C'l artìcul chè 'l è scrit in Miranduléś
Umberto Lenzi (Masa Marìtma, 6 'd Agóst dal 1931 - Ròma, 19 'd utòbar 2017, a s lèś [umˈbɛrto ˈlɛnt͡si] in itagliàṅ) 'l è 'n regìsta, un senegiadōr e 'n scritōr itagliàṅ.
Dòp avér ciapâ 'l diplòma a 'l “Séntar sperimentàł ad Cinematugrafìa” in dal 1956 c'n un saǵ su 'n sò curtumetràǵ ciamâ I ragazzi di Trastevere, Lenzi al taca a scrìvar su soquànti rivìsti ad cìnema cuma Bianco e Nero par pò jutàr a la regìa Domenico Paolella in dla pelìcula Il terrore dei mari.
In di an Ssanta al gira dimóndi film 'd aventùra, 'd spiunàǵ e 'd asiòṅ cuma Sandokan, la tigre di Mompracem (1963), A 008, operazione Sterminio (1965) e La legione dei dannati (1969).
In dal 1969 'l invènta 'l gènar dal śal eròtic sufisticâ girànd in dū an soquànt film cun la star americàna Carroll Baker: Orgasmo, Così dolce... così perversa e Paranoia. In di an Stanta al pasa a 'l “śal a l'itagliàna” tgnénd adrē a 'l primi òpri ad Dario Argento cun di tìtui quài Un posto ideale per uccidere (1971), Sette orchidee macchiate di rosso (1972), Il coltello di ghiaccio (1972), Spasmo (1974) e Gatti rossi in un labirinto di vetro (1975).
In séguit Lenzi al fà di film ad sucès dal gènar “pulisiutésc” cuma Milano odia: la polizia non può sparare dal 1974 cun Tomas Milian. Dòp la cumèdia Scusi, lei è normale? dal 1979, in di an Utànta al càmbia incóra pasànd a la scarésa cun Incubo sulla città contaminata, Mangiati vivi!, Cannibal Ferox, La casa 3 - Ghosthouse e Nightmare Beach - La spiaggia del terrore. In dal 1989 al gira anc dū film par la televiśiòṅ, La casa del sortilegio e La casa delle anime erranti.
Al sò ùltim film 'l è Hornsby e Rodriguez - Sfida criminale dal 1992.
This article uses material from the Wikipedia Emiliàn e rumagnòl article Umberto Lenzi, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.