან და ერთხელ ახალგაზრდა ბრიტანელ ენდი მარისთან. შემოდგომაზე შვეიცარიელმა ჩოგბურთელმა პირველად მოიგო მშობლიურ ქალაქ ბაზელში მიმდინარე შვეიცარიის ჩემპიონატი დახურულ კორტებზე. ფედერერი ისევ გავიდა წლის შემაჯამებელი ტურნირის ფინალში, სადაც ამერიკელი ჯეიმზ ბლეიკი დაამარცხა და მესამედ დაეუფლა ტიტულს.

2007: ახალგაზრდა მეტოქეების შეკავება

 

2007 წელს ფედერერმა გაიმეორა წინა წლის შედეგი და ყველა დიდი სლემის ტურნირის ფინალში გავიდა. ავსტრალიის ღია პირველობა მან სეტის წაუგებლად მოიგო და გახდა პირველი ჩოგბურთელი 1980 წლის შემდეგ, რომელმაც შეძლო დიდი სლემის ტურნირის მოგება სეტის წაგების გარეშე. ფინალში ფედერერმა ჩილელი ფერნანდო გონსალესი დაამარცხა და მესამედ მოიგო ავსტრალიის სლემი.

ფედერერს 41 მატჩიანი შთამბეჭდავი წაუგებელი სერია ჰქონდა 2006 წლის აგვისტოდან მოყოლებული, რომელიც ინდიან უელსის მასტერსზე შეწყდა არგენტინელ გილიერმო კანიასთან მარცხის შემდეგ.

მაისში ჰამბურგის მასტერსის ფინალში ფედერერმა პირველად შეძლო თიხის საფარზე ნადალის დამარცხება. ანგარიშით 2–6, 6–2, 6–0 გამარჯვების შემდეგ შეწყდა თიხაზე ნადალის 81 მატჩიანი მოგებათა სერია, რაც რეკორდია. თუმცა საფრანგეთის ღია პირველობაზე ფედერერმა ვერ შეძლო იგივეს გამეორება და ზედიზედ მეორედ დამარცხდა ესპანელთან ფინალში 4 სეტიან ბრძოლაში.

ივლისში ფედერერი და ნადალი კიდევ ერთხელ დაუპირისპირდნენ ერთმანეთს უიმბლდონის ფინალში. მძიმე, 5 სეტიან მატჩში კვლავ ფედერერმა იზეიმა გამარჯვება და ზედიზედ მეხუთედ მოიგო ბალახის სლემი. იმ დროისთვის ბევრმა სპეციალისტმა ეს მატჩი 1980 წლის უიმბლდონის ფინალთან ერთად საუკეთესოდ აღიარა. აღნიშნული გამარჯვებით, ფედერერი შვედ ბიორნ ბორგს გაუტოლდა უიმბლდონის ზედიზედ 5-ჯერ მოგებაში.

ფედერერმა განაგრძო აშშ-ის ღია პირველობაზე დომინანტობა და ზედიზედ მეოთხედ მოიგო აღნიშნული სლემი. ფინალში შვეიცარიელმა ახალგაზრდა სერბი ვარსკვლავი ნოვაკ ჯოკოვიჩი დაამარცხა სამ სეტში: 7–6^(7–4), 7–6^(7–2), 6–4.

2007 წელს ჰამბურგის მასტერსის გარდა, ფედერერმა ცინცინატის მასტერსი მოიგო. წლის ბოლოს შვეიცარიელმა მეოთხედ მოიგო წლის შემაჯამებელი ტურნირი.

ფედერერმა ზედიზედ მეოთხე წელი დაასრულა მსოფლიოს პირველ ნომრად. ამ პერიოდში მან 11 დიდი სლემის ტიტული მოიგო. ფედერერი გახდა ისტორიაში ერთადერთი ჩოგბურთელი, რომელმაც სამ სხვადასხვა სეზონში მოიგო სამი სლემი (2004, 2006, 2007).

2008: მეხუთე სლემი აშშ-ში და ოლიმპიური ოქრო წყვილებში

 

ფედერერის წარმატება 2008 წელს სერიოზულად შეფერხდა მას შემდეგ, როდესაც იგი ინფექციური მონონუკლეოზით დაავადდა წლის პირველ ნახევარში, ხოლო წლის ბოლოს ზურგის პრობლემებმა იჩინა თავი, რომლებიც პერიოდულად მომავალშიც აწუხებდა შვეიცარიელ ჩოგბურთელს.

ამ სეზონში ფედერერმა მხოლოდ 1 სლემი მოიგო. აშშ-ის ღია პირველობის ფინალში შვეიცარიელმა სამ სეტში დაამარცხა ენდი მარი და ზედიზედ მეხუთედ დაეუფლა ტიტულს.

ავსტრალიის ღია პირველობაზე ფედერერი ნახევარფინალში 3 სეტში დამარცხდა ჯოკოვიჩთან, საფრანგეთის ღია პირველობის ფინალში სამ სეტში განადგურდა ნადალთან და უიმბლდონის ფინალშიც დამარცხდა ესპანელთან. აღნიშნული ფინალი მრავალი ექსპერტის მიერ არის მიჩნეული, როგორც ყველა დროის საუკეთესო მატჩი ჩოგბურთის ისტორიაში. ამ მარცხით შეწყდა ფედერერის რეკორდული 65 მატჩიანი წაუგებელი სერია უიმბლდონზე. ბოლოს შვეიცარიელს 2002 წელს ჰქონდა წაგებული ბალახის სლემზე.

პეკინის ოლიმპიურ თამაშებზე თანამემამულე სტანისლას ვავრინკასთან ერთად წყვილთა თანრიგში ფედერერმა ოლიმპიური ოქროს მედალი მოიპოვა. ფინალში მათ შვედები თომას იუჰანსონი და სიმონ ასპელინი დაამარცხეს. ერთეულებში ფედერერი მეოთხედფინალში ჯეიმზ ბლეიკთან დამარცხდა.

2008 წელს ფედერერმა ვერ მოიგო მასტერსის ტიტული. ჯამში მან მხოლოდ 4 ტურნირზე იზეიმა გამარჯვება, აქედან 3 მსოფლიო ტურის 250 სერიების დონის. ფედერერმა სეზონი მეორე ადგილზე დაასრულა.

2009: საფრანგეთის ღია პირველობაზე პირველი გამარჯვება, მეექვსე უიმბლდონი და სლემების რეკორდის დამყარება

 

ფედერერს 2009 წლის სეზონის დასაწყისში 13 დიდი სლემის თასი ჰქონდა და იგი 1 ტიტულით მხოლოდ პიტ სამპრასს ჩამორჩებოდა. პირველი დიდი სლემის ტურნირზე ავსტრალიაში, ფედერერი ფინალში გავიდა და კვლავ 5 სეტიან მძიმე ბრძოლაში დამარცხდა რაფაელ ნადალთან.

მაისში ფედერერმა თიხის საფარზე კარიერაში მეორედ დაამარცხა ნადალი. მადრიდის მასტერსის ფინალში მან ესპანელს ორ სეტში სძლია: 6–4, 6–4. ფედერერი საფრანგეთის ღია პირველობის ფავორიტი გახდა მას შემდეგ, რაც ნადალმა თავის კარიერაში პირველად წააგო ტურნირზე. მეოთხე რაუნდში ის შვედმა რობინ სოდერლინგმა 4 სეტში დაამარცხა. ფინალამდე მეოთხე რაუნდში ფედერერმა მძიმე 5 სეტიან მატჩში დაამარცხა გერმანელი ტომი ჰაასი, სადაც იგი 0–2-ს აგებდა სეტებში. ნახევარფინალში შვეიცარიელს კვლავ 5 სეტი დასჭირდა, ახალგაზრდა არგენტინელი ხუან მარტინ დელ პოტროს დასამარცხებლად და ფინალში გავიდა, სადაც იგი სოდერლინგს დაუპირისპირდა. ფედერერმა არ გაუშვა შანსი და დამაჯერებლად 3 სეტში (6–1, 7–6^(7–1), 6–4) დაამარცხა შვედი მეტოქე, რითიც პირველად დაეუფლა საფრანგეთის ღია პირველობის ტიტულს. ამ გამარჯვებით ფედერერმა კარიერული დიდი სლემი შეასრულა და 14 ტიტულით პიტ სამპრასს გაუტოლდა.

უიმბლდონზე ფედერერი ფინალში მარტივად გავიდა და მესამედ დაუპირისპირდა ენდი როდიკს. 5 სეტიან მძიმე მატჩში (5–7, 7–6^(8–6), 7–6^(7–5), 3–6, 16–14) შვეიცარიელმა კვლავ დაამარცხა ამერიკელი მეტოქე და მეექვსედ დაეუფლა უიმბლდონის ტიტულს. ამ გამარჯვებით ფედერერმა გადაასწრო სამპრასს და მამაკაცთა ჩოგბურთის ისტორიაში ყველაზე მეტი დიდი სლემის ტიტული დააგროვა.

აგვისტოში შვეიცარიელმა ცინცინატის მასტერსი მესამედ მოიგო, სადაც ფინალში ჯოკოვიჩი დაამარცხა. აშშ-ის ღია პირველობაზე, ნახევარფინალში ჯოკოვიჩის 3 სეტში დამარცხების შემდეგ, ფედერერი ზედიზედ მეექვსედ გავიდა ფინალში, თუმცა საბოლოოდ დელ პოტროსთან დამარცხდა 5 სეტიან მატჩში.

2009 წელი ერთ-ერთი ყველაზე მნიშვნელოვანი სეზონი იყო ფედერერის კარიერაში, რადგან მან პირველად მოიგო საფრანგეთის ღია პირველობა, შეასრულა კარიერული დიდი სლემი და გახდა დიდი სლემის ტიტულების რეკორდსმენი. აღნიშნული მიღწევების შემდეგ, ექსპერტების და ჩოგბურთელების ნაწილმა იგი ყველა დროის საუკეთესო ჩოგბურთელად აღიარა.

2010: მეოთხე გამარჯვება ავსტრალიის ღია პირველობაზე

 

2010 წლის სეზონი ფედერერისთვის წარმატებით დაიწყო. იანვარში მან მეოთხედ მოიგო ავსტრალიის ღია პირველობა და ჯამში მე-16 დიდი სლემი. ფინალში ფედერერმა სამ სეტში დაამარცხა ენდი მარი: 6–3, 6–4, 7–6^(13–11).

თუმცა ფედერერის წარმატება ავსტრალიაში ბოლო გამოდგა 2010 წელს დიდი სლემის ტურნირებზე. საფრანგეთის ღია პირველობაზე მეოთხედფინალში რობინ სოდერლინგთან გამოვარდა, ხოლო უიმბლდონზე კი, ასევე მეოთხედფინალში მოულოდნელად დამარცხდა ჩეხ ტომაშ ბერდიხთან და პირველად 2002 წლის შემდეგ ფედერერი ვერ გავიდა უიმბლდონის ფინალში. შედეგად, პირველად 6 წლის და 8 თვის განმავლობაში შვეიცარიელი რეიტინგში მესამე ადგილზე ჩამოქვეითდა. აშშ-ის ღია პირველობაზე ფედერერმა ნახევარფინალამდე მიაღწია და ჯოკოვიჩს დაუპირისპირდა. მიუხედავად იმისა, რომ მას ჰქონდა შანსები მატჩის მოსაგებად, საბოლოოდ 5 სეტში დამარცხდა.

2010 წელს ფედერერმა მხოლოდ 1 მასტერსის ტურნირი მოიგო. ცინცინატის მასტერსზე მან ამერიკელი მარდი ფიში მძიმე ბრძოლაში დაამარცხა და მეოთხედ დაეუფლა ტიტულს.

ნოემბერში წლის შემაჯამებელ ტურნირზე ფედერერი შთამბეჭდავად გამოვიდა. ჯგუფურ ეტაპზე მან ესპანელი დავიდ ფერერი, ენდი მარი და რობინ სოდერლინგი დაამარცხა. ნახევარფინალში ნოვაკ ჯოკოვიჩი, ხოლო ფინალში რაფაელ ნადალი დაამარცხა და მეხუთედ მოიგო ტურნირი. ეს ტურნირი ერთადერთია, სადაც ფედერერმა შეძლო დიდი ოთხეულის ყველა სხვა წევრის დამარცხება. საბოლოო ჯამში, ფედერერმა 2010 წელს 5 ტურნირი მოიგო და სეზონი რეიტინგში მეორე ადგილზე დაასრულა.

2011: წლის შემაჯამებელი ტურნირის რეკორდი

 

2011 წლის ავსტრალიის ღია პირველობაზე ფედერერი ნახევარფინალში გავიდა, სადაც ჯოკოვიჩთან სამ სეტში დამარცხდა. საფრანგეთის ღია პირველობაზე შვეიცარიელი ნახევარფინალში კვლავ ჯოკოვიჩს დაუპირისპირდა. ფედერერმა თავისი კარიერის ერთ-ერთი საუკეთესო მატჩი ჩაატარა თიხის საფარზე და მეტოქე 4 სეტში დაამარცხა. ამ წაგებამ შეწყვიტა სერბი ჩოგბურთელის 43 მატჩიანი მოგებათა სერია. ასევე ეს მარცხი ერთადერთი გამოდგა ჯოკოვიჩისთვის დიდი სლემის ტურნირებზე 2011 წლის სეზონში, რადგან მან დარჩენილი 3 სლემი მოიგო. ფინალში ფედერერი ნადალს შეხვდა და კვლავ დამარცხდა, ამჯერად 4 სეტში.

უიმბლდონზე ფედერერი მეოთხედფინალში ფრანგ ჟო-ვილფრიდ ცონგასთან 5 სეტში დამარცხდა. დიდი სლემის ტურნირებზე ეს იყო პირველი შემთხვევა ფედერერის კარიერაში, როდესაც იგი დამარცხდა სეტებში 2–0 უპირატესობის მიუხედავად.

აშშ-ის ღია პირველობაზე ფედერერი წინა წლის მსგავსად ჯოკოვიჩთან 5 სეტიან ნახევარფინალურ მატჩში დამარცხდა. 2002 წლის შემდეგ პირველად მოხდა, როდესაც შვეიცარიელმა ჩოგბურთელმა ვერ შეძლო დიდი სლემის ტურნირის მოგება.

2011 წელს ფედერერმა მხოლოდ 1 მასტერსის ტიტული მოიგო. ეს იყო პარიზის მასტერსი, რომელიც მან კარიერაში პირველად მოიგო. ფინალში ფედერერმა ცონგა დაამარცხა: 6–1, 7–6^(7–3). რამდენიმე დღეში ფედერერი კვლავ შეხვდა ცონგას, ამჯერად წლის შემაჯამებელი ტურნირის ფინალში და კვლავ დაამარცხა იგი. ამ მოგებით ფედერერმა მეექვსედ მოიგო წლის შემაჯამებელი ტურნირი და აღნიშნული გათამაშების რეკორდსმენი გახდა. შვეიცარიელმა სეზონი რეიტინგში მესამე ადგილზე დაასრულა.

2012: მეშვიდე უიმბლდონი, ოლიმპიური ვერცხლი და პირველ ადგილზე დაბრუნება

 

წინა წლებთან შედარებით, 2012 წელი ფედერერისთვის წარმატებული გამოვიდა. 2006 წლის შემდეგ მან ერთ წელიწადში ყველაზე მეტი მატჩი (71 მოგება, 12 წაგება), ხოლო 2007 წლის შემდეგ ყველაზე მეტი ტიტული მოიგო (6).

ავსტრალიის ღია პირველობაზე ფედერერი ნახევარფინალში ნადალთან 4 სეტში დამარცხდა. რამდენიმე კვირაში ის ისევ შეხვდა ესპანელს, ამჯერად ინდიან უელსის მასტერსის ნახევარფინალში და ფედერერმა 2 სეტში გაიმარჯვა. ფინალში ფედერერმა ამერიკელი ჯონ იზნერი დაამარცხა და ინდიან უელსში მეოთხედ გახდა ჩემპიონი. ჯამში ფედერერისთვის ეს მე-19 მასტერსის ტიტული იყო. შვეიცარიელმა რამდენიმე თვეში მადრიდის მასტერსის ტიტულიც მოიგო. ლურჯი თიხის საფარზე მან ფინალში ტომაშ ბერდიხი დაამარცხა: 3–6, 7–5, 7–5. საფრანგეთის ღია პირველობაზე ნახევარფინალში ფედერერი ჯოკოვიჩთან სამ სეტში დამარცხდა.

უიმბლდონზე ფედერერი ნახევარფინალში ისევ ნოვაკ ჯოკოვიჩს დაუპირისპირდა და ამჯერად 4 სეტში დააამარცხა. ფინალში შვეიცარიელმა ენდი მარის სძლია და მეშვიდედ მოიგო უიმბლდონი. ამ გამარჯვებით ფედერერი რეიტინგში პირველ ადგილზე დაბრუნდა.

ფინალიდან 4 კვირის შემდეგ, ფედერერი ისევ მარის დაუპირისპირდა უიმბლდონის ცენტრალურ კორტზე, ამჯერად ლონდონის ოლიმპიური თამაშების ფინალში. ბრიტანელმა აიღო რევანში, სამ სეტში დაამარცხა ფედერერი და ოლიმპიური ოქროს მედალი აიღო. აღსანიშნავია, რომ ნახევარფინალში ფედერერმა 4.26 საათიან მძიმე მატჩში ხუან მარტინ დელ პოტრო დაამარცხა: 3–6, 7–6^(7–5), 19–17.

აგვისტოში ფედერერმა მეხუთედ მოიგო ცინცინატის მასტერსი, ჯამში 2012 წელს მესამე მასტერსის ტურნირი. ფინალში მან 2 სეტში ჯოკოვიჩი დაამარცხა. აშშ-ის ღია პირველობაზე ფედერერი წარუმატებლად გამოვიდა. მეოთხედფინალში ის 4 სეტში ბერდიხთან დამარცხდა.

წლის შემაჯამებელი ტურნირის ფინალში ფედერერი ორ სეტში ჯოკოვიჩთან დამარცხდა, თუმცა რეიტინგში მაინც პირველ ადგილზე დაასრულა წელიწადი.

2013: ტრავმებთან ბრძოლა

 

2013 წელს ფედერერს ისევ გაუმიზეზდა ზურგის ტრავმა. რეიტინგში ის მეორედან მეექვსე ადგილზე ჩამოვიდა, ხოლო წლის განმავლობაში მან მხოლოდ 1 ტიტული მოიგო. ATP-ის მსოფლიო ტურის 250 სერიების დონის ჰალეს ღია პირველობა, რომელიც ბალახის საფარზე ტარდება და სადაც შვეიცარიელი ყოველ წელს ასპარეზობს უიმბლდონის წინ, ფედერერმა რუსი მიხეილ იუჟნი სამ სეტში დაამარცხა.

ავსტრალიის ღია პირველობაზე შვეიცარიელი ნახევარფინალში 5 სეტში ენდი მარისთან დამარცხდა. ეს იყო პირველი შემთხვევა, როდესაც მარიმ დიდი სლემის ტურნირებზე შეძლო ფედერერის დამარცხება. საფრანგეთის ღია პირველობაზე შვეიცარიელი მეოთხედფინალში ცონგასთან სამ სეტში დამარცხდა.

უიმბლდონის მეორე რაუნდში ფედერერი რეიტინგში 116-ე ჩოგანთან, უკრაინელ სერგეი სტახოვსკისთან 4 სეტში დამარცხდა. 2002 წლის შემდეგ, ეს იყო შვეიცარიელის ყველაზე ცუდი შედეგი უიმბლდონზე. ამ წაგებამდე, ფედერერი ზედიზედ 36-ჯერ იყო გასული დიდი სლემის ტურნირების მეოთხედფინალებში. აშშ-ის ღია პირველობაზე იგი მეოთხე რაუნდში ესპანელ ტომი რობრედოსთან სამ სეტში დამარცხდა.

27 დეკემბერს ფედერერმა დაადასტურა, რომ მის სამწვრთელო შტაბს ლეგენდარული შვედი ჩოგბურთელი – სტეფან ედბერგი შეუერთდებოდა.

2014: დეივისის თასზე გამარჯვება

 

სეზონის დასაწყისში, პირველად თავის კარიერაში ფედერერმა ჩოგანი შეიცვალა და უფრო დიდი ზომის ჩოგნით დაიწყო თამაში. მცირე ზომის ჩოგანი შვეიცარიელს ბევრ მოთამაშესთან ხშირად არახელსაყრელ მდგომარეობაში აგდებდა.

ავსტრალიის ღია პირველობაზე ფედერერი ჟო-ვილფრიდ ცონგას და ენდი მარის ძლევის შემდეგ, ნახევარფინალში ნადალთან სამ სეტში დამარცხდა.

ATP-ის მსოფლიო ტურის 500 სერიების დუბაის ტურნირზე, ფედერერმა ფინალში ბერდიხი დაამარცხა და მეექვსედ მოიგო ტურნირი. შემდეგ ტურნირზე, ინდიან უელსის მასტერსზე შვეიცარიელი კვლავ გავიდა ფინალში, სადაც მძიმე ბრძოლაში ჯოკოვიჩთან დამარცხდა. ერთ თვეში ფედერერი კვლავ შეხვდა სერბ ჩოგბურთელს, ამჯერად მონტე-კარლოს მასტერსის ნახევარფინალში, სადაც ორ სეტში დაამარცხა იგი და ფინალში გავიდა. ფინალში ფედერერი თანამემამულე სტანისლას ვავრინკასთან 3 სეტში დამარცხდა.

საფრანგეთის ღია პირველობაზე ფედერერი მეოთხე რაუნდში მოულოდნელად დამარცხდა ლატვიელ ერნესტ გულბისთან. ეს იყო მისი ყველაზე ცუდი გამოსვლა თიხის სლემზე 2004 წლის შემდეგ.

1 თვეში ფედერერი უიმბლდონზე ფინალში გავიდა. ეს იყო მისი მე-9 უიმბლდონის ფინალი. 5 სეტიან მძიმე ბრძოლაში საბოლოოდ იგი ჯოკოვიჩთან დამარცხდა.

შვეიცარიელმა კვლავ განაგრძო მასტერსის ტურნირებზე ფინალებში გასვლა. კანადის მასტერსზე იგი ცონგასთან დამარცხდა, ხოლო ცინცინატიში ფერერი დაამარცხა და მეექვსედ მოიგო აღნიშნული ტურნირი. აშშ-ის ღია პირველობაზე ფედერერი ნახევარფინალამდე მივიდა, სადაც ხორვატ მარინ ჩილიჩთან სამ სეტში დამარცხდა.

ოქტომბერში ფედერერმა კარიერაში პირველად მოიგო შანხაის მასტერსი. ფინალში მან ფრანგი ჟილ სიმონი დაამარცხა 2 სეტში და კარიერაში 23-ე მასტერსის ტურნირი მოიგო. ამ გამარჯვების შემდეგ, 2013 წლის შემდეგ შვეიცარიელი პირველად გადავიდა რეიტინგში მეორე ადგილზე. იმავე თვეში, მან მეექვსედ მოიგო ბაზელის ტურნირი. ფედერერი მოეხსნა წლის შემაჯამებელი ტურნირის ფინალიდან ზურგის პრობლემის გამო, რომელიც მას კვლავ გაუმიზეზდა ვავრინკასთან ნახევარფინალური მატჩის დროს.

ერთ კვირაში ფედერერმა დეივისის თასის ფინალში ითამაშა რიშარ გასკეს წინააღმდეგ. საფრანგეთის ქალაქ ლილში თიხის საფარზე შვეიცარიელმა სამ სეტში – 6–4, 6–2, 6–2 დაამარცხა მეტოქე და შვეიცარიის ნაკრებთან ერთად კარიერაში პირველად მოიგო აღნიშნული ტურნირი. მატჩს ჩოგბურთისთვის სარეკორდო 27,448 ადამიანი დაესწრო.

2015: მე-1000 გამარჯვება, უიმბლდონის და აშშ-ის ღია პირველობის ფინალები

 

ფედერერმა სეზონი ბრიზბენის ტურნირზე გამარჯვებით დაიწყო. ფინალში მან კანადელი მილოშ რაონიჩი დაამარცხა. ეს იყო მის კარიერაში მე-1000 მოგებული მატჩი, მამაკაც ჩოგბურთელთა ისტორიაში ყველაზე მეტი ამერიკელი ჯიმი კონორსის და ჩეხი ივან ლენდლის შემდეგ. ავსტრალიის ღია პირველობაზე ფედერერი მესამე რაუნდში მოულოდნელად დამარცხდა იტალიელ ანდრეას სეპისთან 4 სეტში. აღნიშნულ სლემზე, ეს იყო შვეიცარიელის ყველაზე ცუდი შედეგი 2001 წლის შემდეგ.

დუბაიში ფედერერმა ჯოკოვიჩი ფინალში 2 სეტში დაამარცხა და მეშვიდედ მოიგო ტურნირი. მარტში შვეიცარიელი ინდიან უელსის მასტერსის ფინალში წინა წლის მსგავსად სამ სეტში დამარცხდა სერბთან.

2012 წლის შემდეგ ფედერერმა პირველად მოიგო ტურნირი თიხის საფარზე. სტამბოლის ტურნირზე მან ფინალში ურუგვაელი პაბლო კუევასი 2 სეტში დაამარცხა. შვეიცარიელი რომის მასტერსის ფინალშიც გავიდა, სადაც ჯოკოვიჩთან დამარცხდა. საფრანგეთის ღია პირველობაზე ფედერერი მეოთხედფინალში ვავრინკამ სამ სეტში დაამარცხა.

ბალახის სეზონი ფედერერმა კარგად დაიწყო, როდესაც მერვედ მოიგო ჰალეს ღია პირველობა. უიმბლდონის ნახევარფინალში ენდი მარის სამ სეტში დამარცხების შემდეგ, შვეიცარიელი ფინალში ჯოკოვიჩთან 4 სეტში დამარცხდა.

მარის და ჯოკოვიჩს ფედერერი კვლავ შეხვდა, ამჯერად ცინცინატის მასტერსზე და ორივე დაამარცხა. შედეგად შვეიცარიელმა მეშვიდედ მოიგო აღნიშნული მასტერსის ტურნირი. აშშ-ის ღია პირველობაზე ფედერერი ფინალში სეტის წაუგებლად გავიდა. აღსანიშნავია ნახევარფინალში ვავრინკას სამ სეტში დამარცხება, თუმცა ფინალში შვეიცარიელი კვლავ დამარცხდა ნოვაკ ჯოკოვიჩთან. 2009 წლის შემდეგ, ეს იყო ფედერერის პირველი ფინალი აშშ-ის ღია პირველობაზე.

შემოდგომაზე შვეიცარიელმა მეშვიდედ მოიგო ბაზელის ტურნირი. ფინალში მან რაფაელ ნადალი სამ სეტში დაამარცხა. 2012 წლის ინდიან უელსის შემდეგ, ეს იყო ფედერერის პირველი გამარჯვება ძველ მეტოქეზე. ნოემბერში წლის შემაჯამებელი ტურნირის ფინალში შვეიცარიელი ჯოკოვიჩთან ორ სეტში დამარცხდა.

დეკემბერში ფედერერმა განაცხადა, რომ სტეფან ედბერგი ტოვებდა სამწვრთნელო შტაბს, მის ნაცვლად კი შვეიცარიელს ყოფილი ჩოგბურთელი – ხორვატი ივან ლიუბიჩიჩი შეუერთდებოდა.

2016: მუხლის ოპერაცია და ხანგრძლივი შესვენება

 

ფედერერმა სეზონი ისევ ბრიზბენის ტურნირზე ასპარეზობით დაიწყო. ფინალში ის კვლავ რაონიჩს შეხვდა, თუმცა ამჯერად დამარცხდა. ავსტრალიის ღია პირველობაზე შვეიცარიელი ნახევარფინალამდე მივიდა, სადაც ჯოკოვიჩთან 4 სეტში დამარცხდა. მარცხიდან მომდევნო დღეს, ფედერერმა მუხლის ტრავმა მიიღო. თებერვალში მას ოპერაცია ჩაუტარდა და საბოლოოდ ჩოგბურთს იგი აპრილში, მონტე-კარლოს მასტერსზე დაუბრუნდა, სადაც მეოთხედფინალში ცონგასთან დამარცხდა. მადრიდის მასტერსის დაწყების წინ ვარჯიშზე მან ზურგის ტრავმა მიიღო და მოეხსნა ტურნირიდან.

მაისში ფედერერმა განაცხადა, რომ არ მიიღებდა მონაწილეობას საფრანგეთის ღია პირველობაზე. ეს იყო პირველი შემთხვევა 2000 წლის ავსტრალიის ღია პირველობის შემდეგ, როდესაც ფედერერი არ გამოვიდოდა დიდი სლემის ტურნირზე.

შვეიცარიელი უიმბლდონზე დაბრუნდა. მეოთხედფინალში მიუხედავად იმისა, რომ მარინ ჩილიჩთან სეტებში 0–2-ს აგებდა, მან შემოატრიალა მატჩი და ნახევარფინალში გავიდა, სადაც რაონიჩთან 5 სეტში დამარცხდა. ეს იყო ფედერერის პირველი წაგება უიმბლდონის ნახევარფინალებში.

26 ივლისს ფედერერმა დაადასტურა, რომ ის გამოტოვებდა 2016 წლის დარჩენილ ტურნირებს, მათ შორის რიო-დე-ჟანეიროს ოლიმპიურ თამაშებს მუხლის ტრავმის ბოლომდე მოსარჩენად.

2017: დაბრუნება, მე-5 ავსტრალიის ღია პირველობა და რეკორდული მე-8 უიმბლდონი

 

6 თვიანი შესვენების შემდეგ, ფედერერი იანვარში დაუბრუნდა ჩოგბურთს. ჰოპმანის თასზე მან რამდენიმე მატჩი ჩაატარა, შემდეგ კი ავსტრალიის ღია პირველობაზე მიიღო მონაწილეობა. დიდი ხნის უთამაშებლობის გამო, ფედერერი რეიტინგში ჩამოქვეითდა და ავსტრალიის დიდ სლემზე მე-17 ჩოგნად იყო განთესილი, რაც მისი ყველაზე დაბალი პოზიცია იყო 15 წლის მანძილზე. ტოპ 10-ის წევრების – ტომაშ ბერდიხის და იაპონელი კეი ნისიკორის დამარცხების შემდეგ, შვეიცარიელმა მიშა ზვერევს სძლია და ნახევარფინალში გავიდა. 1991 წლის შემდეგ, ფედერერი ყველაზე ასაკოვანი ნახევარფინალისტი გახდა დიდი სლემის ტურნირებზე. ნახევარფინალში მან სტანისლას ვავრინკა 5 სეტში დაამარცხა და ფინალში რაფაელ ნადალს შეხვდა. მძიმე 5 სეტიან ბრძოლაში შვეიცარიელმა დაამარცხა ძველი მეტოქე და მეხუთედ მოიგო ავსტრალიის ღია პირველობა. 2007 წლის უიმბლდონის ფინალის შემდეგ, დიდი სლემის ტურნირებზე ფედერერმა პირველად დაამარცხა ნადალი. შვეიცარიელი გახდა დიდი სლემის ტურნირების ყველაზე ასაკოვანი გამარჯვებული, ავსტრალიელი კენ როზუოლის შემდეგ 1972 წელს.

მარტში ფედერერმა მეხუთედ მოიგო ინდიან უელსის მასტერსი, როდესაც ფინალში ვავრინკა 2 სეტში დაამარცხა. აღსანიშნავია შვეიცარიელის დამაჯერებელი გამარჯვება ნადალზე მეოთხე რაუნდში. ეს იყო ფედერერის კარიერაში 25-ე მასტერსი და ჯამში 90-ე ტიტული ერთეულებში. მომდევნო ტურნირზე – მაიამის მასტერსზე, ფედერერი კვლავ ნადალს შეხვდა ფინალში და ორ სეტში დაამარცხა იგი: 6–3, 6–4. ამ გამარჯვებით, შვეიცარიელმა რეიტინგში მე-4 ადგილზე გადაინაცვლა.

ასაკის და შესაძლო გადატვირთვის გამო, ფედერერმა გადაწყვიტა, რომ მთლიანად გამოეტოვებინა თიხის სეზონი და მათ შორის საფრანგეთის ღია პირველობა. ბალახის სეზონის დასაწყისში, შვეიცარიელი შტუტგარტის ღია პირველობაზე მოულოდნელად დამარცხდა ტომი ჰაასთან. მომდევნო კვირას, მან მეცხრედ მოიგო ჰალეს ღია პირველობა. ფინალში ფედერერმა დამაჯერებლად დაამარცხა ახალგაზრდა ალექსანდრე ზვერევი. უიმბლდონზე ბულგარელი გრიგორ დიმიტროვის, მილოშ რაონიჩის და ტომაშ ბერდიხის დამარცხების შემდეგ, ფედერერი სეტის წაუგებლად გავიდა ფინალში, სადაც მარინ ჩილიჩი სამ სეტში დამაჯერებლად დაამარცხა და მერვედ მოიგო უიმბლდონი. ამ გამარჯვებით ფედერერმა გადაუსწრო ბრიტანელ უილიამ რენშოუს და პიტ სამპრასს, რომლებსაც 7-7 უიმბლდონი ჰქონდათ მოგებული და ინგლისური ბალახის სლემის რეკორდსმენი გახდა. 1976 წლის შემდეგ, ფედერერი გახდა პირველი ჩოგბურთელი, რომელმაც უიმბლდონი სეტის წაუგებლად მოიგო. 2007 წლის ავსტრალიის ღია პირველობასთან ერთად, შვეიცარიელმა კარიერაში მეორედ მოიგო დიდი სლემის ტურნირი სეტის წაუგებლად.

აგვისტოში ფედერერი კანადის მასტერსის ფინალში გავიდა, სადაც ალექსანდრე ზვერევთან დამარცხდა. მატჩის დროს მან ზურგის ტრავმა მიიღო და ამის გამო შვეიცარიელი ცინცინატის მასტერსიდან მოეხსნა. აშშ-ის ღია პირველობაზე ფედერერმა მეოთხედფინალამდე მიაღწია, სადაც დელ პოტროსთან 4 სეტში დამარცხდა.

სექტემბრის ბოლოს ფედერერმა ლეივერის თასის პირველ გათამაშებაში მიიღო მონაწილეობა, სადაც ევროპის ნაკრები წარმოადგინა. პირველ მატჩში მან ამერიკელი სემ ქუერი 2 სეტში დაამარცხა. იმავე დღეს ფედერერი კარიერაში პირველად რაფაელ ნადალთან გამოვიდა წყვილებში, სადაც მათ ამერიკელები სემ ქუერი და ჯეკ სოკი დაამარცხეს. მომდევნო დღეს ტურნირის ბოლო მატჩში, ფედერერმა ავსტრალიელი ნიკ კირიოსი მძიმე მატჩში დაამარცხა და ევროპის ნაკრებს ლეივერის თასი მოაგებინა.

ოქტომბერში ფედერერმა შანხაის მასტერსი მოიგო. ნახევარფინალში ის კვლავ დელ პოტროს შეხვდა და ამჯერად სამ სეტში დაამარცხა არგენტინელი. ფინალში შვეიცარიელი რაფაელ ნადალს დაუპირისპირდა და ორ სეტში დაამარცხა მეტოქე: 6–4, 6–3. კარიერაში პირველად, ფედერერმა ზედიზედ ხუთჯერ შეძლო ნადალის დამარცხება. შანხაის მასტერსი გახდა ფედერერის კარიერაში მოგებული 94-ე ტურნირი ერთეულთა თანრიგში. ამ მაჩვენებლით ის ივან ლენდლს გაუთანაბრდა. თვის ბოლოს, ფედერერმა მერვედ მოიგო მშობლიურ ქალაქ ბაზელში მიმდინარე ტურნირი. ფინალში მან მძიმე სამ სეტიან მატჩში დელ პოტრო დაამარცხა: 6–7^(5–7), 6–4, 6–3. შვეიცარიელმა 2007 წლის შემდეგ პირველად შეძლო 7, ან მეტი ტიტულის მოგება ერთ სეზონში. ბაზელში გამარჯვებით, ფედერერმა მეორე ადგილზე გადაინაცვლა მამაკაც ჩოგბურთელებში ყველაზე მეტი მოგებული ტურნირით ჯიმი კონორსის შემდეგ, რომელსაც ერთეულებში 109 ტიტული აქვს მოგებული. აღსანიშნავია, რომ ფედერერი რეკორდსმენ ნადალს გაუთანაბრდა ATP-ის მსოფლიო ტურის 500 სერიების ტურნირების რაოდენობით, 19 ტიტულით. შვეიცარიელი შემდეგ პარიზის მასტერსიდან მოეხსნა. ნოემბერში ფედერერი წლის შემაჯამებელი ტურნირის ნახევარფინალში ბელგიელ დავიდ გოფენთან სამ სეტში დამარცხდა და 2017 წელს დაასრულა ასპარეზობა. სეზონის განმავლობაში შვეიცარიელმა 7 ტურნირზე გაიმარჯვა, მოიგო 52 მატჩი, წააგო 5 და წელიწადი რეიტინგში მეორე ადგილზე დაასრულა.

2018: მე-20 დიდი სლემის ტიტული და რეიტინგში პირველ ადგილზე დაბრუნება

ფედერერმა 2018 წლის სეზონი ჰოპმანის თასზე გამარჯვებით დაიწყო, სადაც მისი მეწყვილე ბელინდა ბენჩიჩი იყო. ეს ფედერერის მეორე გამარჯვება იყო აღნიშნულ ტურნირზე 2001 წლის შემდეგ, როდესაც მან მარტინა ჰინგისთან ერთად მოიგო გათამაშება. ავსტრალიის ღია პირველობაზე შვეიცარიელი სეტის წაგების გარეშე გავიდა ფინალში, სადაც 5 სეტიან მატჩში მარინ ჩილიჩი დაამარცხა და მეექვსედ მოიგო აღნიშნული დიდი სლემის ტურნირი. ამ მოგებით იგი ავსტრალიის ღია პირველობის ერთ-ერთი რეკორდსმენი გახდა როი ემერსონთან და ნოვაკ ჯოკოვიჩთან ერთად. აღნიშნული გამარჯვებით, ფედერერი ასევე გახდა ისტორიაში პირველი მამაკაცი ჩოგბურთელი, ვინც 20 დიდი სლემის ტურნირის მოგება შეძლო.

თებერვალში ფედერერმა როტერდამის ღია პირველობის მეოთხედფინალში ნიდერლანდელი რობინ ჰასე დაამარცხა და მსოფლიო რეიტინგში პირველ ადგილს დაუბრუნდა. ამ გამარჯვებით, 36 წლის ასაკში იგი გახდა ყველაზე ასაკოვანი მსოფლიოს პირველი ჩოგანი მამაკაცთა ჩოგბურთის ისტორიაში. ფინალში შვეიცარიელმა გრიგორ დიმიტროვი ორ სეტში დაამარცხა და 2018 წლის მეორე ტიტული მოიგო.

მარტში ფედერერი ინდიან უელსის მასტერსზე გამოვიდა ჩემპიონის რანგში. ნახევარფინალში ხორვატი ბორნა ჩორიჩის დამარცხებით, მან სეზონის დაწყებიდან ზედიზედ მე-17 მატჩი მოიგო, რაც კარიერაში შვეიცარიელის საუკეთესო შედეგი იყო. ფინალში ფედერერი დელ პოტროსთან მძიმე სამ სეტიან მატჩში დამარცხდა მიუხედავად იმისა, რომ ჰქონდა გამარჯვების შანსები. ფედერერი შემდეგ მაიამის მასტერსზე ასევე ჩემპიონის რანგში გამოვიდა, სადაც მოულოდნელად სამ სეტში დათმო შეხვედრა ავსტრალიელ თანასი კოკინაკისთან. ამ მარცხით შვეიცარიელმა დაკარგა რეიტინგში პირველი ადგილი. წინა წლის მსგავსად, ფედერერმა მთლიანად გამოტოვა თიხის სეზონი, მათ შორის საფრანგეთის ღია პირველობა.

ივნისში ფედერერმა კარიერაში პირველად მოიგო შტუტგარტის ღია პირველობა ბალახის საფარზე და კიდევ ერთხელ გადაინაცვლა რეიტინგში პირველ ადგილზე. ერთ კვირაში იგი მომდევნო ტურნირის – ჰალეს ღია პირველობის ფინალში დამარცხდა ბორნა ჩორიჩთან და დაკარგა უმაღლესი რეიტინგი. უიმბლდონზე ფედერერი პირველ ნომრად იყო განთესილი, სადაც მეოთხედფინალში პირველი ორი სეტის მოგების მიუხედავად, იგი ხუთ სეტში დამარცხდა სამხრეთ აფრიკის რესპუბლიკის წარმომადგენელ კევინ ანდერსონთან.

აგვისტოში ფედერერი ცინცინატის მასტერსის ფინალში გავიდა, სადაც ნოვაკ ჯოკოვიჩთან ორ სეტში დამარცხდა. აღნიშნული მარცხით, შვეიცარიელს ცინცინატის მასტერსზე ზედიზედ 14 მატჩიანი მოგებათა სერია შეუწყდა. აშშ-ის ღია პირველობაზე ფედერერი მეორე ნომრად იყო განთესილი. იგი მეოთხე რაუნდში ოთხ სეტში მოულოდნელად დამარცხდა ავსტრალიელ ჯონ მილმანთან.

სექტემბრის ბოლოს ფედერერმა ლეივერის თასის მეორე გათამაშებაში მიიღო მონაწილეობა. ერთეულთა თანრიგში მან ნიკ კირიოსი და ჯონ იზნერი დაამარცხა და ზედიზედ მეორედ დაეხმარა ევროპის ნაკრებს ტურნირის მოგებაში. აღსანიშნავია, რომ ამ ტურნირზე ფედერერმა კარიერაში პირველად ითამაშა წყვილებში ნოვაკ ჯოკოვიჩთან ერთად, სადაც ისინი კევინ ანდერსონთან და ჯეკ სოკთან დამარცხდნენ.

ოქტომბერში შვეიცარიელმა მოქმედი ჩემპიონის რანგში შანხაის მასტერსზე მიიღო მონაწილეობა, სადაც ნახევარფინალში ბორნა ჩორიჩთან ორ სეტში დამარცხდა. ფედერერი შემდეგ მშობლიურ ბაზელის ტურნირზე გამოვიდა, სადაც იგი მეცხრედ გახდა ჩემპიონი ფინალში რუმინელი მარიუს კოპილის დამარცხების შემდეგ. ეს იყო შვეიცარიელის 99-ე ტიტული კარიერაში ერთეულთა თანრიგში და მეოთხე 2018 წელს.

ნოემბერში პარიზის მასტერსზე ფედერერმა ნახევარფინალამდე მიაღწია, სადაც სამ საათიან მძიმე მატჩში ჯოკოვიჩთან სამ სეტში დამარცხდა. წლის შემაჯამებელ ტურნირზე, ფედერერი ნახევარფინალში გავიდა, სადაც მომავალ ჩემპიონ ალექსანდრე ზვერევთან ორ სეტში დამარცხდა და წელიწადი რეიტინგში მესამე ადგილზე დაასრულა.

  მთავარი სტატია: დიდი ოთხეული (ჩოგბურთი).

ფედერერი–ნადალი

  მთავარი სტატია: ნადალი–ფედერერის მეტოქეობა.

როჯერ ფედერერი და რაფაელ ნადალი პირველად 2004 წელს დაუპირისპირდნენ ერთმანეთს. მათ მეტოქეობას უმნიშვნელოვანესი ადგილი უკავია ორივე ჩოგბურთელის კარიერაში და ზოგადად ჩოგბურთის ისტორიაში.

2005 წლის ივლისიდან 2009 წლის 17 აგვისტომდე ისინი რეიტინგში პირველი და მეორე ჩოგნები იყვნენ. ფედერერს 2004 წლის თებერვლიდან მოყოლებული, 237 კვირის განმავლობაში ეკავა პირველი ადგილი. ნადალი, რომელიც 5 წლით უმცროსია, მეორე ადგილზე აღზევდა 2005 წლის ივლისში და 160 კვირის განმავლობაში იყო ამ პოზიციაზე, სანამ არ გადაუსწრო ფედერერს 2008 წლის აგვისტოში.

ნადალი ლიდერობს ურთიერთშეხვედრებში: 23–15. მას უპირატესობა აქვს თიხის საფარზე (13–2) და ღია ჰარდკორტებზე (8–6). ფედერერი ლიდერობს ბალახზე (2–1) და დახურულ ჰარდკორტებზე (5–1). ჯამში ფედერერს აქვს მცირე უპირატესობა ჰარდ კორტებზე: 11–9. ფედერერი და ნადალი დიდი სლემის ტურნირებზე 12-ჯერ დაუპირისპირდნენ ერთმანეთს: 9-ჯერ ესპანელმა გაიმარჯვა და 3-ჯერ შვეიცარიელმა. ჩოგბურთელები 24-ჯერ შეხვდნენ ერთმანეთს ფინალებში (ნადალი 14–10), აქედან 6-ჯერ დიდი სლემის ტურნირების ფინალებში (ნადალი 6–3). 2006-დან 2008 წლის ჩათვლით ფედერერმა და ნადალმა საფრანგეთის ღია პირველობის და უიმბლდონის ყველა ფინალში ითამაშეს. ისინი ასევე შეხვდნენ 2009 წელს ავსტრალიაში, 2011 წელს საფრანგეთში და 2017 წელს ისევ ავსტრალიაში). ჩოგბურთის ექსპერტების დიდი ნაწილი 2008 წლის უიმბლდონის ფინალს ყველა დროის საუკეთესო მატჩად მიიჩნევს. ისინი 12-ჯერ შეხვდნენ ერთმანეთს მასტერსის ფინალებში (ნადალი 7–5) და ერთხელ წლის შემაჯამებელი ტურნირის ფინალში (ფედერერი 1–0). 37 შეხვედრიდან 13-ში გადამწყვეტი სეტი გახდა საჭირო. ყველაზე ხანგრძლივი მატჩი ჩოგბურთელებს შორის – რომის მასტერსის ფინალი 2006 წელს, 5 საათსა და 5 წუთს გაგრძელდა.

ფედერერი–ჯოკოვიჩი

  მთავარი სტატია: ფედერერი–ჯოკოვიჩის მეტოქეობა.

 

როჯერ ფედერერი და ნოვაკ ჯოკოვიჩი 46-ჯერ დაუპირისპირდნენ ერთმანეთს. ჯოკოვიჩს უპირატესობა აქვს: 25–22. ჯოკოვიჩი ლიდერობს ჰარდზე 19–17 და ბალახზე 2–1, ხოლო თიხაზე თანაფარდობაა 4–4. დიდი სლემის ტურნირებზე 9 მატჩი მოიგო სერბმა და 6 შვეიცარიელმა.

პირველად დიდი სლემის ფინალში მათ 2007 წლის აშშ-ის ღია პირველობაზე ითამაშეს, როდესაც ფედერერმა სამ სეტში დაამარცხა მეტოქე. 2011 წელს საფრანგეთის ღია პირველობაზე, ნახევარფინალში ფედერერმა 4 სეტში დაამარცხა სერბი და შეუწყვიტა ზედიზედ 41 მატჩიანი მოგებების სერია. ჯოკოვიჩმა აშშ-ის ღია პირველობის ნახევარფინალში აიღო რევანში და 5 სეტიან მძიმე მატჩში დაამარცხა შვეიცარიელი. 2012 წელს უიმბლდონის ნახევარფინალში ფედერერმა სძლია მეტოქეს, ხოლო იმავე ტურნირის ფინალებში 2014 და 2015 წლებში, ჯოკოვიჩმა იზეიმა გამარჯვებები. სერბი გახდა ისტორიაში პირველი ჩოგბურთელი, რომელმაც ორჯერ შეძლო ფედერერის უიმბლდონზე დამარცხება. 2015 წლის აშშ-ის ღია პირველობის ფინალში ისევ ჯოკოვიჩმა დაამარცხა მეტოქე 4 სეტში.

ჩოგბურთელები 18-ჯერ შეხვდნენ ერთმანეთს ფინალებში (ჯოკოვიჩი 12–6), აქედან 8-ჯერ მასტერსის ფინალებში (ჯოკოვიჩი 5–3) და ორჯერ წლის შემაჯამებელი ტურნირის ფინალში (ჯოკოვიჩი 2–0). ფედერერმა და ჯოკოვიჩმა ერთხელ დეივისის თასზეც ითამაშეს (ფედერერი 1–0). 47 შეხვედრიდან 18-ში გადამწყვეტი სეტი გახდა საჭირო.

ფედერერი–მარი

  მთავარი სტატია: მარი–ფედერერის მეტოქეობა.

 

როჯერ ფედერერი და ენდი მარი 25-ჯერ დაუპირისპირდნენ ერთმანეთს. შვეიცარიელი ლიდერობს ურთიერთშეხვედრებში: 14–11. ჰარდ კორტებზე (12–10) და ბალახზე (2–1) ფედერერს აქვს უპირატესობა, ხოლო თიხის საფარზე მოთამაშეები არასდროს შეხვედრიან.

ჩოგბურთელები 6-ჯერ შეხვდნენ დიდი სლემის ტურნირებზე (ფედერერი 5–1), აქედან 3-ჯერ ფინალში. ყველა მათგანში – 2008 წლის აშშ-ის ღია პირველობის, 2010 წლის ავსტრალიის ღია პირველობის და 2012 წლის უიმბლდონის ფინალებში ფედერერმა იმარჯვა. მარიმ 2013 წლის ავსტრალიის ღია პირველობის ნახევარფინალში გაიმარჯვა, თუმცა მომდევნო წელს იმავე ტურნირის მეოთხედფინალში შვეიცარიელმა აიღო რევანში. 2015 წლის უიმბლდონის ნახევარფინალში, ფედერერმა 3 სეტში დაამარცხა მეტოქე. 2012 წლის ლონდონის ოლიმპიური თამაშების ფინალში, ბრიტანელმა 3 სეტში სძლია შვეიცარიელს და ოქროს მედლები დაისაკუთრა.

ფედერერი და მარი 8-ჯერ შეხვდნენ ერთმანეთს ფინალებში (ფედერერი 5–3), აქედან 2-ჯერ მასტერსის ტურნირების გადამწყვეტ მატჩებში (მარი 2–0). ნადალის და ჯოკოვიჩის გარდა, მხოლოდ მარის ჰყავს ფედერერი 10-ჯერ, ან მეტჯერ დამარცხებული.

ფედერერი–როდიკი

  მთავარი სტატია: როდიკი–ფედერერის მეტოქეობა.

როჯერ ფედერერი და ენდი როდიკი 24-ჯერ დაუპირისპირდნენ ერთმანეთს. შვეიცარიელს ურთიერთშეხვედრებში უზარმაზარი უპირატესობა ჰქონდა: 21–3.

როდიკი რეიტინგში პირველი ჩოგანი იყო, სანამ ფედერერი ავსტრალიის ღია პირველობას მოიგებდა 2004 წელს და კარიერაში პირველად გადავიდოდა პირველ ადგილზე. ჩოგბურთელები 8-ჯერ შეხვდნენ ერთმანეთს დიდი სლემის მატჩებში და ყველა მატჩი ფედერერმა მოიგო, აქედან 4 ფინალი (3 უიმბლდონზე). აღსანიშნავია 2009 წლის უიმბლდონის გადამწყვეტი მატჩი, რომელიც 4.17 საათი გაგრძელდა და სადაც შვეიცარიელმა 5 სეტიან მძიმე ბრძოლაში გაიმარჯვა. საინტერესოა, რომ ბოლო 24-ე შეხვედრაში როდიკმა გაიმარჯვა.

ფედერერი–ჰიუიტი

როჯერ ფედერერი და ლეიტონ ჰიუიტი 27-ჯერ დაუპირისპირდნენ ერთმანეთს. შვეიცარიელმა 18 მატჩში გაიმარჯვა, ავსტრალიელმა კი 9-ჯერ.

დიდი სლემის ტურნირებზე ჩოგბურთელები 8-ჯერ შეხვდნენ და ყველა მათგანში ფედერერმა გაიმარჯვა, აქედან ერთხელ ფინალში – აშშ-ის ღია პირველობაზე 2004 წელს. პირველი 9-დან 7 მატჩი ჰიუიტმა, ხოლო ბოლო 18-დან 16 შეხვედრა ფედერერმა მოიგო.

ფედერერმა და ჰიუიტმა 1999 წელს უიმბლდონის წყვილთა თანრიგში ერთად ითამაშეს და მესამე რაუნდამდე მიღწიეს.

ფედერერი–ნალბანდიანი

როჯერ ფედერერი და დავიდ ნალბანდიანი 19-ჯერ დაუპირისპირდნენ ერთმანეთს. ფედერერმა 11 მატჩი მოიგო, ხოლო ნალბანდიანმა 8.

ნალბანდიანი ფედერერის კარიერაში პირველი სერიოზული მეტოქე იყო. პირველი 5 მატჩი ჩოგბურთელებს შორის ნალბანდიანმა მოიგო. 2003 წელს მან ორჯერ დაამარცხა შვეიცარიელი დიდი სლემის ტურნირებზე: ავსტრალიის ღია პირველობაზე და აშშ-ის ღია პირველობაზე. შემდეგი 14-დან 11 მატჩი ფედერერმა მოიგო. დიდი სლემის ტურნირებზე ჩოგბურთელებმა 6 მატჩი გამართეს. 4-ში ფედერერმა, ხოლო 2 მატჩში ნალბანდიანმა გაიმარჯვა. წლის შემაჯამებელი ტურნირზე ჩოგბურთელები 4-ჯერ შეხვდნენ ერთმანეთს. ორივემ 2-2 მატჩი მოიგო.

ფედერერი–საფინი

როჯერ ფედერერი და მარატ საფინი 12-ჯერ დაუპირისპირდნენ ერთმანეთს. შვეიცარიელმა ჩოგბურთელმა 10 მატჩი მოიგო, ხოლო რუსმა 2.

დიდი სლემის ტურნირებზე გამართული 5 მატჩიდან 4 ფედერერმა მოიგო, მათ შორის 2004 წლის ავსტრალიის ღია პირველობის ფინალი. 2002 წელს ფედერერმა ჰამბურგის მასტერსის ფინალში დაამარცხა მეტოქე და კარიერაში პირველი მასტერსის ტურნირი მოიგო. საფინისთვის ყველაზე მნიშვნელოვანი გამარჯვება ფედერერთან დაფიქსირდა 2005 წლის ავსტრალიის ღია პირველობის ნახევარფინალში, როდესაც მან 5 სეტიან მძიმე მატჩში სძლია მეტოქეს და ფინალში გავიდა, სადაც თავის კარიერაში მეორე დიდი სლემის ტურნირი მოიგო.

ფედერერი–აგასი

როჯერ ფედერერი და ანდრე აგასი 11-ჯერ დაუპირისპირდნენ ერთმანეთს. ფედერერმა 8 მატჩი მოიგო, ხოლო აგასიმ 3. ეს იყო ფედერერის ერთადერთი მეტოქეობა წინა თაობის ლეგენდარული ჩოგბურთელებიდან.

აგასიმ პირველი სამი მატჩი მოიგო, მათ შორის აშშ-ის ღია პირველობაზე 2001 წელს და მაიამის მასტერსის ფინალში 2002 წელს. თუმცა შემდეგ 8 მატჩში ფედერერმა იმარჯვა. აღსანიშნავია მისი გამარჯვებები წლის შემაჯამებელი ტურნირის ფინალში 2003 წელს, მეოთხედფინალური მატჩი აშშ-ის ღია პირველობაზე 2004 წელს, მეოთხედფინალური მატჩი ავსტრალიის ღია პირველობაზე 2005 წელს და ფინალი იმავე წლის აშშ-ის ღია პირველობაზე, სადაც ფედერერმა 4 სეტში დაამარცხა მეტოქე.

ფედერერი–ვავრინკა

როჯერ ფედერერი და თანამემამულე სტანისლას ვავრინკა 24-ჯერ დაუპირისპირდნენ ერთმანეთს. ფედერერს ურთიერთშეხვედრებში დიდი უპირატესობა აქვს: 21 მოგება 3 წაგების წინააღმდეგ. ფედერერი სამივე საფარზე ლიდერობს: ჰარდზე 16–0, ბალახზე 1–0 და თიხაზე 4–3.

შვეიცარიელები 7-ჯერ შეხვდნენ დიდი სლემის ტურნირებზე. მათგან ფედერერმა 6 მატჩი მოიგო. 2014 წელს ვავრინკამ მონტე-კარლოს მასტერსის ფინალში, ხოლო ფედერერმა 2017 წლის ინდიან უელსის მასტერსის გადამწყვეტ მატჩში დაამარცხა მეტოქე.

ფედერერმა და ვავრინკამ წყვილთა თანრიგში ერთად თამაშისას წარმატებებს მიაღწიეს. 2008 წელს მათ პეკინის ოლიმპიური თამაშების ოქროს მედლები დაისაკუთრეს, 2014 წელს კი შვეიცარიის ნაკრებთან ერთად დეივისის თასი მოიგეს.

ფედერერი–დელ პოტრო

 

როჯერ ფედერერი და ხუან მარტინ დელ პოტრო 25-ჯერ დაუპირისპირდნენ ერთმანეთს. ფედერერი ლიდერობს ურთიერთშეხვედრებში: 18–7.

დიდი სლემის ტურნირებზე ჩოგბურთელები 7-ჯერ შეხვდნენ ერთმანეთს. 5-ჯერ შვეიცარიელმა გაიმარჯვა, თუმცა არგენტინელმა მოიგო მათ შორის გამართულ ერთადერთ დიდი სლემის ფინალში – აშშ-ის ღია პირველობაზე 2009 წელს, რითაც ხელი შეუშალა ფედერერს ზედიზედ მეექვსედ გაჩემპიონებაში აღნიშნულ სლემზე. დელ პოტრომ ასევე 2017 წლის აშშ-ის ღია პირველობაზე დაამარცხა მეტოქე. ფედერერის მხრიდან მნიშვნელოვანი გამარჯვება იყო 2009 წლის საფრანგეთის ღია პირველობის ნახევარფინალში, სადაც მან 5 სეტიან მძიმე მატჩში დაამარცხა მეტოქე და რამდენიმე დღეში მოიგო კარიერაში პირველი და ერთადერთი თიხის დიდი სლემი. კიდევ ერთი აღსანიშნავი მატჩი იყო 2012 წელს ლონდონის ოლიმპიურ თამაშებზე გამართული ნახევარფინალური მატჩი, სადაც ფედერერმა ბოლო სეტი ანგარიშით 19–17 მოიგო.

ფედერერი–ბერდიხი

როჯერ ფედერერი და ტომაშ ბერდიხი 26-ჯერ დაუპირისპირდნენ ერთმანეთს. ფედერერმა 20 მატჩი მოიგო, ბერდიხმა კი 6.

ჩეხმა მათ შორის გამართული პირველი მატჩი მოიგო. 2004 წლის ათენის ოლიმპიურ თამაშებზე, მან 3 სეტში დაამარცხა მეტოქე. ფედერერმა მომდევნო 8 შეხვედრა მოიგო. 2010-დან 2013 წლებში ჩატარებული 8 მატჩიდან, 5-ში ბერდიხმა გაიმარჯვა. 2014 წლიდან მეტოქეები 9-ჯერ დაუპირისპირდნენ ერთმანეთს და ყველა მატჩი შვეიცარიელმა მოიგო. დიდი სლემის ტურნირებზე ფედერერი ლიდერობს ანგარიშით 8–2.

ფედერერი–ცონგა

როჯერ ფედერერი და ჟო-ვილფრიდ ცონგა 17-ჯერ დაუპირისპირდნენ ერთმანეთს. ფედერერმა 11 მატჩი მოიგო, ცონგამ კი 6.

ჩოგბურთელები 6-ჯერ შეხვდნენ ერთმანეთს დიდი სლემის ტურნირებზე – 4 ჯერ ფედერერმა გაიმარჯვა და 2-ჯერ ცონგამ. მასტერსის ტურნირების ფინალებში მეტოქეები ორჯერ დაუპირისპირდნენ: 2011 წელს პარიზის მასტერსზე ფედერერმა, ხოლო 2014 წელს კანადის მასტერსზე ცონგამ იმარჯვა. 2011 წელს წლის შემაჯამებელი ტურნირის ფინალში შვეიცარიელმა დაამარცხა მეტოქე.

ფედერერი–ჩილიჩი

როჯერ ფედერერი და მარინ ჩილიჩი 10-ჯერ დაუპირისპირდნენ ერთმანეთს. ფედერერს დიდი უპირატესობა აქვს: 9 მოგება 1 მარცხის წინააღმდეგ.

ჩილიჩმა შვეიცარიელი 2014 წლის აშშ-ის ღია პირველობის ნახევარფინალში სამ სეტში დაამარცხა, ფედერერმა რევანში 2016 წლის უიმბლდონის მეოთხედფინალში აიღო, როდესაც პირველი ორი სეტის დათმობის შემდეგ შემოატრიალა თამაში, ხოლო შემდეგ 2017 წლის უიმბლდონის და 2018 წლის ავსტრალიის ღია პირველობის ფინალებში სძლია ხორვატს. ჯამში მეტოქეები 5-ჯერ შეხვდნენ ერთმანეთს დიდი სლემის ტურნირებზე (ფედერერი 4–1), 4-ჯერ მასტერსის ტურნირებზე (ფედერერი 4–0) და ერთხელ წლის შემაჯამებელი ტურნირის ჯგუფურ ეტაპზე (ფედერერი 1–0).

2020 წლის მაისში ფედერერი გახდა პირველი ჩოგბურთელი, რომელიც ფორბსის „მსოფლიოს ყველაზე შემოსავლიანი ათლეტების სია“ მოხვდა. მის სპონსორებს წარმოადგენენ ტანსაცმლის მწარმოებელი იაპონური კომპანია Uniqlo და შვეიცარული კომპანიები: Nationale Suisse, Credit Suisse, Rolex, Lindt, Sunrise და Jura Elektroapparate. 2010 წელს Mercedes-Benz ჩინეთთან მისი პარტნიორობა გლობალურ პარტნიორობაში გადაიზარდა. მის სპონსორებს ასევე წარმოადგენენ Gillette, Wilson, Barilla და Moët & Chandon. ადრე ის Nike-ის, NetJets-ის, Emmi AG-სა და Maurice Lacroix-ის ბრენდის ელჩი იყო.

  მთავარი სტატია: როჯერ ფედერერის სტატისტიკა და მიღწევები.

დიდი სლემის ტურნირებზე ასპარეზობის შედეგები

ფინალები: 30 (20–10)

შედეგი	წელი	ტურნირი	საფარი	მეტოქე	ანგარიში
გამარჯვება	2003	უიმბლდონი (1)	ბალახი	მარკ ფილიპუსისი	7–6(7–5), 6–2, 7–6(7–3)
გამარჯვება	2004	ავსტრალიის ღია პირველობა (1)	ჰარდი	მარატ საფინი	7–6(7–3), 6–4, 6–2
გამარჯვება	2004	უიმბლდონი (2)	ბალახი	ენდი როდიკი	4–6, 7–5, 7–6(7–3), 6–4
გამარჯვება	2004	აშშ-ის ღია პირველობა (1)	ჰარდი	ლეიტონ ჰიუიტი	6–0, 7–6(7–3), 6–0
გამარჯვება	2005	უიმბლდონი (3)	ბალახი	ენდი როდიკი	6–2, 7–6(7–2), 6–4
გამარჯვება	2005	აშშ-ის ღია პირველობა (2)	ჰარდი	ანდრე აგასი	6–3, 2–6, 7–6(7–1), 6–1
გამარჯვება	2006	ავსტრალიის ღია პირველობა (2)	ჰარდი	მარკოს ბაღდატისი	5–7, 7–5, 6–0, 6–2
მარცხი	2006	საფრანგეთის ღია პირველობა	თიხა	რაფაელ ნადალი	6–1, 1–6, 4–6, 6–7(4–7)
გამარჯვება	2006	უიმბლდონი (4)	ბალახი	რაფაელ ნადალი	6–0, 7–6(7–5), 6–7(2–7), 6–3
გამარჯვება	2006	აშშ-ის ღია პირველობა (3)	ჰარდი	ენდი როდიკი	6–2, 4–6, 7–5, 6–1
გამარჯვება	2007	ავსტრალიის ღია პირველობა (3)	ჰარდი	ფერნანდო გონსალესი	7–6(7–2), 6–4, 6–4
მარცხი	2007	საფრანგეთის ღია პირველობა	თიხა	რაფაელ ნადალი	3–6, 6–4, 3–6, 4–6
გამარჯვება	2007	უიმბლდონი (5)	ბალახი	რაფაელ ნადალი	7–6(9–7), 4–6, 7–6(7–3), 2–6, 6–2
გამარჯვება	2007	აშშ-ის ღია პირველობა (4)	ჰარდი	ნოვაკ ჯოკოვიჩი	7–6(7–4), 7–6(7–2), 6–4
მარცხი	2008	საფრანგეთის ღია პირველობა	თიხა	რაფაელ ნადალი	1–6, 3–6, 0–6
მარცხი	2008	უიმბლდონი	ბალახი	რაფაელ ნადალი	4–6, 4–6, 7–6(7–5), 7–6(10–8), 7–9
გამარჯვება	2008	აშშ-ის ღია პირველობა (5)	ჰარდი	ენდი მარი	6–2, 7–5, 6–2
მარცხი	2009	ავსტრალიის ღია პირველობა	ჰარდი	რაფაელ ნადალი	5–7, 6–3, 6–7(3–7), 6–3, 2–6
გამარჯვება	2009	საფრანგეთის ღია პირველობა (1)	თიხა	რობინ სოდერლინგი	6–1, 7–6(7–1), 6–4
გამარჯვება	2009	უიმბლდონი (6)	ბალახი	ენდი როდიკი	5–7, 7–6(8–6), 7–6(7–5), 3–6, 16–14
მარცხი	2009	აშშ-ის ღია პირველობა	ჰარდი	ხუან მარტინ დელ პოტრო	6–3, 6–7(5–7), 6–4, 6–7(4–7), 2–6
გამარჯვება	2010	ავსტრალიის ღია პირველობა (4)	ჰარდი	ენდი მარი	6–3, 6–4, 7–6(13–11)
მარცხი	2011	საფრანგეთის ღია პირველობა	თიხა	რაფაელ ნადალი	5–7, 6–7(3–7), 7–5, 1–6
გამარჯვება	2012	უიმბლდონი (7)	ბალახი	ენდი მარი	4–6, 7–5, 6–3, 6–4
მარცხი	2014	უიმბლდონი	ბალახი	ნოვაკ ჯოკოვიჩი	7–6(9–7), 4–6, 6–7(4–7), 7–5, 4–6
მარცხი	2015	უიმბლდონი	ბალახი	ნოვაკ ჯოკოვიჩი	6–7(1–7), 7–6(12–10), 4–6, 3–6
მარცხი	2015	აშშ-ის ღია პირველობა	ჰარდი	ნოვაკ ჯოკოვიჩი	4–6, 7–5, 4–6, 4–6
გამარჯვება	2017	ავსტრალიის ღია პირველობა (5)	ჰარდი	რაფაელ ნადალი	6–4, 3–6, 6–1, 3–6, 6–3
გამარჯვება	2017	უიმბლდონი (8)	ბალახი	მარინ ჩილიჩი	6–3, 6–1, 6–4
გამარჯვება	2018	ავსტრალიის ღია პირველობა (6)	ჰარდი	მარინ ჩილიჩი	6–2, 6–7(5–7), 6–3, 3–6, 6–1

წლის შემაჯამებელი ტურნირი

ჯე – ჯგუფური ეტაპი

ფინალები: 10 (6–4)

შედეგი	წელი	ტურნირი	საფარი	მეტოქე	ანგარიში
გამარჯვება	2003	ჩოგბურთის მასტერსის თასი, ჰიუსტონი (1)	ჰარდი	ანდრე აგასი	6–3, 6–0, 6–4
გამარჯვება	2004	ჩოგბურთის მასტერსის თასი, ჰიუსტონი (2)	ჰარდი	ლეიტონ ჰიუიტი	6–3, 6–2
მარცხი	2005	ჩოგბურთის მასტერსის თასი, შანხაი	ხალიჩა (დ)	დავიდ ნალბანდიანი	7–6(7–4), 7–6(13–11), 2–6, 1–6, 6–7(3–7)
გამარჯვება	2006	ჩოგბურთის მასტერსის თასი, შანხაი (3)	ჰარდი (დ)	ჯეიმზ ბლეიკი	6–0, 6–3, 6–4
გამარჯვება	2007	ჩოგბურთის მასტერსის თასი, შანხაი (4)	ჰარდი (დ)	დავიდ ფერერი	6–2, 6–3, 6–2
გამარჯვება	2010	ATP-ის მსოფლიო ტურის ფინალი, ლონდონი (5)	ჰარდი (დ)	რაფაელ ნადალი	6–3, 3–6, 6–1
გამარჯვება	2011	ATP-ის მსოფლიო ტურის ფინალი, ლონდონი (6)	ჰარდი (დ)	ჟო-ვილფრიდ ცონგა	6–3, 6–7(6–8), 6–3
მარცხი	2012	ATP-ის მსოფლიო ტურის ფინალი, ლონდონი	ჰარდი (დ)	ნოვაკ ჯოკოვიჩი	6–7(6–8), 5–7
მარცხი	2014	ATP-ის მსოფლიო ტურის ფინალი, ლონდონი	ჰარდი (დ)	ნოვაკ ჯოკოვიჩი	ტექნიკური წაგება
მარცხი	2015	ATP-ის მსოფლიო ტურის ფინალი, ლონდონი	ჰარდი (დ)	ნოვაკ ჯოკოვიჩი	3–6, 4–6

(დ) – დახურული კორტი

ოლიმპიური ფინალები

ერთეულები: 1 (0–1)

შედეგი	წელი	ტურნირი	საფარი	მეტოქე	ანგარიში
მარცხი (ვერცხლი)	2012	ზაფხულის ოლიმპიური თამაშები 2012	ბალახი	ენდი მარი	2–6, 1–6, 4–6

წყვილები: 1 (1–0)

შედეგი	წელი	ტურნირი	საფარი	მეწყვილე	მეტოქეები	ანგარიში
გამარჯვება (ოქრო)	2008	ზაფხულის ოლიმპიური თამაშები 2008 (1)	ჰარდი	სტანისლას ვავრინკა	სიმონ ასპელინი   თომას იუჰანსონი	6–3, 6–4, 6–7(4–7), 6–3